হাতে-কামে লাগিছে অসম আৰক্ষী! বৰমালা পিন্ধায়েই দৰা হ’ল ৰঙাঘৰৰ আলহী

অসম লাইভ২৪ঃ বিয়া কৰাবলৈ গৈ ৰঙাঘৰৰ আলহী হ’ল দৰা। বৰমালা পিন্ধিয়েই পোনে পোনে থানালৈ দৰা। ঘটনাটো নগাওঁৰ ৰূপহীহাটৰ। বিয়া পাতিবলৈ গৈ থানাৰ অতিথি হোৱা যুবকজনৰ নাম হৈছে উবাদুৰ ইছলাম৷ ২১ বছৰীয়া উবাদুৰক কিয় আটক কৰিছে আৰক্ষীয়ে? ৰূপহীহাট আৰক্ষীয়ে দক্ষিণ খাতোৱালৰ পৰা উবাদুৰক কৰায়ত্ব কৰি থানালৈ আনে৷ দক্ষিণ খাতোৱালৰ আব্দুল কালামৰ বাসগৃহত উবাদুৰে এগৰাকী ১৮ বছৰৰ তলৰ কিশোৰীক বিয়া কৰাবলৈ গৈছিল৷ আৰক্ষীয়ে সেই তথ্য লাভ কৰি অভিযান চলাই৷ ঘটনাস্থলীৰ পৰা দৰা উবাদুৰক কৰায়ত্ব কৰে৷ লগতে দুই সহযোগীকো আটক কৰে আৰক্ষীয়ে৷

উবাদুৰক সহযোগ কৰাৰ অভিযোগত আটক কৰা আন দুজন যুবকৰ নাম হৈছে গুলজাৰ হুছেইন আৰু ৰফুল আমিন৷ গুলজাৰৰ ঘৰ দক্ষিণ খাটোৱালত আৰু ৰফুলৰ ঘৰ জুৰীয়া মাৰিপাৰত৷ ঘটনাৰ সন্দৰ্ভত আৰক্ষীয়ে ভাৰতীয় দণ্ডবিধি আইনৰ ৯/১০/১১ অধীনত ৪৩/২০২৩ নম্বৰত এক গোচৰ ৰুজু কৰি অভিযুক্তক আদালতত হাজিৰ কৰোৱা হৈছে৷

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ