দেশজুৰি ডিজিটেল এৰেষ্টৰ চক্ৰ এক্টিভ হৈ পৰিছে৷ বহুতেই ধন হেৰুৱাই সৰ্বশান্তও হৈছে৷ ডিজিটেল লেনদেনক হাঁথিয়াৰ কৰি ব্যক্তিগত তথ্যও হৰলুকি কৰিছে দুষ্কৃতীকাৰীয়ে৷ ইয়াৰ পৰিপ্ৰেক্ষিতত ডাঙৰ পদক্ষেপ গ্ৰহণ কৰিলে কেন্দ্ৰীয় গৃহমন্ত্ৰণালয়ে৷ প্ৰায় ৮৪ হাজাৰ হোৱাটছএপ একাউণ্ট ব্লক কৰা হৈছে মন্ত্ৰণালয়ৰ তৰফৰ পৰা৷
গৃহমন্ত্ৰণালয়ৰ ছাইবাৰ শাখা ইণ্ডিয়ান ছাইবাৰ ক্ৰাইম কোঅৰ্ডিনেছন চেণ্টাৰ ডিজিটেল ষ্ট্ৰাইক অভিযান আৰম্ভ হৈছে দেশজুৰি৷ যাৰ লক্ষ্য ছাইবাৰ অপৰাধীসকলৰ নেটৱৰ্ক ভাঙি পেলোৱা৷ সূত্ৰৰ খবৰ অনুসৰি ২০২৫ চনৰ আৰম্ভণিৰ পৰা বৰ্তমান পৰ্যন্ত এই অভিযানত ৩৯৬২ টা স্কাইপ আই ডি আৰু ৮৩,৮৬৭ টা হোৱাটছএপ একাউণ্ট ব্লক কৰা হৈছে৷ এই সকলো একাউণ্টৰ পৰা বিভিন্ন প্ৰতাৰণামূলক কাৰ্যকলাপ চলোৱা হৈছিল৷ এই সমস্ত একাউণ্টৰ মাধ্যমেৰে সাধাৰণ মানুহক টাৰ্গেট কৰি জালিয়াতিৰ ফান্দ পতা হয়৷ বিশেষকৈ বিনিয়োগৰ নাম লৈ প্ৰতাৰণা আৰু ভুৱা ডিজিটেল গ্ৰেপ্তাৰৰ ভয় দেখুৱাই ধন আদায় কৰা হয়৷
এই অভিযান পৰিচালিত হৈছে টেলিকম দফতৰ, বিভিন্ন ৰাজ্যৰ আৰক্ষী আৰু টেলিকম পৰিসেৱা প্ৰদানকাৰী সংস্থাসমূহৰ সমন্বয়ত৷ ফলত ছাইবাৰ অপৰাধীসকলে ব্যৱহৃত ডিজিটেল অৱকাঠামোক ডাঙৰ আঘাত কৰা সম্ভৱ হব বুলি ধাৰণা কৰিছে প্ৰশাসনে৷
কেৱল অনলাইন একাউণ্টেই নহয়, মোবাইল আৰু নেটৱৰ্ক নিৰাপত্তাৰ ক্ষেত্ৰতো কাঢ়া পদক্ষেপ লোৱা হৈছে৷ নেশ্ব্যনেল ছাইবাৰ ক্ৰাইম ৰিপোৰ্টিং পৰ্টেলৰ মাধ্যমেৰে চিহ্নিত ৮.৪৫ লাখ ছিম কাৰ্ড আৰু ২.৩৯ লাখ মোবাইল IMEI নম্বৰ ব্লক কৰা হৈছে৷ ইয়াৰ ফলত প্ৰতাৰকসকলৰ যোগাযোগৰ প্ৰধান মাধ্যমসমূহ কাৰ্যত অচল হৈ পৰিছে৷
ইয়াৰোপৰি অনলাইন প্ৰতাৰণাৰ সমগ্ৰ ইকোচিষ্টেম ধ্বংস কৰিবলৈ ৮২৭ টা ক্ষতিকাৰক মোবাইল এপ বন্ধ কৰা হৈছে৷ চৰকাৰী পৰ্টেলৰ মাধ্যমেৰে ১.১১ লাখৰো বেছি সন্দেহজনক অনলাইন কনটেণ্ট ডিলিট কৰা বা ব্লক কৰা হৈছে৷ যিসমূহ পোষ্ট মানুহক বিভ্ৰান্ত বা প্ৰতাৰিত কৰাত ব্যৱহৃত হৈছিল৷
বিশেষজ্ঞৰ মতে সাম্প্ৰতিক সময়ত ছাইবাৰ প্ৰতাৰণাৰ ধৰণ আৰু জটিল আৰু প্ৰযুক্তিনিৰ্ভৰ হৈ উঠিছে৷ সেয়ে এই ধৰণৰ সমন্বিত আৰু দ্ৰুত পদক্ষেপ অত্যন্ত জৰুৰী আছিল৷ কেন্দ্ৰৰ এই ডিজিটেল ষ্ট্ৰাইকে সাধাৰণ মানুহৰ আৰ্থিক আৰু মানসিক সুৰক্ষা নিশ্চিত কৰাত ডাঙৰ ভুমিকা হব বুলি আশা কৰা হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
