অসম লাইভ২৪ঃ শনিবাৰে সন্ধিয়া চন্দ্ৰৰ কক্ষপথত ভৰি দিছে চন্দ্ৰযান-৩য়ে। মহাকাশযানখনে পৃথিৱীৰ মধ্যাকৰ্ষণৰ পৰা ওলাই গৈ চন্দ্ৰৰ কক্ষপথত প্ৰদক্ষিণ কৰি আছে। উৎক্ষেপণৰ ২২ দিন পাছত চন্দ্ৰৰ আকৰ্ষণবলৰ অধীনত চন্দ্ৰৰ কক্ষপথত প্ৰদক্ষিণ কৰিবলৈ আৰম্ভ কৰিছে যানখনে। কিন্তু মূল গন্তব্যস্থান পাবলৈ এতিয়াও বহুদূৰ পথ বাকী আছে। চন্দ্ৰৰ মাটি স্পৰ্শ কৰাৰ আগতেই কেইটামান কঠিন পৰীক্ষাৰ মুখামুখি হ’ব চন্দ্ৰযান-৩। শনিবাৰে চন্দ্ৰযান-৩ য়ে চন্দ্ৰৰ কক্ষপথত সফলভাৱে ভৰি দিয়াৰ পাছতেই ইছৰোই কৰিছে বিশেষ টুইট।
ইছৰোই দিয়া বিবৃত্তিত উল্লেখ কৰামতে সন্ধিয়া ৭.১২ মিনিট মহাকাশযানখনে চন্দ্ৰৰ কক্ষপথত ভৰি দিছে। চন্দ্ৰৰ মাটিত প্ৰথম ভৰি দিছিল আমেৰিকাৰ মহাকাশচাৰী নীল আমষ্ট্ৰং। শনিবাৰে আছিল নীল আমষ্ট্ৰঙৰ ৯৩ সংখ্যক জন্মবাৰ্ষিকী। চন্দ্ৰৰ আকৰ্ষণ বলৰ সহায়ত চন্দ্ৰৰ কক্ষপথত ৪পাক ঘূৰিব চন্দ্ৰযান-৩য়ে। ধীৰে ধীৰে চন্দ্ৰযানখনৰ গতি কমি আহিব। চন্দ্ৰৰ মধ্যাকৰ্ষণ শক্তি পৃথিৱীৰ তুলনাত ৬গুণ কম। সেয়ে ধীৰে ধীৰে যানখনে গতি কমাই আনিহে চন্দ্ৰপৃ্ষ্ঠত অৱতৰণ কৰিব পাৰিব।
পৃথিৱীৰ মধ্যাকৰ্ষণ শক্তিৰ অধীনত যিমান দিন চন্দ্ৰযান-৩য়ে পৃথিৱীৰ কক্ষপথত প্ৰদক্ষিণ কৰি আছিল তেতিয়ালৈ ঢাপে ঢাপে যানখনৰ গতি বৃদ্ধি কৰা হৈছিল। ৫টা ঢাপ পাৰ লৈ পৃথিৱীৰ কক্ষপথ এৰিছে যানখনে। বৰ্তমান চন্দ্ৰযান-৩ ৰ অৱস্থান চন্দ্ৰপৃষ্ঠৰ পৰা মাত্ৰ ১০০ কিঃমিঃ দূৰত্বত। তাৰপিছতেি চন্দ্ৰযান৩ য়ে কঠিন কাৰ্যকলাপৰ মুখামুখি হ’ব? আগন্তুক ২৩ আগষ্টৰ সন্ধিয়া ৫.৪৭ মিনিটত ৰোভাৰ প্ৰজ্ঞানক যানখনৰ পৰা বাহিৰলৈ উলিওৱা হ’ব। চফট লেণ্ডিং কৰিব চন্দ্ৰযান-৩ৰ লেণ্ডাৰ বিক্ৰমে। ৪বছৰ পূৰ্বে এনেদৰে লেণ্ডিং কৰাৰ সময়তে ব্যৰ্থ হৈছিল ইছৰোৰ চন্দ্ৰযান-২য়ে।
চন্দ্ৰৰ দক্ষিণ মেৰুত নামিব চন্দ্ৰযান-৩। এই অভিযান যদি সফল হয় তেন্তে ভাৰতৰ মহাকাশ গৱেষণাই নিশ্চয়কৈ এক নতুন মাত্ৰা পাব বুলিও জনাইছে ইছৰোৰ দলটোৱে। আমেৰিকা, ৰাছিয়া, চীনৰ পাছতেই চন্দ্ৰত মহাকাশযান পঠোৱা চতুৰ্থখন দেশ হৈছে ভাৰত। ২০১৯ চনৰ ৭ জুলাইত চন্দ্ৰৰ দক্ষিণ মেৰুৰ নিচেই কাষত ‘ছিমপেলিয়াছ এন’ আৰু ‘মেনজিনাছ ছি’ নামৰ দুটা গহ্বৰ আছে। এই দুই গহ্বৰৰ মাজৰ সমতল স্থানত বিক্ৰমে লেণ্ডিং কৰিবলৈ চেষ্টা কৰিছিল। কিন্তু চন্দ্ৰযান-২ ৰ অভিযান সফল নহ’ল।
এইবাৰৰ অভিযান ইছৰোই চলোৱা তৃতীয়টো অভিযান। ইয়াৰপূৰ্বেও দুবাৰকৈ মানৱবিহীন যান চন্দ্ৰলৈ প্ৰেৰণ কৰিছে ইছৰোই। বাংগালুৰুৰ বিশেষ কাৰ্যালয়ৰ পৰা এইবাৰৰ যানখনৰ সমূহ গতিবিধি নিয়ন্ত্ৰণ কৰি থকা হৈছে। চন্দ্ৰ পৃষ্ঠত ভৰি দিলেই বিজ্ঞানীসকলৰ কষ্ট সাৰ্থক হ’ব বুলিও জনাইছে ইছৰোৰ তৰফৰ পৰা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
