অসম লাইভ২৪ঃ ৩৫ বছৰ। যৌৱন শেষ হৈ মধ্যবয়সে হাতবাউল দিয়া সময়। কেৰিয়াৰৰ গঢ়াৰ ভৰপক সময়। কিন্তু এই বয়সতেই চীনত লাখ লাখ যুৱক এতিয়া কৰ্মহীনতাত ভূগিছে। ৩৫বছৰ হ’লেই চাকৰি হেৰুৱাইছে চীনৰ যুৱকে। অন্য দেশত কেৰিয়াৰ গঢ়াৰ সময় আৰু চীনত ৩৫বছৰ অৱসৰৰ সময়। ৩৫বছৰ পাৰ হোৱা সকলো যুৱক যুৱতীয়েই এতিয়া বেকাৰ হৈ পৰিছে চীনত।
চীনত এইসকল যুৱক-যুৱতীয়ে চাকৰিৰ বাবে এপ্লাই কৰিলেও উভতাই পঠিয়াই চীনৰ প্ৰায়সংখ্যক কোম্পানীয়ে। নিউ ইয়ৰ্ক টাইমছে চলোৱা গৱেষণাত পোহৰলৈ আহিছে এই তথ্য। চীনৰ ৩৫বছৰীয়া এজন যুৱকে জনোৱা অনুসৰি তেওঁ প্ৰতি দিনে নিশা ১১ বজালৈ কাম কৰিছিল। কামত কোনো খুটিনাটি এৰা নাছিল। কিন্তু তাৰপিছতো তেওঁৰ চাকৰি স্থায়ী নহ’ল।
যুৱকজনে আৰ্টিফিছিয়েল ইণ্টেলিজেন্সত কাম কৰিছিল। কিন্তু হঠাতেই তেওঁক চাকৰিৰ পৰা বৰ্খাস্ত কৰা হয়। বৰ্তমান ৩৫ বছৰত ভৰি দিছে যুৱকজনে। চাকৰি যোৱাৰ পাছতেই যুৱকজনে অন্য কোম্পানীত এপ্লাই কৰে। কিন্তু তাতো তেওঁক ৰিজেক্ট কৰা হ’ল। তেওঁক কিয় সকলোতে ৰিজেক্ট কৰা হ’ল সেই সন্দৰ্ভত তেওঁ কয়, ‘বেছিভাগ চাকৰিতেই বিজ্ঞাপনত যোগ্যতা হিচাপে পোনতে বয়সৰ মাপকাঠি বান্ধি দিয়া হয়। কিন্তু তেওঁৰ বয়স এতিয়া ৩৫বছৰ পাৰ হৈছে। সেয়ে কোনোৱে তেওঁক কামত ৰাখিবলৈ ৰাজী নহয়।’
চীনৰ কৰ্পৰেট গোষ্ঠীত ‘কাৰ্ছ অৱ ৩৫’ বুলি এক নিয়ম আছে। এই ধৰণৰ দেশত বেকাৰত্ব সমস্যাৰ নেপথ্যতেই এই কাৰণ। চীনত প্ৰচলিত নিয়ম অনুসৰি ৩৫বছৰ বয়সক অভিশপ্ত বুলি ধৰা হয়। এই বয়স অতিক্ৰম কৰিলেই কাম হেৰুৱাই চীনৰ যুৱক-যুৱতীয়ে। পুৰণিসকলৰ ঠাইত নতুন কমবয়সীয়া লোকক নিযুক্তি দিয়া হয়। চীনৰ সমাজত প্ৰচলিত ধাৰণা এয়াই যে, ৩৫বছৰ বয়সৰ পাছতেই যুৱক একোজনে সমস্যাৰ সমাধান কৰিব নোৱাৰাত পৰে। এয়া চীনা সমাজৰ মাজত যুগ যুগ ধৰি চলি অহা বদ্ধমূল ধাৰণা। এই বদ্ধমূল ধাৰণাৰ বাবেই চীনত বছৰি হাজাৰ হাজাৰ যুৱকে কৰ্মসংস্থাপন হেৰুৱাই আহিছে। অৰ্থাৎ চীনত বয়স বাঢ়িলেই চিন্তা বাঢ়ে যুৱক যুৱতীসকলৰ। আৰম্ভ হয় জীৱনৰ নতুন সংগ্ৰাম। অভিজ্ঞতাৰ তুলনাত পৰিশ্ৰমৰ ক্ষমতাৰ ওপৰতহে বেছি জোৰ দিয়ে চীনাসকলে।
উল্লেখ্য যে, কমবয়সীয়া অনভিজ্ঞ কৰ্মীসকলৰ দৰমহা তুলনামূলকভাৱে কম। সংস্থাৰ খৰচ বচাবলৈকো ৩৫পাৰ হ’লেই কৰ্মীসকলক চাটাই কৰি নতুন কৰ্মীক সংস্থাপন দিয়া হয়।এই নিয়মৰ বাবেই চীনৰ তৰুণ প্ৰজন্ম বেকাৰত্বৰ আশংকাত ভূগিছে। কৰ্মসংস্থাপনহীনতাৰ বাবেই চীনৰ নৱ প্ৰজন্ম বিবাহৰ বাবেও আগ্ৰহী নহয়। ২০২১ চনৰ পৰিসংখ্যা মতে চীনত বছৰি ৭৬ লাখ ৩০হাজাৰ লোকে বিবাহৰ বাবে আৱেদন কৰিছে। তাৰপিছতেই ২০২২ চনত এই পৰিসংখ্যা কমি হৈছেগৈ ৬৮লাখ ৩০হাজাৰ। কেৱল বিবাহেই নহয় সন্তান জন্ম দিয়া লোকৰ হাৰো সামগ্ৰিকভাৱে কমিবলৈ লৈছে চীনত। জনসংখ্যাৰ দিশেৰে বিশ্বৰ দ্বিতীয় স্থানত এতিয়া চীন। সম্প্ৰতি ১৪০ কোটি জনসংখ্যাৰে ভাৰততকৈ তলত আছে চীন।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
