প্ৰধানমন্ত্ৰীৰ এটা ফোন। মোদীৰ এটা টুইট। তাৰ পাছত ভাৰত সীমান্তত চীনৰ যুদ্ধ বিমানৰ বিচৰণ৷ এক কথাত ভাৰতক যেন চীনৰ ৰঙাচকু৷
কেন্দ্ৰবিন্দু দালাই লামা। ৬ জুলাইত ৮৭ সংখ্যক জন্মদিন আছিল ধৰ্মগুৰু দালাই লামাৰ৷ তিব্বতৰ ধৰ্মীয় গুৰুজনাৰ উপজা দিন উপলক্ষে লামাক ফোনযোগে শুভেচ্ছা জনাইছিল প্ৰধানমন্ত্ৰীয়ে।
টুইটযোগেও জনাইছিল শুভেচ্ছা৷ অকল ভাৰতেই নহয় লামালৈ ৮৭ সংখ্যক জন্ম দিনৰ শুভেচ্ছা জনাইছিল আমেৰিকায়ো৷ ইয়াতে খৰ্গহস্ত চীন৷ চীনৰ বিদেশ মন্ত্ৰীৰ প্ৰতিক্ৰিয়া৷
চীনৰ আভ্যন্তৰীণ বিষয়ত ভাৰতৰ অনাধিকাৰ প্ৰৱেশ অনুচিত। চীনৰ এই প্ৰতিক্ৰিয়াৰ পাছত ভাৰতেও দিছে যথোচিত উত্তৰ৷ ভাৰতৰ পক্ষৰ পৰা স্পষ্ট কৰি দিয়া হৈছে-দালাই লামা ভাৰতৰ সন্মানীয় অতিথি, বিশ্বজুৰি খ্যাতি থকা সন্মানীয় ধৰ্মীয় গুৰু।
সেয়ে ভাৰতে লামাক দিবলগীয়া সন্মান দিবই৷ উল্লেখযোগ্য, চীনে তিব্বতক নিজৰ বুলি দাবী কৰি অহাৰ লগতে দালাই লামাক বিচ্ছিন্নতাবাদী হিচাপে চিহ্নিত কৰি আহিছে৷
ইয়াৰ বিপৰীতে তিব্বত এখন স্বাধীন ৰাষ্ট্ৰ, কোনোদিনে চীনৰ অংগ নাছিল বুলি লাল ফৌজৰ বিৰুদ্ধে স্বাধীনতা সংগ্ৰাম অব্যাহত ৰাখিছে তিব্বতীসকলে৷
দালাই লামাক তিব্বতীসকলৰ সংগ্ৰামৰ মুখ্য বিচ্ছিন্নতাবাদী বুলি ভবা চীনে সেয়ে লামাৰ জন্মদিনৰ শুভেচ্ছা জনোৱা কাৰ্যক সহজভাৱে ল’ব পৰা নাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
