বিশ্বৰ বিভিন্ন চিকিৎসা বিজ্ঞানীয়ে বিভিন্ন মত দাঙি ধৰিলেও যোৱা দুটা বছৰে কৰোনাৰ উৎপত্তিকেন্দ্ৰিক ৰহস্য ভেদ কৰিবলৈ এতিয়াও সফল হোৱা নাই৷ চীনৰ য়ুহান প্ৰদেশত উৎপত্তি হোৱা বুলি দাবী কৰা এই কৰোনাই একাধিকবাৰ মিউটেশ্যন ঘটি বিশ্ব মানৱকুলক ত্ৰাহি মধুসুধন দেওখুৱাই আহিছে৷
এইবাৰ কৰোনাৰ ৰূপত নতুন আবিৰ্ভাৱ ঘটিল অ’মিক্ৰণ৷ ক্ষীপ্ৰ গতিত মানুহৰ শৰীৰলৈ সংক্ৰমণ ঘটাৰ ক্ষমতালব্ধ কৰোনাৰ নৱতম ভেৰিয়েন্ট এই অ’মিক্ৰণ ক’ৰ পৰা জন্ম হৈছে তাৰো একাধিক দাবী উত্থাপন কৰিছে বিভিন্ন গৱেষক দলে৷
এইবাৰ চীনৰ এদল বিজ্ঞানীয়ে দাবী কৰিছে যে কৰোনা ভাইৰাছৰ এই অ’মিক্ৰণ ভেৰিয়েন্ট এন্দুৰ শৰীৰৰ পৰা জন্ম হৈছে৷ বিজ্ঞানীৰ দলটোৱে প্ৰকাশ কৰা এক গৱেষণা পত্ৰত ইয়াৰ সমৰ্থনত শক্তিশালী তথ্য প্ৰমাণ আছে বুলিও দাবী কৰা হৈছে৷
তেওঁলোকৰ দাবী যে মানুহৰ শৰীৰৰ পৰা এন্দুৰৰ শৰীৰত এই ভাইৰাছটোৱে প্ৰৱেশ কৰিছিল আৰু তাৰপিছত একাধিক মিউটেশ্যন ঘটি এন্দুৰৰ শৰীৰৰ পৰা পুনৰ মানুহৰলৈ ই সংক্ৰমিত হয়৷
উল্লেখ্য যে কৰোনা ভাইৰাছৰ অন্যান্য ভেৰিয়েণ্টৰ বিপৰীতে অ’মিক্ৰণৰ চৰিত্ৰ হৈছে বিচিত্ৰ৷ এই ভাইৰাছটো পূৰ্বৰ ভেৰিয়েণ্টবোৰৰ দৰে মাৰাত্মক নহ’লে কিন্তু ইয়াৰ সংক্ৰমণৰ ক্ষমতা অধিক দ্ৰুত৷
আনহাতে, অ’মিক্ৰণৰ বহু মিউটেশ্যন দেখা গৈছে৷ প্ৰকাশ পোৱা অনুসৰি অ’মিক্ৰণৰ অতি ক’মেও পাঁচটা মিউটেশ্যন দেখা গৈছে, যিসমূহ মিউটেশ্যন ইয়াৰ পূৰ্বে দেখা নগৈছিল৷ চীনৰ বিজ্ঞানী দলটোৰ মতে অ’মিক্ৰণৰ এই পাঁচটা মিউটেশ্যন এন্দুৰৰ হাওফাওত দেখা পোৱা ভাইৰাছৰ নমুনাৰ সৈতে সাদৃশ্য আছে৷
চীনৰ তিয়ানজিন নানকাই বিশ্ববিদ্যালয় আৰু দ্য নেচশ্যনেল ইনষ্টিটিউট ফৰ কমিউনেল ডিজিছ কণ্ট্ৰ’ল এণ্ড প্ৰিভেশ্যনৰ বিজ্ঞানীৰ দলে এই দাবী কৰিছে৷ তেওঁলোকে প্ৰস্তুত কৰা গৱেষণা পত্ৰখন বায়’চেফ্টি এণ্ড বায়’ছিকিউৰিটি জাৰ্ণালত প্ৰকাশ পাইছে৷
উল্লেখ্য যে অ’মিক্ৰণৰ অতি ক’মেও ৫০ টা মিউটেশ্যন ঘটা দেখা গৈছে৷ ইফালে অ’মিক্ৰণৰ জন্মকলৈ তিনিটা মত প্ৰকাশ পাই আহিছিল৷
প্ৰথমটোৰ মতে কোনো ইমিউন’কমপ্ৰোমাইজড ব্যক্তিৰ শৰীৰত অ’মিক্ৰণৰ সৃষ্টি হৈছে৷ দ্বিতীয়টোৰ মতে কোভিড ৰোগীৰ শৰীৰত সকলোৰে অলক্ষিতে মিউটেশ্যন ঘটি অ’মিক্ৰণৰ উৎপত্তি হৈছে৷ অৱশ্যে এই মতক প্ৰায় ভাগ গৱেষকে খাৰিজ কৰিছে৷ আৰু তৃতীয়তে মানুহৰ দেহত সংক্ৰমিত কোনো কৰোনা ষ্ট্ৰেন প্ৰাণী দেহত প্ৰৱেশ কৰি কে’বাটাও পৰ্যায়ত মিউটেশ্যন ঘটি অ’মিক্ৰণৰ সৃষ্টি হৈছে৷
চীনৰ গৱেষকসকলে দাবী কৰা এই নতুন মতটোৱে অ’মিক্ৰণৰ জন্মক আৰু অধিক ৰহস্যাবৃত্তহে কৰি তুলিলে বুলিব পাৰি৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
