দেশৰ অগণন গুণমুদ্ধ আৰু সংগীত অনুৰাগীক শোক সাগৰত এৰি থৈ ৯২ বছৰ বয়সত পৃথিৱীৰ পৰা বিদায় ল’লে কোকিলকণ্ঠী গায়িকা ভাৰতৰত্ন লতা মংগেশকাৰে৷
চিৰকুমাৰী হৈ ৰোৱা লতা মংগেশকাৰ জীৱন আছিল অতি সংঘাত বহুল৷ লতা মংগেশকাৰৰ এই সংঘাত বহুল জীৱনৰ মাজতে মৰণোত্তৰভাৱে ভাৰতৰত্ন বঁটাপ্ৰাপক দেশ আৰু বিদেশত খ্যাতি লাভ কৰা অসমৰ সংগীত শিল্পী ডঃ ভূপেন হাজৰিকাৰৰ সৈতে প্ৰেমৰ সম্পৰ্ক গঢ়ি উঠিছিল!
এই দাবী কৰিছিল ডঃ হাজৰিকাৰ একালৰ পত্নী প্ৰয়াত প্ৰিয়ম্বদা পাটিল হাজৰিকাই৷ প্ৰিয়ম্বদা পাটিল হাজৰিকাই দাবী কৰিছিল যে ‘‘লতাই তেওঁ(ডঃ ভূপেন হাজৰিকাৰ)ৰ সৈতে গভীৰ সম্পৰ্ক গঢ়ি তুলিছিল৷’’
ইয়াৰ পিছতে সমগ্ৰ দেশতে বিষয়টোৱে তুমুল চৰ্চা লাভ কৰিছিল৷ ইমানেই নহয়, প্ৰিয়ম্বদা পাটিল হাজৰিকাৰ মতে লতা মংগেশকাৰ আৰু ভূপেন হাজৰিকাই কলকতাৰ টালিগঞ্জৰ তিনিটা বেডৰুম বিশিষ্ট এটা এপাৰ্টমেন্টত একেলগে আছিল৷
ভূপেন হাজৰিকাৰ মৃত্যুৰ পিছত প্ৰথমটো মৃত্যু বাৰ্ষিকীত অসমলৈ আহি প্ৰিয়ম্বদা পাটিল হাজৰিকাই এই বিস্ফোৰণ ঘটাইছিল৷ বৈদ্যুতিন সংবাদ চেনেল ডিৱাই৩৬৫ক দিয়া এক সাক্ষাৎকাৰত প্ৰিয়ম্বদা পাটিল হাজৰিকাই অন্য আৰু বহু বিস্ফোৰক অভিযোগো কৰিছিল৷
‘‘ভূপেনে তোমাৰ শোৱনি কোঠালৈ ঘূৰি যাব বুলি ভাবি জীয়াই থকাটো বৃথা৷’’ মুম্বাইৰ সংগীত পৰিচালক কল্যাণজী-আনন্দজীয়ে তেওঁক গুজৰাটী ভাষা এইদৰে কোৱা বুলিও দাবী কৰিছিল প্ৰিয়ম্বদা পাটিল হাজৰিকাই৷
‘‘লতা তেওঁৰ প্ৰতি গভীৰভাৱে অনুৰক্তা আছিল আৰু তেওঁ মোক কৈছিল, ‘প্ৰিয়ম, ভাৰতত যদি কোনো সংগীতজ্ঞই প্ৰতিষ্ঠা লাভ কৰিব লাগে, তেন্তে তেওঁৰ গান লতাই গাবই লাগিব৷ মই তেওঁক সুধিলো তুমি তেওঁৰ সৈতে এটা কোঠাত ৰাতি ৰাতি কেনেকৈ একেলগে থাকিব পাৰা? তেতিয়া তেওঁ ক’লে, ‘কেতিয়াবা থাকিব লাগে’৷’’ প্ৰিয়ম্বদা পাটিল হাজৰিকাই উক্ত সাক্ষাৎকাৰটোত কৈছিল৷
উল্লেখ্য যে অসম বুলিয়ে নহয়, সমগ্ৰ দেশতে ভূপেন হাজৰিকা আৰু লতা মংগেশকাৰৰ মাজত মধুৰ সম্পৰ্ক আছিল বুলি ধাৰণা কৰা হৈছিল৷ কিন্তু কোনোৱে ইয়াক মুকলিকৈ তথা ৰাজহুৱাকৈ কোৱা নাছিল৷
ভূপেন হাজৰিকাৰ মৃ্ত্যুৰ এবছৰত পিছত ভূপেন হাজৰিকাৰ পত্নী প্ৰিয়ম্বদা পাটিল হাজৰিকাই অসমলৈ আহি ইয়াক ৰাজহুৱা কৰিছিল৷
ইফালে ভূপেন হাজৰিকাই তেওঁৰ আত্ম-জীৱনীমূলক মই এটি যাযাবৰ শীৰ্ষক গ্ৰন্থটো মুম্বাই এগৰাকী বিখ্যাত গায়িকাৰ বিষয়ে উল্লেখ কৰিছিল৷ ভূপেন হাজৰিকাই গ্ৰন্থখনত লিখিছিল যে মুম্বাইৰ এগৰাকী বিখ্যাত গায়িকাৰ সৈতে কলকতাৰ বিমানবন্দৰত তেওঁক দেখাৰ পিছতে তেওঁৰ পত্নীৰে সম্পৰ্কত জতিলতাৰ সৃষ্টি হৈছিল৷
সেই প্ৰসংগটোৰ কথাও প্ৰিয়ম্বদাই সাক্ষাৎকাৰটোত উল্লেখ কৰিছিল৷ ইফালে ভূপেন হাজৰিকাইও উল্লেখ কৰিছে যে লতা মংগেশকাৰে প্ৰিয়ম্বদা পাটিল হাজৰিকাক কি কৈছিল৷
প্ৰিয়ম্বদা পাটিল হাজৰিকাই এই কথা ৰাজহুৱা কৰাৰ পিছতে লতা মংগেশকাৰে প্ৰতিক্ৰিয়া প্ৰকাশ কৰিছিল৷ আনকি লতা মংগেশকাৰে সমগ্ৰ বিষয়টোৰ সন্দৰ্ভত আইনী পদক্ষেপ গ্ৰহণৰ কথাও প্ৰকাশ পাইছিল৷
ইফালে ভূপেন হাজৰিকাই এই কথা কোনোদিন স্বীকাৰ কৰি যোৱা নাছিল৷ ডঃ ভূপেন হাজৰিকাৰ একালৰ পত্নী প্ৰয়াত প্ৰিয়ম্বদা পাটিল হাজৰিকাই কৰা এই বিস্ফোৰক অভিযোগে অনাদি অনন্তকালৰ বাবে ৰহস্যাবৃত্ত হৈয়ে থাকিল৷ কাৰণ এই অভিযোগৰ সৈতে সম্পৰ্কৃত তিনিওগৰাকী ব্যক্তিয়ে ইতিমধ্যে ইহসংসাৰ ত্যাগ কৰিছে৷
কিন্তু, প্ৰিয়ম্বদা পাটিল হাজৰিকাৰ এই অভিযোগৰ সত্যতা বিষয়টোক এৰাই চলিলেও তেওঁলোকৰ সংসাৰত কেণা লগাত যে লতা মংগেশকাৰৰ নামটো সাঙুৰ খাই আছে সেইটো সত্য৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
