অসমত বৰ্তমান চলি থকা টোলগে’টসমূহৰ বৈধতাক লৈ এক গুৰুত্বপূৰ্ণ প্ৰশ্ন উত্থাপন কৰিছে অসমীয়া যুৱ মঞ্চই। ৰাজ্যখনত প্ৰায় ১২ৰ পৰা ১৩খন টোলগে’ট চলি থকাৰ বিপৰীতে ভাৰতীয় ৰাষ্ট্ৰীয় ঘাইপথ প্ৰাধিকৰণ (NHAI)ৰ হাতত মাত্ৰ তিনিখন টোলগে’টৰহে তথ্য থকাৰ কথা প্ৰকাশ পাইছে। তথ্য জনাৰ অধিকাৰ (RTI)ৰ জৰিয়তে লাভ কৰা তথ্যৰ ভিত্তিত এই অভিযোগ উত্থাপন কৰিছে সংগঠনটোৱে।
অসমীয়া যুৱ মঞ্চৰ দাবী অনুসৰি, NHAIৰ তথ্যত মদনপুৰ, নাজিৰাখাট আৰু ৰহা টোলগে’টৰহে উল্লেখ আছে। ইয়াৰ বাহিৰে ৰাজ্যৰ আন টোলগে’টসমূহৰ কোনো তথ্য NHAIৰ হাতত নাই বুলি অভিযোগ কৰিছে সংগঠনটোৱে। এই তথ্য পোহৰলৈ অহাৰ পাছতে ৰাজ্যৰ টোলগে’টসমূহৰ বৈধতাক লৈ সৃষ্টি হৈছে ব্যাপক প্ৰতিক্ৰিয়া।
সংবাদমেল অনুষ্ঠিত কৰি অসমীয়া যুৱ মঞ্চই অভিযোগ কৰে যে, ৰাজ্যৰ বিভিন্ন স্থানত টোলগে’ট স্থাপন কৰি সাধাৰণ জনতাৰ পৰা ধন সংগ্ৰহ কৰা হৈছে যদিও সেই টোলগে’টসমূহত থাকিবলগীয়া প্ৰয়োজনীয় সা-সুবিধা আৰু ব্যৱস্থাসমূহ পৰ্যাপ্তভাৱে নাই। টোলগে’টৰ নামত সাধাৰণ ৰাইজৰ ওপৰত অতিৰিক্ত আৰ্থিক বোজা জাপি দিয়া হৈছে বুলিও ক্ষোভ প্ৰকাশ কৰে সংগঠনটোৱে।

সংগঠনটোৰ মতে, টোলগে’টৰ বাবে ৰাজ্যত অত্যাৱশ্যকীয় সামগ্ৰীৰ মূল্যবৃদ্ধিৰ বোজাও বৃদ্ধি পাইছে। বিশেষকৈ গুৱাহাটীৰ পৰা উজনি অসমলৈ যাত্ৰা কৰা লোকসকলে ইন্ধনৰ খৰচতকৈ টোল কৰৰ নামত অধিক ধন ব্যয় কৰিবলগীয়া পৰিস্থিতিৰ সৃষ্টি হৈছে বুলি অভিযোগ কৰে অসমীয়া যুৱ মঞ্চই। টোল কৰৰ বোজা পৰিবহণ ব্যৱস্থাৰ জৰিয়তে খাদ্যসামগ্ৰীকে ধৰি বিভিন্ন অত্যাৱশ্যকীয় সামগ্ৰীৰ দামতো প্ৰতিফলিত হৈছে বুলি সংগঠনটোৱে মত প্ৰকাশ কৰে।
সংবাদমেলত অসমীয়া যুৱ মঞ্চই প্ৰশ্ন কৰে যে, যিসমূহ টোলগে’টৰ বৈধতা আৰু তথ্যৰ স্পষ্টতা নাই, সেইসমূহৰ নামত সাধাৰণ ৰাইজে কিয় ধন আদায় দি থাকিব লাগিব? চৰকাৰে এই বিষয়টো গুৰুত্বসহকাৰে গ্ৰহণ কৰি ৰাজ্যৰ সকলো টোলগে’টৰ বৈধতা পৰীক্ষা কৰাৰ দাবী জনায় সংগঠনটোৱে। লগতে, যিসমূহ টোলগে’টৰ বৈধতাৰ প্ৰমাণ নাই, সেইসমূহ অতি শীঘ্ৰে উচ্ছেদ কৰাৰ বাবেও চৰকাৰৰ ওচৰত দাবী উত্থাপন কৰে অসমীয়া যুৱ মঞ্চই।
উল্লেখ্য যে, টোলগে’টক কেন্দ্ৰ কৰি ৰাজ্যত সাধাৰণ জনতাৰ মাজত দীৰ্ঘদিন ধৰি অসন্তুষ্টি চলি আহিছে। ইয়াৰ মাজতে RTIৰ তথ্যৰ ভিত্তিত অসমীয়া যুৱ মঞ্চই উত্থাপন কৰা এই অভিযোগে বিষয়টোক পুনৰ চৰ্চালৈ আনিছে। অৱশ্যে, NHAIৰ হাতত কোনো টোলগে’টৰ তথ্য নথকাৰ অৰ্থতে সেই টোলগে’ট অবৈধ বুলি নিশ্চিত কৰিব নোৱাৰি। এই সন্দৰ্ভত সংশ্লিষ্ট কৰ্তৃপক্ষৰ স্পষ্টীকৰণ আৰু প্ৰতিখন টোলগে’টৰ নথি-পত্ৰ পৰীক্ষা কৰাটোও গুৰুত্বপূৰ্ণ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ

















