এখন যাত্ৰীবাহী বাছ আৰু LPG টেংকাৰৰ মুখামুখি সংঘৰ্ষৰ ফলত ১০ জন লোকৰ মৃত্যু হোৱাৰ লগতে ২৭ জন আহত হৈছে। সংঘৰ্ষৰ পিছতে দুয়োখন বাহন অগ্নিদগ্ধ হোৱাৰ ফলত বহু যাত্ৰী বাহনৰ ভিতৰত আবদ্ধ হৈ পৰে। এই ভয়ংকৰ দুৰ্ঘটনা সংঘটিত হৈছে পাকিস্তানৰ বেলুচিস্তান প্ৰদেশত। দেশখনৰ সংবাদ প্ৰতিষ্ঠান ডনৰ প্ৰতিবেদন অনুসৰি, বৃহস্পতিবাৰে পুৱা প্ৰায় ১০:৩০ বজাত বেলুচিস্তানৰ গ্ৱাদাৰ জিলাৰ অৰমাৰা অঞ্চলৰ বাছলৰ ওচৰত মাক্ৰাণ উপকূলীয় ঘাইপথত এই দুৰ্ঘটনা সংঘটিত হয়।
তুৰবাটৰ পৰা কৰাচী অভিমুখে গৈ থকা এখন যাত্ৰীবাহী বাছৰ সৈতে বিপৰীত দিশৰ পৰা আহি থকা LPG টেংকাৰৰ মুখামুখি সংঘৰ্ষ হয়। গেছ টেংকাৰখন কৰাচীৰ পৰা গ্ৱাদাৰৰ সমীপৰ ইৰাণ-গাবাদ সীমান্তৰ দিশে গৈ আছিল। সংঘৰ্ষৰ তীব্ৰতা ইমানেই ভয়ংকৰ আছিল যে দুয়োখন বাহনত লগে লগে জুই লাগে।
জুইত আবদ্ধ হৈ পৰে বহু যাত্ৰী
দুৰ্ঘটনাৰ সময়ত বাছখনত মহিলা আৰু শিশুসহ ৪০ জনতকৈ অধিক যাত্ৰী আছিল। সংঘৰ্ষৰ পিছতে জুই বিয়পি পৰাত বহু যাত্ৰী বাছখনৰ ভিতৰত আবদ্ধ হৈ পৰে। অৰমাৰাৰ ডিএছপি নবী বখ্ছ ৰুঞ্জাই জানিবলৈ দিয়া মতে, ভয়ংকৰ জুইত অগ্নিদগ্ধ হৈ মহিলা আৰু শিশুসহ ১০ জন লোকৰ মৃত্যু হয়। উদ্ধাৰকাৰী দলে বাছখনৰ পৰা ৮টা মৃ*তদেহ আৰু গেছ টেংকাৰখনৰ পৰা দুটা মৃ*তদেহ উদ্ধাৰ কৰে। আনহাতে, দুৰ্ঘটনাত আহত ২৭ জন লোকক উদ্ধাৰ কৰি চিকিৎসাৰ বাবে প্ৰেৰণ কৰা হয়।
দুৰ্ঘটনাৰ খবৰ পোৱাৰ পিছতে পাকিস্তান সেনা, আৰক্ষী আৰু অগ্নিনিৰ্বাপক বাহিনীৰ দল ঘটনাস্থলীত উপস্থিত হয়। যৌথভাৱে উদ্ধাৰ আৰু অগ্নিনিৰ্বাপক অভিযান আৰম্ভ কৰা হয়। ভয়ংকৰ জুই নিৰ্বাপণ কৰাৰ লগতে বাহনৰ ভিতৰত আবদ্ধ হৈ থকা লোকসকলক উদ্ধাৰৰ চেষ্টা চলোৱা হয়। দুৰ্ঘটনাৰ ফলত মাক্ৰাণ উপকূলীয় ঘাইপথত যান-বাহনৰ চলাচল বহু ঘণ্টা ধৰি ব্যাহত হৈ পৰে। ঘাইপথত যান-বাহনৰ দীঘলীয়া শাৰী সৃষ্টি হোৱাৰ ফলত যাত্ৰীসকলেও ব্যাপক সমস্যাৰ সন্মুখীন হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ

















