অসম লাইভ২৪ঃ তেওঁৰ ঘড়ীৰ সংগ্ৰহ চকুতলগা। এটাতকৈ আনটোৰ দাম কেইবাকোটিও বেছি। ফুটবল তাৰকা ক্ৰিষ্টিয়ানো ৰোনাল্ডোৰ সেই কালেকছনত এইবাৰ যোগ হ’ল আৰু এটা দামী ঘড়ী। জেকব এণ্ড কোম্পানীৰ এটা ঘড়ী শেহতীয়াকৈ দেখা গৈছে তেঁওৰ হাতত। ঘড়ীটো তেওঁক উপহাৰ হিচাপে দিছে খোদ সংস্থাৰ মালিকেই। জেকব এণ্ড কোম্পানীৰ যি ঘড়ী সেই ঘড়ী ৰোনাল্ডোক উপহাৰ দিয়া হৈছে। এই ঘড়ীৰ দাম প্ৰায় ১৩ লাখ আমেৰিকান ডলাৰ। ভাৰতীয় মুদ্ৰাত এই ধনৰ পৰিমান হৈছে ১১ কোটি।
বৰ্তমান প্ৰায় এবছৰ ধৰি ছৌদি আৰৱৰ ৰাজধানী ৰিয়াধত আছে ৰোনাল্ডো। নতুন ঘৰো ক্ৰয় কৰিছে ৰোনাল্ডোৱে। ৰিয়াধতেই ৰোনাল্ডোক লগ কৰি এই ঘড়ী উপহাৰ দিছে সংস্থাৰ মালিক জেকব আৰাবোয়ে। ইয়াৰপাছতেই সামাজিকমাধ্যমত উপহাৰ দিয়াৰ ভিডিঅ’ও পোষ্ট কৰিছে জেকবে। জেকবে এই পোষ্টৰ কেপশ্ব্যনত লিখিছে, ‘কাষতেই আছিলো। সেয়ে ভাৱিলো নিজৰ হাতেৰেই ক্ৰিষ্টিয়ানোৰ হাতত এই ঘড়ী তুলি দিলো।’ ভিডিঅ’ত দেখা গৈছে ৰোনাল্ডোৰ হাতত টুইন টাৰ্বো ফিউৰিয়াছ ঘড়ীটো জেকবে ৰোনাল্ডোৰ হাতত পিন্ধাই দিছে। তাৰপিছতেই ৰোনাল্ডোক কৰমৰ্দন কৰিছে। পৰ্তুগালৰ ফুটবলাৰ ৰোনাল্ডোয়ে তেওঁৰ প্ৰেয়সী জৰ্জিনা ৰডৰিগৰ সৈতে এখন ছবিও পোষ্ট কৰিছে জেকবে। ২০১৬ চনৰ প্ৰথমেই এই টুইন টাৰ্বো ঘড়ী তৈয়াৰ কৰিছে জেকব এণ্ড কোম্পানীয়ে। এই ঘড়ীত আছে তিনি কাঁটা বিশিষ্ট টাৰ্বুলিয়ন। ইয়াৰ সৈতে আছে মিনিট ৰিপিটাৰ, যি প্ৰতি ঘণ্টাত আনকি গ্ৰাহকে বিচাৰিলে প্ৰতি মিনিটত সময়ৰ কথা সোঁৱৰাই থাকিব গ্ৰাহকে।
২০১৮ চনত সেই ‘টুইন টাৰ্বো’ ঘড়ীক আধুনিক ৰূপ দিয়া হৈছে। তৈয়াৰ কৰা হৈছে ‘টুইন টাৰ্বো ফিউৰিয়াছ’। দুটা অঞ্চলৰ সময়ৰ কথাও বুজাই দিব পাৰে এই ঘড়ীয়ে। ৰোনাল্ডোক যি ঘড়ী উপহাৰ দিয়া হৈছে তাৰ সকলোবোৰ যন্ত্ৰই হাতেৰে তৈয়াৰ কৰা হৈছে। হাতেৰেই এই ঘড়ীৰ ডিজাইনো কৰা হৈছে। ৮৩২টা উপাদান আছে এই ঘড়ীত। অথচ ওজন মাত্ৰ ১.১৫ গ্ৰাম। এই ঘড়ীৰ বিশেষত্ব এয়াই যে ঘড়ীৰ ৫৭ মিলিঃমিটাৰ কেছ ১৮ কেৰেট সোনেৰে তৈয়াৰ কৰা হৈছে। তাতেই বহুওৱা হৈছে ৩৪৪টুকুৰা হীৰা। ৫০ ঘণ্টা ধৰি চলি থাকিব পৰা শক্তি সঞ্চয় কৰি ৰাখিব পাৰে এই ঘড়ীয়ে। এই ঘড়ী বৰ্তমানলৈ ১৮ টাহে তৈয়াৰ কৰা হৈছে। তাৰ মাজৰেই এটা ৰোনাল্ডোক উপহাৰ দিছে নিৰ্মাতাই।
পূৰ্বে হীৰাৰ গহনা তৈয়াৰ কৰিছিল জেকব আৰাবোয়ে। ১৯৮৬ চনত নিউৱৰ্কৰ মেনহাটনত প্ৰথম হীৰাৰ গহনাৰ দোকানো খুলিছিল। ক্ৰমে জনপ্ৰিয় হৈ উঠে তেওঁৰ এই গহনা। ২০০২ চনৰ পৰা জেকবে ঘড়ীৰ নক্সা তৈয়াৰ কৰিবলৈ আৰম্ভ কৰে। তেওঁৰ সংস্থাই নিৰ্মাণ কৰা ঘড়ীত ৫খন দেশৰ সময় চাব পাৰিব। তেঁওৰ ঘড়ীয়ে তৈয়াৰৰ পাছতেই মাৰ্কেটো দখল কৰিবলৈ আৰম্ভ কৰিলে। নাওমি কেম্পবেলৰ দৰে খ্যাতনামা লোকেও এই কোম্পানীৰ ঘড়ী ক্ৰয় কৰিবলৈ আৰম্ভ কৰিলে। এইবাৰৰ লেটেষ্ট ভাৰ্ছনো জেকবে ৰোনাল্ডোৰ হাতত নিজেই পিন্ধাই একপ্ৰকাৰে বিজ্ঞাপনেই দিছে। ঘড়ীৰ চখ থকা ব্যক্তিকেই এই ঘড়ী পিন্ধাবৰ বাবে জেকবে বাচি লোৱাটোও এক ব্যৱসায়িক পলিচী বুলিয়েই বহুজনে উল্লেখ কৰিছে।
উল্লেখ্য যে, বিশ্বৰ ক্ৰীড়াবিদসকলৰ ভিতৰত আয়ৰ নিৰিখত ওপৰৰ পৰা ৩৮ নম্বৰত আছে ৰোনাল্ডো। পৰিসংখ্যাই প্ৰকাশ কৰা অনুসৰি, বাৰ্ষিক তেওঁ আয় কৰে ১৭ কোটি ৫০ লাখ পাউণ্ড। ভাৰতীয় মুদ্ৰাত প্ৰায় ১৭৮০ কোটি টকা। পাঁচবাৰকৈ ফুটবলৰ শ্ৰেষ্ঠ পুৰস্কাৰ বেলন ডিঅ’ৰ তেওঁৰ হাতলৈকে আহিছে। বিগত জানুৱাৰী মাহত ছৌদি আৰৱৰ আল নাছাৰ ক্লাবত যোগ দিছে তেওঁ। তেওঁক স্বাগত জনাই এই ঘড়ী তেওঁক উপহাৰ দিয়া বুলি উল্লেখ কৰিছে জেকবে। সেই ঘড়ীৰ দাম হৈছে ৬লাখ ৩০হাজাৰ ইউৰো। ভাৰতীয় মুদ্ৰাত প্ৰায় ৫কোটি ৬০লাখ টকা। সেই ঘড়ীত বহোওৱা হৈছে ৩৩৮টা পান্না। ছৌদীৰ পতাকাৰ ৰং সেউজীয়া। ঘড়ীৰ ষ্ট্ৰেপৰ ৰং সেউজীয়া ৰাখিছে নিৰ্মাণকৰ্তাই। এই অসংখ্য দামী সংস্থাৰ ঘড়ী ৰোনাল্ডোৰ হাতত আছে। পৃথিৱীৰ প্ৰায় সকলোবোৰ দামী ঘড়ীয়েই ৰোনাল্ডোৰ কালেকছনত আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
