অসম লাইভ২৪ঃ এইবাৰ বদলা লোৱাৰ পূৰ্ণ সুযোগ। ২০ বছৰ পূৰ্বে অৰ্থাৎ ২০০৩ চনত অষ্ট্ৰেলিয়াক হৰুৱাই বিশ্বকাপ জয় কৰিব নোৱাৰিলে ভাৰতে। কোচ দ্ৰাবিড়ৰ সন্মুখত এইবাৰ সুযোগে অপেক্ষা কৰিছে। দেওবাৰে আহমেদাবাদত ভাৰতে যদি বিশ্বকাপ জয় কৰিব পাৰে তেন্তে দ্ৰাবিড়ৰ ওচৰত এয়াই হ’ব সুমধুৰ প্ৰতিশোধ। ২৯ বছৰ পূৰ্বৰ জোহেনেছবাৰ্গৰ সেই বিশেষ নিশাটোৰ কথা দ্ৰাবিড়ে জানো পাহৰিব পাৰিছে? সৌৰৱ গাংগুলীৰ অধিনায়কত্বত অষ্ট্ৰেলিয়াৰ সৈতে মুখামুখি হওঁতে ৰিকি পণ্টিঙে অকলেই হৰুৱাই পঠিয়াইছিল ভাৰতীয় দলটোক।
টি-২০ ক্ৰিকেটৰ জন্মৰ পূৰ্বে পণ্টিঙৰ সেই ১২১ বলত ১৪০ৰানৰ অপৰাজিত ইনিংছৰ কথা ক্ৰিকেট অনুৰাগীয়ে কেনেকৈ পাহৰিব! সেইদিনা পণ্টিঙে যেতিয়া এটাৰ পাছত আনটো ছিক্স কোবাইছিল তেতিয়া দ্ৰাবিড় উইকেটৰ পাছতেই থিয় হৈ আছিল। ভাৰতীয় দলৰ উইকেটৰক্ষকৰ দায়িত্বত আছিল ৰাহুল দ্ৰাবিড়। এইবাৰৰ বিশ্বকাপত লোকেশ ৰাহুলক উইকেটৰক্ষকৰ দায়িত্ব দিয়া হৈছে। বিশ্বকাপত দ্ৰাবিড়ে খেলুৱৈ হিচাপেও খেলিছে, অধিনায়ক হিচাপেও খেলিছে। এইবাৰৰ বিশ্বকাপত তেওঁ কোচ হিচাপে আছে। বহুকেইটা দায়িত্ব ল’লেও এই পৰ্যন্ত ট্ৰফী হাতত তুলি ল’ব নোৱাৰিলে ৰাহুল দ্ৰাবিড়ে। এইবাৰেই আশাৰ কিৰণ আছে। বহুতেই কৈছে এইবাৰ বিশ্বকাপ জয় কৰিব নোৱাৰিলে ভাৰতে আৰু পাছলৈ কেতিয়া বিশ্বকাপ জয় কৰিব সেই কথা কোনোৱেই ক’ব নোৱাৰে। সেয়ে এইবাৰ সকলোপ্ৰকাৰেই ভাৰতীয় দল সাজু হৈছে। দ্ৰাবিড়ৰ কান্ধতো আছে বিশেষ দায়িত্ব। ২২ গজত নামি বেটিং নকৰিলেও এজন কোচ হিচাপে প্ৰতিজন খেলুৱৈকে তেওঁ পৰিচালনা কৰি আছে। দ্ৰাবিড়ৰ আশা ৰোহিত শৰ্মা, বিৰাট কোহলি, মহম্মদ ছামিৰ হাতত ধৰিয়েই সপোন দেখিছে দ্ৰাবিড়ে।
২০০৩ ৰ বিশ্বকাপত ভাৰতে ৮খন মেচ জিকিছিল। সেইবাৰৰ ফাইনেলত প্ৰথমে বেট ধৰি ৩৫৯ ৰান লৈছিল অষ্ট্ৰেলিয়াই। ভাৰতীয় সমৰ্থকে এতিয়াও পাহৰিব পৰা নাই ৪৮টা বলত ৫৭ ৰান কৰা এডাম গিলখ্ৰীষ্টক। মেথিও হেডেনক সংগী কৰি ১০৫ ৰানৰ যুঁটি গঢ়িছিল মাত্ৰ ১৪ অভাৰত। ২০ বছৰ পূৰ্বেই এই ৰেকৰ্ড গঢ়ি থোৱা অষ্ট্ৰেলিয়াৰ দলৰ সৈতে আকৌ মুখামুখি হ’ব ভাৰত। ২০ বছৰ পূৰ্বে কেংগাৰু বাহিনীৰ সৈতে পণ্টিঙে যি ইনিংছ খেলিছিল সেই খেলো চাবলগীয়া। সেইবাৰ পণ্টিঙৰ বিস্ফোৰক বেটিং প্ৰতিৰোধ কৰিবলৈ ৮জন ভাৰতীয় বলাৰ নমাইয়ো ভাৰতে বিজয় সাব্যস্ত কৰিব নোৱৰিলে।
সেইবাৰ অষ্ট্ৰেলিয়াৰ বিৰুদ্ধে বেটিং কৰাৰ সময়ত মাত্ৰ ৪ৰান কৰিয়েই আউট হৈছিল শচীন তেণ্ডুলকাৰ। ভাৰতীয় সমৰ্থকে ক্ৰিকেটৰ ঈশ্বৰেই ৪ৰান কৰি আউট হোৱা দেখি পৰাজয়ৰ পূৰ্বে স্বীকাৰ কৰি লৈছিল পৰাজয়। ৰাহুল দ্ৰাবিড়ে ৫৭বলত ৪৭ ৰান কৰি আউট হয়। সেইবাৰ ১২৫ ৰানত ভাৰত পৰাস্ত হৈছিল কেংগাৰুবাহিনীৰ হাতত।
এইবাৰ ভাৰতীয় দলৰ ১৫জন সদস্যৰ ভিতৰত বিৰাট কোহলী আৰু ৰবিচন্দ্ৰন আশ্বিনে ২০১১ চনত বিশ্বকাপ খেলিছিল। সেইবাৰৰ বিশ্বকাপত ভাৰত জয়ীও হৈছিল। এইবাৰ ২০১১ ৰ পুনৰাবৃত্তিৰ আশা কৰিছে ৰাহুল দ্ৰাবিড়ে। দ্ৰাবিড় ক্ৰিকেট বিশ্বৰ এনে এজন মানুহ যিয়ে প্ৰত্যেকবাৰেই বিজয়ৰ মুখামুখি হৈয়ো বাৰে বাৰে থমকি ৰয়। দ্ৰাবিড়ৰ বিশ্বকাপত অভিষেক ঘটিছিল লৰ্ডছত। সেইবাবেই বিশ্বকাপত অভিষেক ঘটিছিল সৌৰভ গাংগুলীৰো। একেলগে অভিষেক ঘটা গাংগুলিয়ে শতৰাণৰ ৰেকৰ্ডো গঢ়িছিল কিন্তু ৯৫ ৰানত থমকি ৰৈছিল দ্ৰাবিড়। মাত্ৰ ৫ ৰানৰ বাবেই থমকিব শতৰানৰ ৰেকৰ্ড দ্ৰাবিড়ৰ কেৰিয়াৰত নাহিল। অধিনায়কৰ দায়িত্বও তেওঁ লাভ নকৰিলে। তেঁওৰ সৈতে একেলগে ২২ গজত নমা সৌৰভে অধিনায়কৰ দায়িত্ব লাভ কৰে। বিশ্বকাপত নেতৃত্ব দি সৌৰভে যেতিয়া ২০০৭ চনত ফাইনেলত অৱতীৰ্ণ হৈছিল সেইবাৰো ভাৰতে ফাইনেলৰ পৰা শোচনীয়ভাৱেই বিদায় ল’ব লগা হৈছিল। বিফল হ’লেও দ্ৰাবিড় লেখত ল’বলগীয়া খেলুৱৈ। তেওঁ ফিল্ডত নমা মানেই ভাৰতীয় দলৰ সাহস বঢ়া। তেওঁ মেচত নমা মানেই ক্লান্তিহীন বেটিং। এইবাৰ ৰাহুলে কোচৰ দায়িত্ব লাভ কৰি তেওঁৰ সফলতা, বিফলতাৰ কথাবোৰ বিৰাটহঁতৰ সৈতে ভগাই লৈছে।
তেওঁৰ ক্ৰিকেট কেৰিয়াৰৰ সকলোবোৰ কথা তৰুণ ক্ৰিকেটাৰসকলৰ সৈতে ভগাই লৈছে। অনূৰ্ধ্ব-১৯দল, জাতীয় ক্ৰিকেট একাডেমীৰ দায়িত্ব সম্ভালি থকা এই সকলোবোৰতেই দ্ৰাবিড়ৰ নিপুন দক্ষতা। তেওঁৰ দক্ষতাৰ প্ৰমাণ ভাৰতীয় ক্ৰিকেট দলে পাইছে। ভাৰতীয় প্ৰতিজন ক্ৰিকেট অনুৰাগীয়েই ১২ বছৰ ধৰি অপেক্ষা কৰি আছে। বিশ্বকাপৰ ট্ৰফী ভাৰতীয় দলৰ হাতত দেখাৰ আশা প্ৰতিজন ক্ৰিকেট অনুৰাগীৰেই। এই অপেক্ষা অনুৰাগীৰ যিমান তাতোকৈ কেইবা শতাংশই বেছি দ্ৰাবিড়ৰ। ২০ৰ পূৰ্বৰ সেই বিফলতাক ঠেলি জয়ৰ আশা কৰিছে দ্ৰাবিড়েও। ১৯ নৱেম্বৰতেই সেই আশা, সেই উৎকণ্ঠাৰ অৱসান ঘটিব। এজন ভাৰতীয় হিচাপে আপোনাৰ মোৰ দৰে ১৪০ কোটি ভাৰতীয়ৰেই আশা, এইবাৰ বিশ্বকাপ আমাৰ হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
