অসম লাইভ ২৪ঃ ক’ৰোনাক বহুতে বেমাৰতকৈও পয়মাল বুলিহে ভাবিবলৈ লৈছে। পজিটিভ মানেই কোৱাৰেণ্টীন, চিকিৎসাধীন, পুনৰ কোৱাৰেণ্টীন, পৰিয়ালৰ কোৱাৰেণ্টীন, চুবুৰীয়াৰ কোৱাৰেণ্টীন আৰু যে ক’ত কি! কেতিয়াবা ক’ৰোনা নিগেটিভ লোকো কৰ্তৃপক্ষৰ ভুলত হাস্পতাল পাবগৈলগা হৈছে। পৰিণতিত পৰিয়ালৰ পৰা চুবুৰীয়ালৈকে সকলোৰে পয়মাল হৈছে। কোভিড-১৯ পৰীক্ষণৰ পাছত এজন যুৱকক হাস্পতালত ভৰ্তি কৰায় কৰ্তৃপক্ষই। ১৭ দিন হাস্পতালত চিকিৎসাধীন হ’ল যুৱকজন। তাৰ পাছতহে তেওঁৰ প্ৰথম কোভিড টেষ্টৰ ৰিপ’ৰ্টৰ অৰ্থ ভাঙিলে চিকিৎসকে। যুৱকজনৰ শৰীৰত নাই কোভিড-১৯ৰ কোনো লক্ষণ। ইতিমধ্যে যুৱকজন ১৭ দিন হাস্পতালৰ ক’ৰোনা ৱাৰ্ডত চিকিৎসাধীন হৈ থাকিল। এই ঘটনা সংঘটিত হৈছে গোৰখপুৰত। BRD মেডিকেল কলেজত ভৰ্তি হৈ থাকিবলগা হ’ল সুনীল কুমাৰ গুপ্তা নামৰ যুৱকজন। যুৱকজনৰ পত্নী আৰু সন্তানকো কোভিড টেষ্ট কৰা হৈছিল যদিও তেওঁলোক দুয়োৰে ৰিপ’ৰ্ট নিগেটিভ আহিছিল। ৩০ জুনত চিকিৎসাকৰ্মীয়ে যুৱকজনক এম্বুলেন্সেৰে লৈ যায় চিকিৎসালয়লৈ। সেই এম্বুলেন্সখনত যুৱকজনক লৈ যোৱাৰ সময়ত আছিল আন দুজন ক’ৰোনা ৰোগী। এম্বুলেন্সত থকা আন দুজন ৰোগীক ৰে’লৱে হাস্পতালত থৈ সুনীল গুপ্তাক লৈ গৈছিল BRD মেডিকেল কলেজলৈ আৰু ৩নং কোভিড ৱাৰ্ডৰ ১০নং বেডত ভৰ্তি কৰে যুৱকজনক। হাস্পতালত থকা সময়ত হঠাৎ তেওঁৰ গা বেয়া হোৱাত ICUলৈ প্ৰেৰণ কৰে আৰু ICUত ৩ দিন ভেণ্টিলেটৰত ৰাখে। ১২ জুলাইত তেওঁৰ পুনৰ ছেম্পল লোৱা হয়। কিন্তু সেই ৰিপ’ৰ্ট চিকিৎসকে নজনালে সুনীল গুপ্তাক। ১৭ জুলাইত পুনৰ ক’ৰোনা পৰীক্ষা কৰা হয় যুৱকজনৰ আৰু তেওঁক কোভিড নিগেটিভ বুলি চিকিৎসকে কয়। ১৩ জুলাইত সুনীল গুপ্তাই লাভ কৰে পূৰ্বে টেষ্ট কৰা ৰিপ’ৰ্ট। সেই ৰিপ’ৰ্ট দেখিহে তেওঁ গম পালে যে কোভিড পজিটিভ নোহোৱাকৈ তেওঁক কোভিড ৱাৰ্ডত চিকিৎসা কৰা হৈছিল। আনকি সংক্ৰমিতৰ তালিকাতো সুনীল গুপ্তাৰ নাম নাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
