অসম লাইভ ২৪ঃ দেশত গো-মূত্ৰক লৈ প্ৰায়ে বিতর্ক চলি থাকে। একাংশই গো-মূত্ৰক প্ৰাকৃতিক ঔষধৰূপে ব্যৱহাৰ কৰে যদিও আন একাংশই ইয়াক একো বুলি বিবেচনা নকৰে। কিন্তু মধ্যপ্ৰদেশৰ শিৱৰাজ চৌহান চৰকাৰে গৰু সম্পর্কিত নানান সিদ্ধান্ত গ্ৰহণ কৰি আহিছে, কেতিয়াবা যদি গো-কেবিনেট কেতিয়াবা অন্য আইন। কিন্তু এইবাৰ মধ্যপ্ৰদেশ চৰকাৰে এনে এক আদেশ দিছে, যাৰ দ্বাৰা ছ’চিয়েল মিডিয়াত তীব্ৰ সমালোচনাৰ সন্মুখীন হৈছে চৌহান চৰকাৰ। এইবাৰ মধ্যপ্ৰদেশ চৰকাৰে সকলো চৰকাৰী কার্যলায়ৰ চাফ-চিকুণ গো-মূত্ৰৰ দ্বাৰা তৈয়াৰী ফেইনালেৰে কৰাৰ আদেশ দিছে। ৰাজ্যখনৰ জেনেৰেল এডিমিনিষ্ট্ৰেচন বিভাগৰ এক আদেশত কোৱা হৈছে যে এতিয়াৰে পৰা সকলো চৰকাৰী কার্যালয়ৰ চাফ-চিকুণ কেমিকেলযুক্ত ফেইনালেৰে কৰা নহ’ব, তাৰ ঠাইত গো-মূত্ৰৰে তৈয়াৰী ফেইনালেৰেহে কৰা হ’ব। ৰাজ্যখনৰ পশুপালন মন্ত্ৰী প্ৰেম সিং পেটেলে চৰকাৰৰ এই সিদ্ধান্তক স্বাগতম জনাই কয় যে ইয়াৰ দ্বাৰা জনতাই গো-মূত্ৰ ফেইনালৰ ফেক্টৰী খোলাৰ বাবে উৎসাহিত হ’ব। এতিয়া লোকসকলে গাখীৰ দিবলৈ এৰাই গৰুকো পথত ঘূৰি-ফুৰিবলৈ এৰি নিদিব। ইয়াৰ জৰিয়তে মধ্যপ্ৰদেশৰ গৰুৰ অৱস্থা উন্নত হ’ব। শিৱৰাজ চৰকাৰৰ এই আদেশৰ পাছত তীব্ৰ চর্চা হৈছে ছ’চিয়েল মিডিয়াত। চৰকাৰ এই সিদ্ধান্তক একাংশই সমর্থন কৰিছে আৰু একাংশই কৰিছে তীব্ৰ বিৰোধিতা। বিশিষ্ট অধিবক্তা প্ৰশান্ত ভূষণে এক টুইটত শিৱৰাজ চৰকাৰক ‘গো-মূত্ৰ চৰকাৰ’ বুলিও উল্লেখ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
