অসম লাইভ ২৪ঃ এখন ভাইৰেল ফটোৱে তোলপাৰ লগাইছে দেশত। ফটোখনত দেখা গৈছে এখন বেডত দুজন ক’ৰোনা ৰোগী। ঘটনা নাগপুৰৰ গৱর্ণমেণ্ট মেডিকেল কলেজ হাস্পতাল (GMCH)ৰ। মহাৰাষ্ট্ৰত ক’ৰোনাৰ দ্বিতীয় তৰংগই ভয়াৱহ ৰূপ লোৱাৰ সময়তে ভিৰ বাঢ়িছে হাস্পতালসমূহত। তেনে সময়তে এখন বিছনাত দুজন ক’ৰোনা ৰোগী ৰখা ফটোখনে উদঙাইছে স্বাস্থ্য সেৱাৰ পঁয়ালগা ৰূপ। হাস্পতালখনত বেছিভাগ বিছনাতে দুজনকৈ ক’ভিড পজিটিভ ৰোগীক ৰখা হৈছে। হাস্পতাল কর্তৃপক্ষৰ মতে বেচৰকাৰী হাস্পতালৰ তুলনাত খৰচ কম হোৱাৰ কাৰণে আৰু GMCH লৈ গুৰুতৰ ৰোগী ৰেফাৰ কৰাৰ বাবে হাস্পতালখনত ভিৰ বাঢ়িছে। পৰিণতিত এখন বেডত দুজন ৰোগী ৰাখিবলগীয়া পৰিস্থিতিৰ সৃষ্টি হৈছে। কিন্তু হাস্পতালৰ শীর্ষ বিষয়াই জনোৱা অনুসৰি বর্তমান এখন বেডত দুজন ৰোগী ৰখা ব্যৱস্থা সংশোধন কৰা হৈছে। GMCHৰ অধীক্ষক অবিনাশ গাভাণ্ডেৰে কয়— ‘প্ৰ’টকল অনুসৰি কেৱলমাত্ৰ ছেভিয়াৰ ক’ভিড-১৯ ৰোগী আৰু চহৰৰ বাহিৰৰ পৰা অহা গুৰুতৰ অসুস্থ ৰোগীকহে হাস্পতালত ভর্তি কৰা হৈছে।’ তেওঁ আৰু কয় যে GMCHত কামৰ চাপ যথেষ্ট বেছি। আমি বিছনাৰ সংখ্যা বঢ়াইছো। পৰিস্থিতি এতিয়া স্বাভাৱিক আৰু বর্তমান এখন বিছনাত এজন ক’ভিড ৰোগী ৰখা হৈছে। উল্লেখ্য যে নাগপুৰত সোমবাৰে ৩,১০০ নতুন ক’ৰোনা ৰোগী ধৰা পৰিছে আৰু ৫৫ গৰাকী ক’ভিড ৰোগীৰ মৃত্যু হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
