কা-বিৰোধী আন্দোলনৰ সময়ত দেশদ্ৰোহী আৰু উচতনিমূলক ভাষণ প্ৰদান কৰাৰ অভিযোগত জৱাহৰলাল নেহৰু বিশ্ববিদ্যালয়ৰ ছাত্ৰ চাৰ্জিল ইমামৰ বিৰুদ্ধে দেশদ্ৰোহিতাৰ চাৰ্জফ্ৰেম কৰা হৈছে৷
সোমবাৰে দিল্লীৰ এখন আদালতে জেএনইউৰ ছাত্ৰ চাৰ্জিল ইমামৰ বিৰুদ্ধে দেশদ্ৰোহিতাৰ গোচৰত চাৰ্জফ্ৰেম কৰিছে৷
নাগৰিকত্ব সংশোধনী আইন-২০১৯ৰ বিৰোধিতাৰে দিল্লীৰ জামিয়া অঞ্চল আৰু আলিগড় মুছলিম বিশ্ববিদ্যালয়ত হোৱা আন্দোলনত জেএনইউৰ ছাত্ৰ চাৰ্জিল ইমামে দেশৰ বিৰোধী উচতনিমূলক ভাষণ প্ৰদান কৰিছিল বুলি অভিযোগ উত্থাপন কৰা হৈছিল৷
সোমবাৰে দিল্লীৰ এখন আদালতৰ অতিৰিক্ত সত্ৰ ন্যায়াধীশ অমিতাভ ৰাৱটে ভাৰতীয় দণ্ডবিধি আইনৰ ধাৰা ১২৪এ (দেশদ্ৰোহিতা), ১৫৩এ (ভিন্ন ধৰ্মীয় গোটৰ মাজত শত্ৰুতাৰ বৃ্দ্ধি), ১৫৩বি (ৰাষ্ট্ৰীয় অখণ্ডতা বিৰোধী), ৫০৫ (ৰাজহুৱা ক্ষতিৰ বাবে উচতনিমূলক ভাষণ) আৰু UAPA অধীনত চাৰ্জিল ইমামক অভিযুক্ত কৰিছে৷
উল্লেখ্য যে ২০১৯ চনৰ ১৩ ডিচেম্বৰত জামিয়া অঞ্চলৰ কা বিৰোধী আন্দোলনত ইমামে প্ৰদান কৰা উক্ত ভাষণৰ বিৰুদ্ধে ২০২০ চনৰ ২৫ ফেব্ৰুৱাৰীত ভাৰতীয় দণ্ডবিধি আইনৰ ১২৪(এ), ১৫৪এ, ৫০৫ অধীনত গোচৰ ৰুজু কৰা হৈছিল৷
ইয়াৰ পিছতে চৰকাৰ তথা দিল্লী আৰক্ষীয়ে চাৰ্জিল ইমামৰ বিৰুদ্ধে দেশদ্ৰোহিতাৰ দৰে ভয়ংকৰ অভিযোগ উত্থাপন কৰি গ্ৰেপ্তাৰ কৰিছিল৷
ইমামৰ উক্ত আপত্তিজনক ভাষণটোৰ লগতে আলিগড় মুছলিম বিশ্ববিদ্যালয়ৰ ভাষণটোও টুইটাৰসহ বিভিন্ন সামাজিক মাধ্যমত প্ৰচাৰ কৰা হৈছিল বুলিও অভিযোগ উত্থাপন হৈছিল৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
