অসম লাইভ ২৪ঃ এগৰাকী বা দুগৰাকীকৈ নহয়, প্ৰায় ১০৪ ৰপৰা ১৩৫ গৰাকী পাক সন্ত্ৰাসবাদীয়ে সীমান্ত পাৰ হ’বলৈ নিয়ন্ত্ৰণ ৰেখাত খাপ পিটি ৰৈ আছে৷ এই ভয়ংকৰ তথ্য প্ৰকাশ কৰিছে সীমান্ত সুৰক্ষা বাহিনীৰ মহাপৰিদৰ্শক প্ৰধান ৰাজা বাবু সিঙে৷
সোমবাৰে চোৰাংচোৱাৰ উদ্ধৃতিৰে বিএছএফৰ মহাপৰিদৰ্শক গৰাকীয়ে কয় যে পাক-ভাৰত সীমান্তৰ নিয়ন্ত্ৰণ ৰেখাৰ সিটো পাৰে প্ৰায় ১৩৫ গৰাকী সন্ত্ৰাসবাদীয়ে ভাৰতত প্ৰৱেশ কৰি কূটাঘাট সংঘটিত কৰিবলৈ ৰৈ আছে৷
‘‘কিছুমান সন্ত্ৰাসবাদীয়ে ভাৰতত অনুপ্ৰৱেশ কৰিবলৈ এলঅ’চি সিটো পাৰে ৰৈ আছে৷ তেওঁলোকৰ গতিবিধি নিৰাপত্তা সংস্থাসমূহে নিৰন্তৰ নিৰীক্ষণ কৰি আছে৷’’ কাশ্মীৰৰ শ্ৰীনগৰ উপতকণ্ঠ হুমহামাত অৱস্থিত বিএছএফৰ মুখ্য কাৰ্যালয়ৰ বাৰ্ষিক সন্মিলনত ভাষণ দি আইজি সিঙে কয়৷
আইজি সিঙৰ মতে যে চোৰাংচোৱাৰ তথ্য অনুসৰি সন্ত্ৰাসবাদীৰ এই সংখ্যাটো ১০৪ ৰপৰা ১৩৫ গৰাকী হ’ব৷
কাশ্মীৰৰ নিয়ন্ত্ৰণ ৰেখাৰ প্ৰায় ৯৬ কিলোমিটাৰ দৈৰ্ঘ্যৰ সীমান্তত পাক সন্ত্ৰাসবাদীয়ে ড্ৰ’ণেৰে আক্ৰমণ কৰাৰ চেষ্টা কৰাতো সঁচা বুলিও প্ৰকাশ কৰিছে বিষয়াগৰাকীয়ে৷
আমি ড্ৰ’ণেৰে প্ৰত্যাক্ৰমণ কৰিবলৈ সাজু হৈ আছো বুলি কৈ ৰাজা বাবু সিঙে লগতে কয় যে বিগত বৰ্ষটোত বিএছএফে নিয়ন্ত্ৰণ ৰেখাৰ পৰা ৮৮ কোটি টকাৰ মূল্যৰ ১৭.৩ কিলোগ্ৰাম হিৰ’ইন জব্দ কৰিছে৷
বিষয়াগৰাকীৰ মতে তালিবানে আফগানিস্তান দখল কৰিলেও কাশ্মীৰ উপত্যকাত ইয়াৰ কোনো প্ৰভাৱ পৰা নাই৷ অৱশ্যে কোনো প্ৰভাৱ নপৰিলেও নিৰাপত্তা সংস্থাসমূহ এই বিষয়টোত সতৰ্ক হৈ আছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
