সকলো কৌতুহলৰ অন্ত, আতিশীয়ে হ’ব দিল্লীৰ পৰৱৰ্তী মুখ্যমন্ত্ৰী
সকলো কৌতুহলৰ অন্ত পৰিল। অৱশেষত ঘোষণা হ’ল নাম । আতিশী হ’ব দিল্লীৰ পৰৱৰ্তী মুখ্যমন্ত্ৰী। আম আদমি পাৰ্টিৰ বিধায়িনী দলৰ বৈঠকত মুখ্যমন্ত্ৰী অৰবিন্দ কেজৰিৱালে আতিশীৰ নাম প্ৰস্তাৱ কৰে। এই কথাত সন্মতি প্ৰকাশ কৰে দলৰ বিধায়কসকলেও।
ইয়াৰ পূৰ্বে আম আদমী পাৰ্টিৰ ৰাজনৈতিক পৰিক্ৰমা সমিতিৰ নেতাসকলে আতিশীৰ নাম দিল্লীৰ পৰৱৰ্তী মুখ্যমন্ত্ৰী হিচাপে পৰামৰ্শ দিছিল ৷
উল্লেখ্য যে, অৰবিন্দ কেজৰিৱালে ১৫ ছেপ্টেম্বৰ দেওবাৰে মুখ্যমন্ত্ৰীৰ পদৰ পৰা পদত্যাগ কৰাৰ কথা ঘোষণা কৰিছিল। ইয়াৰ পিছত সন্ধিয়া লেফটেনেণ্ট গৱৰ্ণৰ বিনয় ছাক্সেনাক সাক্ষাৎ কৰি পদত্যাগ পত্ৰ দাখিল কৰিব।
দিল্লী আবকাৰী নীতিৰ গোচৰত ২১ মাৰ্চত ইডিয়ে গ্ৰেপ্তাৰ কৰিছিল অৰবিন্দ কেজৰিৱালক। ইয়াৰ পিছতে তেওঁক চিবিআইয়ে গ্ৰেপ্তাৰ কৰে। চিবিআই গোচৰত ১৩ ছেপ্টেম্বৰত উচ্চতম ন্যায়ালয়ৰ পৰা জামিন লাভ কৰিছিল। ইডি গোচৰত তেওঁ ইতিমধ্যে জামিন লাভ কৰিছিল। ১৩ ছেপ্টেম্বৰতহে তেওঁ তিহাৰ জেলৰ পৰা ওলাই আহিছিল।
ইয়াৰ পিছত দেওবাৰে আপ কৰ্মীক সম্বোধন কৰি পদত্যাগ ঘোষণা কৰে। তেওঁ কয় যে মই লিটমাছ টেষ্ট দিব বিচাৰো। লগতে ইয়াকো কৈছিল যে, “যেতিয়ালৈকে মানুহে তেওঁক সততাৰ প্ৰমাণ পত্ৰ নিদিয়ে, তেতিয়ালৈকে তেওঁ মুখ্যমন্ত্ৰীৰ চকীত বহিব নোৱাৰে।”
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
