স্কুলৰ পাঠ্যপুথিত এইবাৰ স্থান পাব কেন্দ্ৰীয় গৃহমন্ত্ৰী অমিত শ্বাহে৷ স্কুলীয়া ছাত্ৰ ছাত্ৰীৰ হাতত তুলি দিয়া হ’ব পাৰে তেওঁৰ ৰাজনৈতিক জীৱনত আখ্যান৷ কেন্দ্ৰীয় চৰকাৰৰ তৰফৰ পৰা এই অনুৰোধ পঠিওৱা হৈছে National Council of Educational Research and Training (NCERT)-ক৷ শ্বাহৰ ফেন ক্লাবৰ তৰফৰ পৰা এই অনুৰোধ অহা বুলি জনাইছে কেন্দ্ৰই৷
স্কুলৰ পাঠ্যপুথি তৈয়াৰৰ ক্ষেত্ৰত চূড়ান্ত সিদ্ধান্ত লয় NCERTয়ে৷ শ্বাহৰ ৰাজনৈতিক জীৱনী স্কুলীয়া ছাত্ৰই পঢ়িব পৰাকৈ চপা কৰিবলৈ সেই সিদ্ধান্ত সম্পূৰ্ণ তেওঁলোকৰ৷ সেয়ে NCERTক অনুৰোধ জনাই পত্ৰ লিখিছে কেন্দ্ৰীয় শিক্ষা মন্ত্ৰণালয়ৰ স্কুলীয়া শিক্ষা আৰু সাক্ষৰতা বিভাগে৷ উত্তৰপ্ৰদেশৰ গোৰক্ষপুৰৰ ‘Amit Shah Youth Brigade’ নামৰ এক সংস্থাৰ প্ৰেছিডেণ্ট এছ কে শুক্লই সেই মৰ্মে পিটিছনো জনা দিছিল বুলি জনাইছে কেন্দ্ৰই৷ বিষয়টোক সেয়ে বিশেষভাৱে গুৰুত্ব দিছে কেন্দ্ৰই৷
২০১৪ চনত কেন্দ্ৰত নৰেন্দ্ৰ মোদী প্ৰধানমন্ত্ৰী নিৰ্বাচিত হোৱাৰ পাছতেই জাতীয় ৰাজনীতিত শ্বাহৰ অভূতপূৰ্ব উত্থানো ঘটিছে৷ এই মুহূৰ্তত দেশৰ দ্বিতীয় শক্তিশালী ৰাজনৈতিক নেতা হিচাপেও তেওঁক গণ্য কৰা হয়৷ আনকি বিজেপিৰ ভিতৰতো বহুতে তেওঁক মোদীৰ উত্তৰাধিকাৰী হিচাপেও গণ্য কৰে৷ উত্তৰপ্ৰদেশৰ মুখ্যমন্ত্ৰী যোগী আদিত্যনাথৰ সৈতে সেয়ে বিশেষ প্ৰতিযোগিতা আছে শ্বাহৰ৷ যোগীকো একাংশই মোদীৰ উত্তৰাধিকাৰীৰ দৃষ্টিৰে চাই বাবেই দুয়োৰে মাজত আছে এখন শীতল যুদ্ধও৷ কিন্তু তাৰমাজতো শ্বাহৰ ফেন ক্লাব পৰিচালিত হয় উত্তৰপ্ৰদেশৰ গোৰক্ষপুৰৰ পৰা৷ যোগীৰ ৰাজ্যৰ পৰাই পৰিচালিত হয় এই ফেন ক্লাব৷
সেই ফেন ক্লাবৰ অনুৰোধতেই শ্বাহৰ ৰাজনৈতিক জীৱনৰ আখ্যান স্কুলীয়া পাঠ্যপুথিত ৰখাক লৈ বিশেষ আবেদন পঠিওৱা হৈছে৷ এই বিষয়টো NCERTক বিবেচনা কৰিবলৈকো অনুৰোধ জনাইছে কেন্দ্ৰই৷ এই সমস্ত খবৰ প্ৰকাশ পাইছে The Telegraphত৷ The Telegraphত সাক্ষাৎকাৰ দিছে ফেন ক্লাবৰ প্ৰেছিডেণ্টে৷ তেওঁ The Telegraphক জনাইছে যে বিগত বছৰ ১৮ ডিচেম্বৰত কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানক চিঠি লিখি শ্বাহৰ ৰাজনৈতিক জীৱনৰ আখ্যান স্কুলৰ পাঠ্যপুথিত অন্তৰ্ভুক্ত কৰিবলৈ তেওঁ অনুৰোধ জনাইছিল৷
এই অনুৰোধক লৈ NCERT-য়ে কি সিদ্ধান্ত লয় সেয়া তেওঁলোকে স্পষ্টৰূপত বৰ্তমানো প্ৰকাশ কৰা নাই৷ অৱশ্যে সক্ৰিয় ৰাজনীতিত যুক্ত কোনো ব্যক্তিৰ জীৱন বৃত্তান্ত পাঠ্যপুথিত অন্তৰ্ভুক্ত কৰাৰ নজিৰ বৰ্তমানলৈকে NCERT-ত নাই৷ শ্বাহৰ জীৱনবৃত্তান্তও সেয়ে প্ৰকাশ পাবনে সেয়া এতিয়াও জানিব পৰা হোৱা নাই৷
উল্লেখযোগ্য যে শ্বাহৰ সেই ফেন ক্লাবৰ প্ৰেছিডেণ্টে পূৰ্বেই ‘Mansa Nagar Se Sansad Tak’ নামৰ এখন গ্ৰন্থ লিখিছে৷ তেওঁৰ দাবী শ্বাহৰ জীৱন, দেশৰ প্ৰতি তেওঁৰ অবদানৰ সকলো কথা ছাত্ৰ ছাত্ৰীয়ে জনা উচিত৷ দেশৰ বাবেই আত্মবিসৰ্জন দিছে অমিত শ্বাহে৷ ধনী পৰিয়ালত জন্ম হৈয়ো সমস্ত বিলাসিতা ত্যাগ কৰিছে অমিত শ্বাহে৷ যুৱসমাজৰ মাজলৈ তেওঁৰ সংঘৰ্ষৰ কাহিনী গৈ পোৱা উচিত৷ তেওঁক লৈ দেশৰ যুৱসমাজে গৱেষণা কৰা উচিত৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
