বৃহস্পতিবাৰে মাজনিশা ঠিক ১২.৩০ বজাৰ লগে লগেই অলিম্পিকৰ পিছতে বিশ্বৰ সৰ্ববৃহৎ ক্ৰীড়া সমাৰোহখনৰ আনুষ্ঠিকভাৱে আৰম্ভণি হ’ব। বিশ্বৰ আগশাৰীৰ ৪৮টা দলৰ ৭ শতাধিক শ্ৰেষ্ঠ খেলুৱৈৰ দুভৰিৰ যাদুত প্ৰাণ পাই উঠিব আমেৰিকা, মেক্সিকো আৰু কানাডাৰ ১৬খনকৈ ষ্টেডিয়ামৰ সেউজ ঘাঁহনি। ৩৯ দিনলৈ চলিব লগীয়া টুৰ্নামেণ্টখনত মুঠ ১০৪খন মেচ অনুষ্ঠিত হ’ব। ২০২৬ ফুটবল বিশ্বকাপৰ অইনবাৰতকৈ এইবাবেই বিশেষ যে এইবাৰ কেইবাগৰাকীও কিংবদন্তী ফুটবলাৰৰ বাবে এয়াই শেষৰটো বিশ্বকাপ। আৰ্জেণ্টিনাৰ লিঅনেল মেছি, পৰ্তুগালৰ ক্ৰিষ্টিয়ানো ৰোনাল্ডো, ক্ৰোৱেছিয়াৰ লুকা ম’দ্ৰিক আদিৰ দৰে খেলুৱৈক হয়টো আৰু বিশ্বকাপত দেখা নাযাব। কেৱল এয়াই নহয় আন এটা কাৰণতো এইবাৰৰ ফুটবল বিশ্বকাপ বিশেষ হিচাপে বিবেচিত হৈছে, সেয়া হৈছে বিজয়ী দলৰ প্ৰাইজমানী। বিগত বিশ্বকাপৰ তুলনাত এইবাৰ ৫০% বৃদ্ধি কৰা হৈছে দলসমূহৰ প্ৰাইজমানী।
ফুটবল বিশ্বকাপত কোন দলে কিমান ধনৰাশি পাব?
২০২৬ বিশ্বকাপত অংশগ্ৰহণ কৰা ৪৮টা দলৰ মাজত মুঠ ৮৭১ মিলিয়ন ডলাৰ অৰ্থাৎ ৮২৯৯ কোটি টকা বিতৰণ কৰা হ’ব। শুনি আচৰিত হ’ব যে টুৰ্নামেণ্টখনৰ অন্তিম স্থানত অৰ্থাৎ ৪৮সংখ্যক স্থানত থকা দলটোৱে লাভ কৰিব ২১.৫ মিলিয়ন ডলাৰ, যি T20 বিশ্বকাপৰ চেম্পিয়ন ভাৰতে লাভ কৰা ধনৰাশিতকৈ ৯ গুণ বেছি। T20 বিশ্বকাপৰ চেম্পিয়ন ভাৰতে লাভ কৰিছিল ২.৪৫ মিলিয়ন ডলাৰ। যি ভাৰতীয় টকাৰ হিচাপত আছিল প্ৰায় ২৪.২৮ কোটি টকা। টুৰ্নামেণ্টখনৰ চেম্পিয়ন দলটোৱে লাভ কৰিব ৫০ মিলিয়ন ডলাৰ যি ভাৰতীয় মূল্যৰ হিচাপত ৪৭৬ কোটি টকা, একেদৰে ৰানাৰ্ছ আপ দলটোৱে ৩৩ মিলিয়ন অৰ্থাৎ ৩১৪ কোটি টকা, তৃতীয় স্থানৰ দলটোৱে ২৯ মিলিয়ন অৰ্থাৎ ২৭৬ কোটি টকা, চতুৰ্থ স্থানত থকা দলটোৱে ২৭ মিলিয়ন ডলাৰ অৰ্থাৎ ২৫৭ কোটি টকা, পঞ্চমৰ পৰা অষ্টম স্থানত থকা দলকেইটাই ১৯ মিলিয়ন ডলাৰকৈ অৰ্থাৎ ১৮১ টকাকৈ লাভ কৰিব।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
