মানৱেন্দ্ৰ কুমাৰ দাসঃ ৰাজ্যৰ সাম্প্ৰতিক বান পৰিস্থিতিত ক্ষতিগ্ৰস্ত হৈছে ৫০ লক্ষাধিক লোক৷ এই তথ্য প্ৰকাশ কৰিছে খোদ ৰাজ্য চৰকাৰে৷
বানৰ ভয়াৱহতাৰ বাবে ক্ৰমাৎ যেন বিপৰ্যস্ত হৈ পৰিছে অসমৰ অৰ্থনৈতিক ব্যৱস্থা৷ ৫০ লাখ আক্ৰান্ত লোকক আৰ্থিক সাহায্য আগবঢ়াবলৈ সিদ্ধান্ত লৈছে ৰাজ্য চৰকাৰে৷
আশ্ৰয় শিবিৰত থকা প্ৰতিগৰাকীলৈ ৩,৮০০ টকা। পকীঘৰ ধ্বংস হোৱা পৰিয়াললৈ ৯৫ হাজাৰ টকা। কেঁচা ঘৰ ধ্বংস হোৱা পৰিয়াললৈ ৬,৫০০ টকা। ইমান বৃহৎ পৰিমাণৰ ধন আহিব ক’ৰপৰা?
মুখ্যমন্ত্ৰী ড০ হিমন্ত বিশ্ব শৰ্মাই ঘোষণা কৰা অনুসৰি প্ৰলয়ংকৰী বানৰ কবলত পৰি আশ্ৰয় শিবিৰত থকা প্ৰতিগৰাকী লোকে পাব ৩,৮০০ টকা৷
প্ৰলয়ংকৰী বানত যিসমূহ পৰিয়ালৰ পকীঘৰ ধ্বংস হৈছে তেওঁলোকে পাব ৯৫ হাজাৰকৈ টকা৷ একেদৰে কেঁচাঘৰ ধ্বংস হোৱা পৰিয়ালসমূহকো ৰাজ্য চৰকাৰে ৬,৫০০ টকাৰ সাহায্য প্ৰদান কৰিবলৈ সিদ্ধান্ত লৈছে৷
আৰু এই বৃহৎ পৰিমাণৰ ধনৰ জোৰা মাৰিবলৈ ৰাজ্য চৰকাৰে পুনৰ ঋণ ল’বলৈ সিদ্ধান্ত গ্ৰহণ কৰিছে৷ কি সেই সিদ্ধান্ত? দেশীয় উৎসৰ পৰা এহেজাৰ কোটিৰ ঋণ ল’ব চৰকাৰে।
৫ জুলাইত দাখিল কৰিব ঋণৰ প্ৰস্তাৱ। জুন মাহত ৰাজ্য চৰকাৰে লোৱা ঋণৰ পৰিমাণ ২,০০০ কোটি। ২১ জুনত অসম চৰকাৰে ঋণ লৈছে এহেজাৰ কোটি। ২৮ জুনত অসম চৰকাৰে ঋণ লৈছে এহেজাৰ কোটি।
যোৱা বিত্তীয় বৰ্ষত মুঠ ঋণৰ পৰিমাণ আছিল ১২ হাজাৰ কোটি। চলিত বিত্তীয় বৰ্ষত ঋণৰ পৰিমাণ হ’বগৈ ১৮ হাজাৰ কোটি। অসম চৰকাৰে প্ৰতিবছৰে সুদ আদায় দিয়ে ৮ হাজাৰ কোটি টকা।
ভয়াৱহ বানে বিধ্বস্ত কৰা পৰিয়ালসমূহক সাহায্য দিবলৈ ৰাজ্য চৰকাৰে ইতিমধ্যে আঁচনি ঘোষণা কৰিছে৷ ইফালে, ৰাজভঁৰালত ধনৰ অভাৱ৷ বান পৰিস্থিতিৰ জোৰা মাৰিবলৈ যোৱা জুন মাহত ৰাজ্য চৰকাৰে দেশীয় উৎসৰ পৰা লোৱা ঋণৰ পৰিমাম ২ হাজাৰ কোটি টকা৷
বিত্ত বিভাগৰ এক শীৰ্ষ সূত্ৰৰ পৰা জানিব পৰা মতে পুনৰ এহেজাৰ কোটি টকা ঋণ ল’বলৈ ৰাজ্য চৰকাৰে অহা ৫ জুলাইত প্ৰস্তাৱ প্ৰেৰণ কৰিব৷ অন্য অৰ্থত, পুনৰ ঋণ ল’বলৈ তৎপৰ হৈ উঠিছে অসম চৰকাৰ৷
উল্লখেযোগ্য যে ২০২১-২২ বিত্তীয় বৰ্ষত অসম চৰকাৰে বিভিন্ন উৎসৰ পৰা ১২ হাজাৰ কোটি টকাৰ ঋণ লৈছিল৷ আৰু ২০২২-২৩ বিত্তীয় বৰ্ষত ১৮ হাজাৰ কোটি টকাৰ ঋণ ল’বলৈ ৰাজ্য চৰকাৰে সিদ্ধান্ত লৈছে৷
ঋণৰ বোজা বাঢ়ি গৈ আছে৷ তাৰ সমানে সমানে বাঢ়িব লাগিছে হিতাধিকাৰীৰ সংখ্যা৷ কিন্তু এই প্ৰক্ৰিয়াই জনতাক সকাহ দিব পাৰিবনে? এই সমুদায় ঋণৰ বোজা অসমৰ জনতায়ো বহন কৰিব নালাগিবনে?
সেইবাবে ঋণ লোৱাৰ ক্ষেত্ৰত ৰাজ্য চৰকাৰৰ সিদ্ধান্তক লৈও এতিয়া জনতাৰ মাজত চলিব লাগিছে চৰ্চা৷ অৱশ্যে আগন্তুক সময়ছোৱাত মুখ্যমন্ত্ৰী ড০ হিমন্ত বিশ্ব শৰ্মাৰ ভূমিকা বিশেষভাৱে লক্ষণীয় হৈ থাকিব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
