মোদীৰ গৃহৰাজ্যত অঘটন, ৪ দশক পুৰণি দলং ভাঙি ৯ জন নিহত
গুজৰাটৰ বদোদৰা জিলাত বুধবাৰে পুৱা এক অঘটন সংঘটিত হয়। এখন ৪ দশক পুৰণি দলং ভাঙি নদীত পৰি যায় কেইবাকনো বাহন। যাৰ ফলত মৃত্যু হয় ৯ জনকৈ লোকৰ। উদ্ধাৰকাৰী দলে উদ্ধাৰ কৰে আন ৬ জনক। উদ্ধাৰ অভিযান এতিয়াও অব্যাহত আছে।
আজি বুধবাৰে পুৱা প্ৰায় ৭.৩০ মান বজাত ভাঙি পৰে দলংখন। উল্লেখযোগ্য যে ৯০০ মিটাৰ দৈৰ্ঘ্যৰ এই দলংখনে বদোদৰা আৰু আনন্দ জিলাক সংযোগ কৰিছে।
দলংখন ১৯৮৫ চনত নিৰ্মাণ কৰা হৈছিল আৰু ইয়াৰ মেৰামতি আৰু ৰক্ষণাবেক্ষণৰ কাম সময়ে সময়ে কৰা হৈছিল। মুখ্যমন্ত্ৰী ভূপেন্দ্ৰ পেটেলে কাৰিকৰী বিশেষজ্ঞৰ এটা দলক সেই স্থানলৈ প্ৰেৰণ কৰি দলংখন ভাঙি পৰাৰ কাৰণসমূহৰ তদন্ত কৰিবলৈ নিৰ্দেশ দিছে।
প্ৰাথমিক তথ্য অনুসৰি দুখন ট্ৰাক, এখন বলেৰো এছ ইউ ভি আৰু এখন পিকআপ ভ্যানকে ধৰি চাৰিখন বাহন দলংখন পাৰ হৈ গৈ থকা অৱস্থাত হঠাতে দলংখন ভাঙি মহিসাগৰ নদীত বাগৰি পৰে।
প্ৰত্যক্ষদৰ্শীয়ে জনোৱা মতে, বাহনসমূহ নদীত বাগৰি পৰাৰ পূৰ্বে এক প্ৰচণ্ড শব্দ শুনা যায়। ঘটনাস্থলীত অগ্নিনিৰ্বাপক বাহিনী, স্থানীয় আৰক্ষী আৰু বদোদৰা জিলা প্ৰশাসনে ততাতৈয়াকৈ উদ্ধাৰ অভিযান আৰম্ভ কৰে। স্থানীয় লোকেও আহতসকলক ধ্বংসাৱশেষৰ পৰা উলিয়াই আনিবলৈ সহায় কৰে।
এই পৰ্যন্ত তিনিজন লোকক উদ্ধাৰ কৰি ওচৰৰ চিকিৎসালয়ত ভৰ্তি কৰা হৈছে। স্থানীয় এজন বাসিন্দাই কয় যে, “এই দলংখন কেৱল যান-বাহন দুৰ্ঘটনাৰ বাবেই বিপজ্জনক নহয়, ইয়াত কেইবাটাও আত্মহত্যাৰ কাণ্ড সংঘটিত হৈছে। ইয়াৰ অৱস্থাৰ বিষয়ে বাৰে বাৰে সতৰ্কবাণী দিয়া হৈছিল, কিন্তু প্ৰশাসনে গুৰুত্ব নিদিলে।”
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
