ভালপোৱা মানুহজনৰ কাষত বেছি সময় কটাবলৈ কোনে নিবিচাৰে? যদি মৃত্যু নোহোৱাকৈয়ে আজীৱন একেলগে কটাব পাৰি তেন্তে জীৱনতনো আৰু পৃথক সুখ কি লাগে? মানুহৰ এই অলীক কল্পনা বাস্তৱায়ন কৰিবলৈ আগবাঢ়িছে জাৰ্মানীৰ এটা সংস্থা৷ মৃত্যুৰ পাছত মানুহৰ প্ৰাণবায়ু আকৌ উভতাই অনা প্ৰযুক্তিৰ যুগান্তকাৰী আৱিষ্কাৰৰ দাবী কৰাৰ কথা জাৰ্মানীয়ে জনাইছে বিশ্বক৷
জাৰ্মানীৰ বিশেষ সংস্থাটোৰ চিইঅ’ ব্ৰায়ান জনছনৰ দাবী, মৃত্যুৰ পাছতো মানুহক আকৌ প্ৰাণ দিব পৰা যায়৷ কেৱল সেয়াই নহয়, বয়স প্ৰতিৰোধী এণ্টি এজিং প্ৰক্ৰিয়াৰ মাধ্যমেৰে বয়সৰ চকা ওলোটাকৈ ঘুৰোৱাও সম্ভৱ বুলি দাবী কৰিছে বিজ্ঞানীৰ দলটোৱে৷ জাৰ্মানীৰ স্থানীয় সংবাদ সংস্থা সূত্ৰই প্ৰকাশ কৰামতে, ‘ক্ৰায়োপিৰ্জাৰ্ভেশ্ব্যন’ নামৰ এক পদ্ধতিৰ মাধ্যমেৰে মানৱদেহ তৰল নাইট্ৰজেনৰ মাজত ৰাখি সংৰক্ষিত কৰা হয়৷ সেই দেহ -১৯৮ ডিগ্ৰি চেলছিয়াছ তাপমাত্ৰাত ১০ দিন ধৰি সংৰক্ষণ কৰা হয়৷ ইয়াৰ ফলত দেহৰ যাৱতীয় শাৰীৰবৃত্তীয় প্ৰক্ৰিয়াসমূহ অনিৰ্দিষ্ট কালৰ বাবে থমকি যায়৷
জাৰ্মানীৰ বিশেষ সংস্থাটোৰ লক্ষ্য এটাই৷ তেওঁলোকে এনে এক পৃথিৱী তৈয়াৰ কৰিব য’ত মৃত্যুৰ নিয়ন্ত্ৰণ থাকিব মানুহৰ হাততেই৷ ইতিমধ্যেই ৬জন ব্যক্তিয়ে অমৰত্বৰ লোভত এই সংস্থাৰ সৈতে যোগাযোগ কৰিছে৷ তালিকাত নাম আছে ৫টা পোহনীয়া কুকুৰৰো৷ সংস্থাৰ দাবী, আৰু ৬৫০ জন ব্যক্তিয়ে বিশেষ পদ্ধতিৰে অমৰত্ব লাভৰ ইচ্ছাপ্ৰকাশ কৰিছে৷ যদিও তেওঁলোকৰ নাম এতিয়াও ৱেইটিং লিষ্টততহে আছে৷ সংস্থাৰ তৰফৰ পৰা জনোৱা হৈছে যে, কোনোৱে যদি তেওঁৰ মস্তিষ্ক সংৰক্ষণ কৰিব বিচাৰে তেন্তে সংস্থাক ৬৭.২ লাখ টকা দিব লাগিব৷ আৰু যদি কোনোৱে সম্পূৰ্ণ দেহ সংৰক্ষণ কৰে তেন্তে তেওঁলোকে ১.৮ কোটি টকা খৰচ কৰিব লাগিব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
