চৰকাৰীয়েই হওক বা ব্যক্তিগত খণ্ডৰ প্ৰতিষ্ঠানেই হওক, সুদীৰ্ঘ কাল কোনো এটা প্ৰতিষ্ঠানত কাম কৰি অহাৰ পিছত অৱসৰ ল’বলগীয়া দিনটোৱে সকলোকে আবেগিক কৰি তোলে। অৱসৰ লোৱাৰ পিছত কি কৰিব কি নকৰিব এনেধৰণৰ চিন্তাই মগজু ভৰ কৰে। এনে বহু লোক আছে ৬৮-৭০ বছৰ বয়সলৈকে সুন্দৰকৈ কাম কৰি যাব পাৰে। কিন্তু চৰকাৰৰ নিৰ্দিষ্ট এটা নিয়ম বা বয়সৰ সীমাৰ বাবে কাম কৰি থাকিব পৰা অৱস্থাতো কৰ্মসংস্থাপন এৰিবলগীয়া হয়। কিন্তু সম্প্ৰতি অৱসৰৰ এই সময়সীমা বৃদ্ধি কৰাৰ পৰিকল্পনা চলাই থকা হৈছে। অৱশ্যে জাৰ্মান চৰকাৰেহে এনে বৃহৎ সিদ্ধান্তৰ দিশে আগবাঢ়িছে। জাৰ্মানীত পেঞ্চন ব্যৱস্থাত বৃহৎ সংস্কাৰৰ প্ৰস্তুতি চলিছে। প্ৰস্তাৱিত সংস্কাৰৰ অধীনত অৱসৰৰ বয়স বৰ্তমানৰ ৬৭ বছৰৰ পৰা বৃদ্ধি কৰি ৭০ বছৰলৈ নিয়াৰ পৰিকল্পনা কৰিছে দেশখনৰ চৰকাৰে। অৱশ্যে এই পৰিকল্পনা কাৰ্যকৰী হ’লে দেশখনত ৪৫ বছৰ ধৰি পেঞ্চন তহবিলত অৱদান আগবঢ়োৱা কৰ্মচাৰীসকলে লাভ কৰি অহা আগতীয়া অৱসৰৰ সুবিধা বাতিল কৰা হ’ব পাৰে।
বন্ধ হ’ব পাৰে Pension at 63
জাৰ্মান সংবাদ মাধ্যমসমূহৰ তথ্য অনুসৰি, চ্যান্সেলৰ ফ্ৰিডৰিখ মাৰ্জ আৰু শ্ৰম মন্ত্ৰী বাৰ্বেল বাছৰ উদ্যোগত গঠন কৰা এক বিশেষ আয়োগে মঙলবাৰে নিজৰ পৰামৰ্শ দাখিল কৰিব। আয়োগে অৱসৰৰ বয়সক দেশখনৰ গড় আয়ুসৰ সৈতে সংযুক্ত কৰাৰ লগতে পৰ্যায়ক্ৰমে ইয়াক ৭০ বছৰলৈ বৃদ্ধি কৰাৰ পৰামৰ্শ আগবঢ়াইছে।
আয়োগে ‘pension at 63’ নামৰ জনপ্ৰিয় আঁচনিখনো বন্ধ কৰাৰ পৰামৰ্শ দিছে। এই আঁচনিৰ জৰিয়তে ৪৫ বছৰ ধৰি পেঞ্চন তহবিলত অৱদান আগবঢ়োৱা কৰ্মচাৰীসকলে কোনো ধৰণৰ পেঞ্চন কৰ্তনৰ সন্মুখীন নোহোৱাকৈ আগতীয়াকৈ অৱসৰ গ্ৰহণ কৰিব পাৰে।
ক্ৰমাগতভাৱে বৃদ্ধি পাইছে আৰ্থিক চাপ
নতুন প্ৰস্তাৱত কৰ্মচাৰী আৰু নিয়োগকৰ্তা—উভয় পক্ষৰ পৰা অতিৰিক্ত ২ শতাংশকৈ অৱদান সংগ্ৰহ কৰাৰ কথাও উল্লেখ কৰা হৈছে। এই ধন নতুনকৈ গঠন হ’বলগীয়া এখন চৰকাৰী বিনিয়োগ তহবিলত জমা ৰখা হ’ব। বৰ্তমান জাৰ্মানীত পেঞ্চন ব্যৱস্থাৰ বাবে মুঠ ১৮.৬ শতাংশ অৱদান সংগ্ৰহ কৰা হয়।
সংবাদ মাধ্যমৰ খবৰ অনুসৰি, জাৰ্মান চৰকাৰে সংসদৰ জুলাই মাহৰ কাম আৰম্ভ হোৱাৰ পূৰ্বেই এই সংস্কাৰ পেকেজত অনুমোদন জনোৱাৰ চেষ্টা চলাই আছে।
উল্লেখযোগ্য যে, জাৰ্মানীত দ্ৰুতগতিত বৃদ্ধি পোৱা বৃদ্ধ লোকৰ সংখ্যা আৰু বৃহৎ সংখ্যক লোকৰ অৱসৰ গ্ৰহণৰ ফলত দেশখনৰ পেঞ্চন ব্যৱস্থাৰ ওপৰত ক্ৰমাগতভাৱে অধিক আৰ্থিক চাপ সৃষ্টি হৈছে। এই প্ৰেক্ষাপটতে চৰকাৰে দীৰ্ঘম্যাদীভাৱে পেঞ্চন ব্যৱস্থাক সুকলমে চলাই নিবলৈ বলৈ এই ধৰণৰ সংস্কাৰৰ পথ বাছি লোৱাৰ চিন্তা কৰিছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
