জেফ্ৰি এপষ্টেইনক নাবালিকাক যৌন নিৰ্যাতন চলোৱাত সহায় কৰাৰ অপৰাধত দোষী সাব্যস্ত হোৱা গিছলিন মেক্সৱেলক নিউয়ৰ্কৰ এখন আদালতে ২০ বছৰৰ কাৰাদণ্ডৰ শাস্তি প্ৰদান কৰিছে। দীৰ্ঘদিনীয়া গোচৰৰ পিছত মানহাটানৰ ফেডাৰেল আদালতে এই সিদ্ধান্ত ঘোষণা কৰে। অৰ্থাৎ ৬০ বছৰীয়া মেক্সৱেলে জীৱনৰ বাকী সময়খিনি কাৰাগাৰত কটাব লাগিব।
উল্লেখ্য যে গিছলিন মেক্সৱেল ব্ৰিটেইনৰ এগৰাকী প্ৰভাৱশালী মহিলা। তেওঁ ৰবাৰ্ট মেক্সৱেলৰ কন্যা। নাবালিকা ছোৱালীৰ যৌন সৰবৰাহকে ধৰি তেওঁৰ বিৰুদ্ধে উত্থাপন কৰা ৬টা গোচৰৰ ভিতৰত ৫টা গোচৰত দোষী সাব্যস্ত কৰা হৈছিল। তেতিয়াৰ প্ৰেমিক এপষ্টেইনক নাবালিকাক যৌন নিৰ্যাতন চলোৱাত সহায় কৰাৰ বাবে আদালতে তেওঁক দোষী সাব্যস্ত কৰে।
লগতে পঢ়ক দেশৰ আটাইতকৈ ওখ অট্টালিকাত অশ্লীল ভিডিঅ’ কৰি ভাইৰেল এহাল দম্পতী!
অৱশ্যে মেক্সৱেলৰ অধিবক্তাই গেছলিনৰ শাস্তি প্ৰদানৰ ক্ষেত্ৰত আদালতক নম্ৰ হ’বলৈ আহ্বান জনাইছিল। কিন্তু ন্যায়াধীশ এলিছন নাথানে আমেৰিকাৰ পৰীক্ষামূলক কাৰ্যালয়ে পৰামৰ্শ দিয়া শাস্তিৰ বিষয়ে বিবেচনা কৰাৰ সিদ্ধান্ত লয়। ইয়াৰ পূৰ্বে এই গোচৰত গোচৰীয়া পক্ষই গেছলিনক ৩০ৰ পৰা ৫৫ বছৰৰ কাৰাদণ্ড বিহাৰ দাবী জনাইছিল।
নিউয়ৰ্কৰ দক্ষিণ জিলাৰ আমেৰিকাৰ অধিবক্তা ডেমিয়ান উইলিয়ামছে কয় যে শিশুৰ বিৰুদ্ধে সংঘটিত জঘন্য অপৰাধৰ বাবে গিছলিন মেক্সৱেলক দোষী সাব্যস্ত কৰা হৈছে। এই বাক্যটোৱে এটা শক্তিশালী বাৰ্তা প্ৰেৰণ কৰিছে যে কোনোৱেই আইনৰ উৰ্ধত নহয় আৰু ন্যায় প্ৰদানত কেতিয়াও পলম নহয়।
উল্লেখ্য যে ২০২০ চনত মেক্সৱেলক গ্ৰেপ্তাৰ কৰা হৈছিল আৰু তেতিয়াৰ পৰাই তেওঁ কাৰাগাৰত বন্দী হৈ আছে। আনহাতে পূৰ্বে গ্ৰেপ্তাৰ হোৱা তেওঁৰ প্ৰেমিক এপষ্টেইনে তেওঁৰ বিৰুদ্ধে গোচৰ চলি থকাৰ সময়তে ২০১৯ চনত কাৰাগাৰত আত্মহত্যা কৰিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
