উচ্চতৰ মাধ্যমিক চূড়ান্ত পৰীক্ষাত বিজ্ঞান শাখাত অসমৰ ভিতৰতে প্ৰথম স্থান দখল কৰা কৃতিমান ছাত্ৰ ধৃতিৰাজ বাস্তৱ কলিতা বৰ্তমান শাৰীৰিকভাৱে কিছু অসুস্থ তথা দুৰ্বলৈ হৈ পৰিছে৷
বিশেষকৈ ফলাফল ঘোষণা কৰাৰ দিনাৰে পৰা ধৃতিৰাজে সংবাদ মাধ্যমৰ সৈতে বিৰামহীনভাৱে সাক্ষাৎকাৰ আৰু মত বিনিময় কৰি কৰি শাৰীৰিকভাৱে কিছু দুৰ্বল হৈ পৰা বুলি পৰিয়ালৰ লোকে প্ৰকাশ কৰিছে৷ সেয়ে এতিয়া ধৃতিৰাজক কিছু জিৰণিৰ প্ৰয়োজন হৈছে৷
উল্লেখ্যে অতি মেধাৱী, ব্যক্তিত্বশালী, বিনয়ী আৰু প্ৰখৰ সামাজিক চেতনাৰ অধিকাৰী ছাত্ৰগৰাকীৰ সৰল আৰু বিনয়ী স্বভাৱে ৰাজ্যৰ প্ৰতিগৰাকী লোককে আকৃষ্ট কৰিছে৷ ফলত ফলাফল ঘোষণা কৰাৰ দিনাৰ পৰাই বিভিন্ন সংবাদ মাধ্যমৰ লোকে ধৃতিৰাজৰ ঘৰত ভিৰ কৰা পৰিলক্ষিত হৈছে৷ সংবাদ মাধ্যমক বিৰামহীনভাৱে সাক্ষাৎকাৰ দিয়াৰ লগতে মন বিনিময় কৰাৰ ফলত ধৃতিৰাজে জিৰণি ল’বলৈ আহৰি পোৱা নাই৷
লগতে পঢ়ক শিশু আৰু কিশোৰীক যৌন নিৰ্যাতন! ২০ বছৰৰ কাৰাদণ্ড লাভ ৬০ বৰ্ষীয় মহিলাৰ
সেয়ে পৰিয়ালৰ লোকে ফেচবুকৰ জৰিয়তে ধৃতিৰাজক বিশ্ৰামৰ প্ৰয়োজন বুলি অতি বিনয়েৰে গোহাৰি জনাইছে৷
‘‘ধৃতিৰাজৰ পৰিয়ালৰ তৰফৰ পৰা শুভাকাংক্ষী অসমবাসী ৰাইজক প্ৰণাম জনাইছো৷ আমি আপোনালোকৰ উপস্থিতি আৰু শুভেচ্ছাৰ সোঁত দেখি বাকৰুদ্ধ৷ কিন্তু বিনম্ৰতা আৰু দুখেৰে জনাইছো যে আহৰিবিহীন সাক্ষাৎকাৰ আৰু মত বিনিময় কাৰ্যসূচীত স্বগৃহতে অংশগ্ৰহণ কৰি ধৃতিৰাজ দুৰ্বল তথা শাৰীৰিকভাৱে অসুস্থ হৈ পৰিছে৷তাক অলপ জিৰণিৰ প্ৰয়োজন৷ আহি থকা দিনকেইটাত অভিনন্দন জ্ঞাপন কৰিব বিছৰা দল,সংগঠন,অনুষ্ঠান-প্ৰতিষ্ঠান,প্ৰচাৰ মাধ্যমৰ সন্মানীয় বিষয়ববীয়া/কৰ্মকৰ্তা আৰু অসমবাসী ৰাইজক ৰাতিপুৱা ১০ বজাৰ পিছত উপস্থিত হ’বলৈ কৰযোৰে প্ৰাৰ্থনা জনাইছো৷ ঠিক একেদৰে সন্ধিয়া ৭ বজাৰ পিছত তাক জিৰণি ল’বলৈ সুযোগ আৰু সন্মতি প্ৰদান কৰে যেন (কোনো কাৰণতে যেন কোনেও এয়া পৰিয়ালৰ স্পৰ্দ্ধাসূচক দাবী বুলি নলয়!)৷ আপোনাসৱৰ যোগাত্মক সঁহাৰিয়ে ধৃতিৰাজক সুস্থ কৰি ৰাখিব৷’’
পৰিয়ালৰ লোকে এইদৰে অতি বিনয়েৰে ধৃতিৰাজক অকণ জিৰণি দিবলৈ সংবাদ মাধ্যমৰ লগতে সকলোকে আহ্বান জনাইছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
