অসম লাইভ২৪ঃ প্ৰায় ডেৰ বছৰৰো অধিক সময় ধৰি ৰাছিয়া আৰু ইউক্ৰেইনৰ যুদ্ধ চলি আছে। বৰ্তমান পৰ্যন্ত যুদ্ধ শেষ হোৱাৰ কোনো লক্ষণেই নাই। এই পৰিস্থিতিত অন্য এক বৃহৎ সিদ্ধান্ত গ্ৰহণ কৰিছে ৰুছ চৰকাৰে। গৰ্ভপাতক লৈ ডাঙৰ সিদ্ধান্ত লৈছে ৰুছ চৰকাৰে। জনসংখ্যাগত সংকটত এতিয়া ৰাছিয়া। ৰাছিয়াত গৰ্ভপাতক আইনী চিলমোহৰ মাৰি বৈধ ঘোষণা কৰাৰ পাছতেই সংকটত এতিয়া ৰুছ চৰকাৰ। এক দশক পূৰ্বে লোৱা সিদ্ধান্ত এতিয়া নিজৰ ওপৰতেই বোজা হৈ পৰিছে ৰুছ চৰকাৰৰ। ইউক্ৰেইনৰ সামৰিক অভিযানৰ মাজত হঠাৎ গৰ্ভপাতৰ ওপৰত থকা বিশেষ আইন চৰ্চালৈ অহাৰ কাৰণো আছে। বিগত কেইবামাহ পূৰ্বে বেচৰকাৰী ক্লিনিকসমূহত গৰ্ভপাতৰ সংখ্যা কমোৱাৰ বাবে নিৰ্দেশ দিছে পুটিনে।
গৰ্ভপাত আইন থাকিলেও গৰ্ভপাত কৰাব নোৱাৰিব!
জৰ্জিয়াত নিৰ্বাসিত ৰুছ নাৰীবাদী কৰ্মী লেদা গাৰিনাই এটা সংবাদসংস্থাৰ আগত, গৰ্ভপাতক লৈ বিশেষ নিৰ্দেশ দিয়াৰ কথা প্ৰকাশ কৰিছে। লেদা গাৰিনাই ৰুছ চৰকাৰৰ নতুন সিদ্ধান্তক লৈ কয়, ‘এই ধৰণৰ সিদ্ধান্ত তেতিয়াই লোৱা হয় যেতিয়া দেশ যুদ্ধত লিপ্ত হয়। পুটিনেই নহয় প্ৰায় সকলোতেই যুদ্ধ হ’লে ভূক্তভোগী হয় একোগৰাকী নাৰীয়েই।’ পুটিন চৰকাৰে শেহতীয়াকৈ সকলো নাৰীক ঘৰত থাকি সন্তান জন্ম দিবৰ বাবে আহ্বান জনাইছে। লেদা গাৰিনাই পুটিনৰ এই মন্তব্যক সম্পূৰ্ণৰূপে বিৰোধ কৰিছে। লেদা গাৰিনাই এই মন্তব্য কৰিলেও ৰুছ জনসংখ্যাবিদ ভিক্টোৰিয়া ছাকেভিচ এই বিষয়টোত একমত নহয়। তেওঁৰ দাবী যে, পুটিনৰ এই সিদ্ধান্তৰ বাবেই ৰাছিয়াত গৰ্ভপাতৰ হাৰ প্ৰায় দহগুণ কমি গৈছে।
পুটিনে কি কয়?
গৰ্ভপাতৰ ওপৰত থকা আইনৰ বিৰুদ্ধাচাৰণেৰে ৰুছ ৰাষ্ট্ৰপতি ভ্লাডিমিৰ পুটিনে কৈছে যে, অধিক হাৰত যদি গৰ্ভপাত কৰাই তেন্তে ৰাছিয়াৰ জনসংখ্যা দিনকদিনে কমি গৈয়েই থাকিব। জনসংখ্যাগত সমস্যা বৃদ্ধি পাব সেয়ে এই আইনৰ বিৰুদ্ধাচৰণ কৰিব লগা হৈছে বুলি মন্তব্য কৰিছে পুটিনে। উল্লেখ্য যে ৰাছিয়াত গৰ্ভপাতৰ ওপৰত নিষেধাজ্ঞা জাৰি হৈছে বিগত মাৰ্চ মাহৰ পৰাই।
উপায়হীন পুটিনে কেইবা দশকপূৰ্বে জাৰি কৰা আইন পৰিবৰ্তন কৰাৰ চিন্তাভাৱনা কৰিছে। প্ৰতিটো ৰুছ পৰিয়ালে কেনেকৈ কি কৰা উচিত সেই বিষয়ক লৈ থকা ৰক্ষণশীল দৃষ্টিভংগী সলনি কৰাৰো চিন্তা চৰ্চা কৰিছে পুটিনে।
ৰাছিয়াত আৰম্ভ হ’ব আন এক নিষেধাজ্ঞা আইন!
ৰুছ ৰাজনৈতিক বিশেষজ্ঞ তাতিয়ানা ষ্টেনোভায়াই জনোৱা অনুসৰি, ইউক্ৰেইনৰ সৈতে যুদ্ধ দীৰ্ঘদিনীয়া হোৱাৰ বাবে চাপত আছে পুটিন। ৰাছিয়াত এতিয়া একাধিক সংকটেও দেখা দিছে। ইয়াৰ বাবেই অন্য এক নিষেধাজ্ঞা জাৰি কৰাৰ আশংকা প্ৰকাশ কৰিছে তেওঁ। গৰ্ভপাতৰ ওপৰত পুটিনে লোৱা এই সিদ্ধান্তক লৈ বিভক্ত হৈ পৰিছে পুটিন শিবিৰো।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
