অসম লাইভ২৪ঃ ক্ষমতালৈ আহিয়েই কংগ্ৰেছে কৰ্ণাটকবাসীক দিয়া এটাৰ পাছত আনটো প্ৰতিশ্ৰুতি পূৰণ কৰিছে। নিৰ্বাচনী ইস্তাহাৰত থকা ৫টা প্ৰতিশ্ৰুতিয়ে প্ৰথমখন কেবিনেটতেই পূৰণ কৰাৰ কথাও জনাইছে কৰ্ণাটক চৰকাৰে। শেহতীয়াকৈয়ে কৰ্ণাটক চৰকাৰে লৈছে আন এক বৃহৎ সিদ্ধান্ত। ক্ষমতালৈ আহিয়েই কংগ্ৰেছ দলে বিদ্যালয়ৰ পাঠ্যপুথিত বিজেপিয়ে সংযোগ কৰা বিনায়ক দামোদৰ ছাভাৰকৰ আৰু আৰএছএছৰ প্ৰতিষ্ঠাতা কেশৱ বলিৰাম হেডগেওয়াৰৰ জীৱনীও বাদ দিয়াৰ সিদ্ধান্ত লৈছে কৰ্ণাটক চৰকাৰে।
ষষ্ঠৰ পৰা দশম শ্ৰেণীলৈকে পাঠ্যপুথিত এতিয়া নতুনকৈ সংযোগ কৰা হ’ব সমাজকৰ্মী সাবিত্ৰীবাই ফুলৰ জীৱনী, বিআৰ আম্বেডকাৰৰ কবিতা আৰু ব্ৰিটিছে কাৰাবন্দী কৰি ৰখাৰ সময়ত জৱাহৰলাল নেহৰুৱে কন্যা ইন্দিৰালৈ লিখা চিঠি। মুখ্যমন্ত্ৰী ছিদ্দাৰামাইয়াৰ নেতৃত্বত বৃহস্পতিবাৰে কৰ্ণাটকৰ মন্ত্ৰীসভাত এক বৈঠকৰ আয়োজন কৰা হৈছিল। সেই বৈঠকতেই এই সিদ্ধান্ত লৈছে ছিদ্দাৰামাইয়াৰ মন্ত্ৰীসভাই। বিগত মে’ মাহত মুখ্যমন্ত্ৰী নিৰ্বাচিত হোৱাৰ পাছতেই ছিদ্দাৰামাইয়াই কৈছিল, ‘বিজেপি চৰকাৰে শিক্ষাকো গেৰুৱাকৰণ কৰিছে। এই নীতি সলনি কৰিব লাগিব।’
শাসনলৈ আহিয়েই ছিদ্দাৰামাইয়াই বহুকেইগৰাকী শিক্ষাবিদৰ সৈতে আলোচনাত মিলিত হৈছিল। আলোচনাৰ পাছতেই ছিদ্দাৰামাইয়াই কয়,’ছাত্ৰ ছাত্ৰীৰ মনক কলুষিত কৰা শিক্ষা আমি নিদিও। ঘৃণাৰ ৰাজনীতি কৰ্ণাটকত আৰু নহ’ব। ভয়ৰ বাতাবৰণো ইয়াত আৰু নাথাকিব। উন্নত মানদণ্ডৰ শিক্ষাৰে কৰ্ণাটকৰ ছাত্ৰ ছাত্ৰীক আগুৱাই নিবৰ বাবেই আমি এই সিদ্ধান্ত লৈছো।’
উল্লেখ্য যে, বৃহস্পতিবাৰে কৰ্ণাটক চৰকাৰে বিজেপিয়ে অনা ধৰ্মান্তৰণৰ যি ৰাজনীতি কৰিছে সেইয়া কৰ্ণাটকত এতিয়াৰে পৰা বন্ধ। কৰ্ণাটক বিধানসভাৰ নিৰ্বাচনৰ পূৰ্বে দিয়া নিৰ্বাচনী ইস্তাহাৰত শিক্ষানীতি সলোৱাৰ কথা কংগ্ৰেছে কৈছিল। নৰেন্দ্ৰ মোদীয়ে আৰম্ভ কৰা জাতীয় শিক্ষানীতি সলোৱাৰ প্ৰতিশ্ৰুতি আছিল কৰ্ণাটক কংগ্ৰেছৰ। কথামতেই কাম কৰিছে কৰ্ণাটকৰ নৱনিৰ্বাচিত মন্ত্ৰীসভাই। ৰাজ্যখনৰ বৰ্তমানৰ শিক্ষামন্ত্ৰী মধু বঙ্গৰপ্পাই এই সন্দৰ্ভত কয়, ‘পাঠ্যপুথি সংশোধন কৰাৰ সিদ্ধান্ত লৈছো। আৰু এই সিদ্ধান্ত অনুমোদিতও হৈছে।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
