অসম লাইভ২৪ঃ তীব্ৰ গৰমে দহিছে ৰাজ্য। এই গৰমত হিটষ্ট্ৰোকত বহুতেই আক্ৰান্ত হয়। হিটষ্ট্ৰোক কি? গ্ৰীষ্মৰ দিনত অত্যাধিক তাপমাত্ৰাজনিত কাৰণত শৰীৰ অতিৰিক্ত গৰম হৈ পৰে। এই সমস্যাকে হিটষ্ট্ৰোক বুলি কোৱা হয়। হিটষ্ট্ৰোক আক্ৰান্ত হ’লে শৰীৰৰ তাপমাত্ৰা ১০৪ ডিগ্ৰী ফাৰেনহাইট পাৰ হৈ যায়। বহুসময় ধৰি ৰ’দত থকাৰ ফলতেই এই সমস্যা হয়। হিটষ্ট্ৰোক হ’লে তাৎক্ষণিকভাৱে চিকিৎসকৰ পৰামৰ্শ গ্ৰহণ কৰিব লাগে। হিটষ্ট্ৰোকত আক্ৰান্ত হোৱাৰ পূৰ্বে এজন ব্যক্তিৰ শৰীৰত কি কি লক্ষণে দেখা দিয়ে?
শৰীৰত তাপমাত্ৰা খুবেই বাঢ়ি যায়। এই সময়ত তাপমাত্ৰা ১০৪ ডিগ্ৰী ফাৰেনহাইটতকৈ বেছি হয়।
আক্ৰান্ত ব্যক্তিগৰাকীয়ে অদ্ভুত আচৰণ কৰিব পাৰে।
খুব ঘামি যায়, বমি বমি ভাৱ হ’ব পাৰে।
শ্বাসপ্ৰশ্বাস দ্ৰুত হৈ পৰে।
হাৰ্টবিট বাঢ়ি যায়, মূৰৰ বিষ হ’ব পাৰে।
আক্ৰান্ত লোকজন সংজ্ঞাহীন হৈ পৰিব পাৰে।
এই লক্ষণসমূহে দেখা দিলে লগে লগেই চিকিৎসকৰ পৰামৰ্শ লোৱাটো অতি জৰুৰী।
এই অসুখ মূলত গৰমত বহুসময় থকাৰ ফলত হয়। গৰমৰ সময়ছোৱাত যিসকল লোক বাহিৰত থাকে। তেওঁলোকে আগতীয়াকৈয়ে কিছু সাৱধানত অৱলম্বন কৰিব পাৰে।
বয়স্কসকল সাৱধান হওক
সকলো বয়সীয়া লোকেই এই ৰোগত আক্ৰান্ত হ’ব পাৰে। কিন্তু বয়স বাঢ়িলে এই ৰোগৰ শংকা বাঢ়ি যায়। কাৰণ বয়স্কলোকসকলৰ শৰীৰত গৰম সহ্য কৰিব পৰা ক্ষমতা কমি আহে। যদি সম্ভৱ হয় বয়স্কলোকসকলে গৰমৰ সময়ছোৱাত পৰাপক্ষত ঘৰত থাকিবলৈ যত্ন কৰিব লাগে।
হিটষ্ট্ৰোকত আক্ৰান্ত হ’লে তাৎক্ষণিকভাৱে কি কৰিব?
কোনোবা হিটষ্ট্ৰোকত আক্ৰান্ত হ’লে ব্যক্তিজনক লগে লগেই ঠাণ্ডা ঠাইত আনি বহুৱাই দিব লাগে। এচি বা পাংখা চলাই দিব। যিমানদূৰ সম্ভৱ শৰীৰৰ পিন্ধি থকা কাপোৰ ঢিলা কৰি দিব। চকু-মুখত ঠাণ্ডা পানী ঢালিব। কম পৰিমানে পানী খোৱাই দিব। এনেকৈ শান্ত পৰিবেশত কিছু সময় ৰখাৰ পাছতেই ব্যক্তিজন কিছু পৰিমানে ষ্টে’বল হ’ব। ৰোগীজনৰ শৰীৰৰ তাপমাত্ৰা কিছু নিয়ন্ত্রণ হোৱাৰ পাছত চিকিৎসালয়লৈ নিব লাগে।
এই ৰোগ প্ৰতিৰোধৰ কৌশল কি কি?
গৰমত ওলাই যাওতে কপাহী কোমল কাপোৰ পৰিধান কৰিব।
ছানস্ক্ৰিণ ব্যৱহাৰ কৰিব।
পৰ্যাপ্ত পৰিমানে পানী খাব লাগে।
বাহিৰলৈ ওলাই গ’লে ৰ’দত বেছি সময় থাকিব নালাগে।
ছাতি, টুপি আদি ব্যৱহাৰ কৰিব।
ইউৰিণৰ ৰঙলৈ নজৰ ৰাখিব। হালধীয়া বা গাঢ় ৰঙৰ প্ৰস্ৰাৱ হ’লে পানী খোৱাৰ পৰিমান বঢ়াই দিব।
কফি, মদ্যপান আদি কমাই দিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
