কঁপি উঠিল হলিউড, ৰাজপথত আততায়ীৰ হঠাতে কৰা আক্ৰমণত প্ৰাণ হেৰুৱালে জনপ্ৰিয় অভিনেতাই
হলিউডৰ অভিনেতা জনী ভেক্টৰৰ অনুৰাগী সকললৈ শোকৰ খবৰ। ৰাজপথত জনসমাজৰ মাজত আততায়ীৰ আক্ৰমণত প্ৰাণ হেৰুৱাই অভিনেতাগৰাকীয়ে। মৃত্যুৰ সময়ত অভিনেতা জনী ভেক্টৰৰ বয়স আছিল ৩৭ বছৰ।
শনিবাৰে (২৫ মে’) পুৱতিনিশা ৩ বজাত সংঘটিত হৈছে এই ঘটনা। ভেক্টৰৰ মাতৃয়ে নিশ্চিত কৰিলে পুত্ৰৰ মৃত্যু। যি খবৰৰ বাবে এতিয়া হলিউডত শোকৰ ছাঁ। সংবাদ মাধ্যমৰ খবৰ অনুসৰি এই গোচৰত এতিয়ালৈকে কোনো লোককে আটক কৰিবলৈ সক্ষম হোৱা নাই আৰক্ষী।
জনী ভেক্টৰ ‘জেনেৰেল হস্পিতাল’, ‘এনচিআইএছ’, ‘দ্য অ’এ’, ‘ৱেষ্টৱৰ্ল্ড’, ‘দ্য পেচেঞ্জাৰ’, ‘ষ্টেচন ১৯’, ‘বাৰ্বি ৰিহাব’, ‘চাইবেৰিয়া’, ‘এজেণ্ট এক্স’, ‘ ভ্যান্টাষ্টিক’, ‘এনিমেল কিংডম’, ‘হলিউড গাৰ্ল’, ‘ট্ৰেইনিং ডে’ আৰু ‘ক্ৰিমিনেল মাইণ্ডছ’ৰ দৰে অনুষ্ঠানৰ বাবে তেওঁ দৰ্শকৰ মাজত জনপ্ৰিয় আছিল।
জনীৰ হত্যাৰ ঘটনা সন্দৰ্ভত জানিব পৰা অনুসৰি, কেইটামান চোৰে জনীৰ বাহনৰ পৰা কোনো সামগ্ৰী চোৰ কৰিবলৈ আহিছিল। সেই সময়তে বাহনৰ কাষলৈ আহি উপস্থিত হয় জনী, আৰু চোৰ কৰাত বাধা আৰোপ কৰাত চোৰৰ সৈতে হতাহতি হয়। চোৰে শেষত গুলি কৰি দিয়ে। যাৰ ফলত থিতাতে মৃত্যু হয় জনীৰ।
আৰক্ষী ভাষ্য অনুসৰি শনিবাৰে পুৱা ৩ বজাত এই ঘটনা সংঘটিত হয়। এই কাণ্ড সংঘটিত হৈছে পিটিত য’ত ৩ জন লোকে ভেক্টৰক হত্যা কৰিছিল। প্ৰতিবেদন অনুসৰি চোৰে তেওঁৰ গাড়ীৰ পৰা কেটালাইটিক কনভাৰ্টাৰটো চুৰি কৰিবলৈ চেষ্টা চলাইছিল। ঠিক তেতিয়াই জনী তাত উপস্থিত হয়। তেতিয়াই চোৰে তেওঁক গুলীয়াই হত্যা কৰে। গুলীচালনাৰ পিছত তিনিওজন ব্যক্তিয়ে সেই স্থানৰ পৰা পলায়ন কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
