জুবিন গাৰ্গৰ ছিজাৰ এটেক, হাস্পতালত ভৰ্তি
অসমবাসীৰ হিয়াৰ আমঠু তথা হার্টথ্রব জুবিন গাৰ্গ পুনৰ অসুস্থ। ছিজাৰ এটেক হৈ চিকিৎসালয়ত ভৰ্তি কৰা হৈছে জুবিন গাৰ্গক। আজি ২৮ জুলাই দেওবাৰে পুৱা ১০ মান বজাত মহানগৰীৰ নেমকেয়াৰ হাস্পতালত ভৰ্তি কৰা হৈছে কণ্ঠশিল্পী গৰাকীক।
হাস্পতালখনৰ চিকিৎসকৰ ফালৰ পৰা জানিব পৰা অনুসৰি জুবিন গাৰ্গৰ ছিজাৰ এটেক হৈছে। বৰ্তমান জুবিন গাৰ্গক নেমকেয়াৰ হাস্পতালৰ MICUত ভৰ্তি কৰা হৈছে।
খবৰ লাভ কৰা মাত্ৰেই জুবিনৰ স্বাস্থ্যৰ বুজ ল’বলৈ নেমকেয়াৰত উপস্থিত হয় পবিত্ৰ মাৰ্ঘেৰিটা। জুবিনক সাক্ষাৎ কৰি চিকিৎসকৰ সৈতে কথা বতৰাৰ অন্তত মাৰ্ঘেৰিটাই কয়, জুবিনক জিৰণীৰ প্ৰয়োজন, তেওঁ বিৰামহীনভাবে কাম কৰে, অসমৰ ৰাইজৰ আশীৰ্বাদ আছে, জুবিন সোনকালে সুস্থ হৈ উঠিব।
আনহাতে জুবিন গাৰ্গৰ বন্ধু জয়ন্ত কাকতিয়ে জনোৱা অনুসৰি যোৱা নিশা জুবিন গাৰ্গ মহানগৰীৰ জোনালীত পৰিয়ালৰ সৈতে আছিল। কোনো কাম বা চিন্তাত নাছিল বুলি জনাইছে জয়ন্ত কাকতিয়ে। কিন্তু পুৱাই জুবিন গাৰ্গৰ ছিজাৰ এটেক আহে।
জয়ন্ত কাকতিয়ে জনোৱা অনুসৰি জুবিন হাস্পতালত ভৰ্তি হোৱাৰ লগে লগে কেইবাগৰাকী চিকিৎসকে ততাতৈয়াকৈ প্ৰাথমিক চিকিৎসা প্ৰদান কৰে। পাছত পৰীক্ষা নিৰিক্ষাৰ অন্তত যাৱতীয় চিকিৎসা আগবঢ়ায়। বৰ্তমানে নেমকেয়াৰ হাস্পতালৰ অভিজ্ঞ চিকিৎসকৰ নিৰিক্ষণত আছে জুবিন গাৰ্গ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
