ডাঃ দীপক কুমাৰ আগৰৱালাঃ মানৱদেহৰ আন বিভিন্ন অংগৰ দৰেই দেহৰ সৰ্ববৃহৎ অংগবিধ অৰ্থাৎ দেহৰ ছালখনৰো বিভিন্ন ধৰণৰ ৰোগ হয়। এই সকলোবোৰ চৰ্মৰোগৰ ভিতৰতে এবিধ প্ৰধান ৰোগ হৈছে ছালত হোৱা ভেঁকুৰ বা ফাংগাছৰ সংক্ৰমণৰ ফলস্বৰূপে হোৱা ভিন্নধৰণৰ ৰোগ। ভেঁকুৰৰো বহুসংখ্যক প্ৰজাতি আছে। যিবোৰে যিকোনো ধৰণৰ স্থান অথবা মানৱদেহতো বাস কৰিব পাৰে। যেনে লেতেৰা বস্তুৰ মাজত, গছ-বনত, ঘৰুৱা বিভিন্ন ধৰণৰ আচ-বাবত, পানীত আৰু আনকি মানুহৰ ছাল পৰ্যন্ততো এই ভেঁকুৰৰ ভিন্ন প্ৰজাতি বা অংশবিশেষে বাস কৰিব পাৰে। যদিওবা বিশ্বব্যাপী উপলব্ধ অৰ্ধেক অংশ ভেঁকুৰ হে অপকাৰী৷ পিছে এই অপকাৰীবোৰেহে মানৱদেহত বাস কৰিবলৈ ধৰে— মানেই ই কাৰ্যতঃ নিজস্ব বিষাক্ত সংক্ৰমণ বিয়পাবলৈ আৰম্ভ কৰে।
ইয়াৰ ফলস্বৰূপেই বিভিন্ন ধৰণৰ চৰ্মৰোগ হোৱা দেখা যায়। কেতিয়াবা এনে সংক্ৰমণৰ ফলত ছালত ঘঁহনি খোৱাৰ দৰে ৰঙচুৱা পৰা বা পানীজ্বোলা পৰ্যন্ত উঠিবও পাৰে। ছালত এনেদৰে হোৱা ভেঁকুৰ সংক্ৰমক ৰোগসমূহ প্ৰধানতঃ আমাৰ দেশত অতিকেই সুলভ বা সহজেই হয়। পিছে দুখৰ বিষয় যে এনে ৰোগ হোৱা যেন পালেই ৰোগীয়ে সহজলভ্যৰূপত ওচৰৰ ফাৰ্মাচিত পোৱা ষ্টেৰ’ইডযুক্ত মলম ব্যৱহাৰ কৰিবলৈ আৰম্ভ কৰে, যিয়ে ৰোগ নিৰাময় কৰাৰ ঠাইত ৰোগক দীৰ্ঘস্থায়ী কৰি তোলাৰ লগতে উপযুক্ত চিকিৎসাত অধিক পলম হয় আৰু আনুষংগিকভাৱে ষ্টেৰ’ইডৰ কু-প্ৰভাৱো দেহত পৰিবলৈ আৰম্ভ কৰে। ষ্টেৰ’ইডযুক্ত বিভিন্ন মলম যেনে— বেটন’ভেট-চি, ক্ল’বেটামেল-জি এম, লেবাটে-জি এন আদি অতি সহজেই ৰোগীয়ে ব্যৱহাৰ কৰে আৰু ইয়াৰ ফলত খন্তেকীয়াভাৱে হ’লেও ছালৰ ৰঙা পৰা আৰু খজুৱতি কমি যায় যদিও একে সময়তে আকৌ ভেঁকুৰৰ সংক্ৰমণ পূৰ্বতকৈ অধিক অগ্ৰাসী ৰূপত বাঢ়িবলৈ ধৰে।
যেতিয়াই ৰোগীয়ে এই মলমৰ প্ৰয়োগ বন্ধ কৰে, তেতিয়াই পুনৰাই এই ৰোগে আৰু অধিক শক্তিশালী ৰূপত গা কৰি উঠে আৰু পুনৰ উপায়ন্তৰ হৈ ৰোগীয়ে একেবিধ মলমৰেই ব্যৱহাৰ কৰিবলৈ আৰম্ভ কৰে। মুঠতে চাবলৈ গ’লে ই এক পুণঃপৌণিক প্ৰক্ৰিয়াৰ দৰে হয় আৰু লগতেই ব্যৱহাৰকৰ্তাৰ শৰীৰত ষ্টেৰ’ইডৰ কু-প্ৰভাৱ পৰাও আৰম্ভ হয়। হয়, প্ৰয়োজন সাপেক্ষে চিকিৎসা-প্ৰক্ৰিয়াত ষ্টেৰ’ইডৰ ব্যৱহাৰ কৰা হয়, কিন্তু ই একমাত্ৰ চিকিৎসকৰ পৰামৰ্শ বা প্ৰেছক্ৰিপ্চন মতেহে ব্যৱহাৰ কৰা উচিত।
লগতে পঢ়ক KGFৰ প্ৰভাৱ! চিগাৰেট হুপি চিকিৎসাধীন হ’ল কিশোৰ, ক’ত ঘটিল এই ঘটনা?
এজন ব্যক্তিৰ ছাল ভেঁকুৰৰ পৰা হোৱা সংক্ৰমণৰ দ্বাৰা ৰোগগ্ৰস্ত হৈছে বুলি কিদৰে জানিব পাৰিব? এই চৰ্মৰোগৰ কেইটিমান লক্ষণৰ বিষয়ে তলত উল্লেখ কৰিছো৷ এইখিনি লক্ষণ আপুনি নিজৰ ছালত দেখিবলৈ পালে বুজিব পাৰিব যে আপোনাৰ ছাল ভেঁকুৰ বা ফাংগাল ইনফেকচন বা সংক্ৰমণৰ ফলত হোৱা ৰোগৰ চিকাৰ হৈছে৷
ক) খজুৱতি, খ) ৰঙচুৱা পৰা ছাল, গ) জ্বলা-পুৰা কৰা, ঘ) চকলা-চকল হোৱা ছাল, ঙ)ছাল ফুলা, চ)পানীজ্বোলা উঠা ইত্যাদি।
এনেধৰণে ভেঁকুৰৰ পৰা সংক্ৰমক ৰোগ মানৱদেহৰ যিকোনো অংশতেই হ’ব পাৰে। ইয়াৰ ভিতৰত কিছুমান বিশেষ অংশ হৈছে যেনে— কটিবন্ধ, কাষলতি, নিতম্ব, কৰঙন ইত্যাদি। এনেদৰে হোৱা ৰোগৰ কেইটিমান প্ৰকাৰ আৰু এইবোৰৰ বিষয়ে কিছু কথা তলত উল্লেখ কৰা হৈছে—
১. এথলিটছ ফুটঃ নামেই সূচাই যে এইবিধ ৰোগে ভৰিত আক্ৰমণ কৰে। এইবিধ আটাইতকৈ সহজ আৰু সুলভে আক্ৰান্ত হোৱা ভেঁকুৰৰ সংক্ৰমক চৰ্মৰোগ বুলিব পাৰি। সাধাৰণতে লেতেৰা মাটিৰ পৰা আৰম্ভ কৰি ৰাজহুৱা শৌচ-প্ৰস্ৰাৱগাৰ আদি খালী ভৰিৰে ব্যৱহাৰ কৰাৰ ফলত এই ৰোগ বিয়পে। এই ৰোগত ভৰিৰ আঙুলিৰ মাজৰ অংশবোৰ বগা ঢেলা পৰিবলৈ আৰম্ভ কৰে আৰু ছালবোৰ এৰাই এৰাই যাবলৈ ধৰে। এই ৰোগে ভৰিৰ তলুৱা পৰ্যন্ত আক্ৰমণ কৰিব পাৰে।
লগতে পঢ়ক প্ৰথমে প্ৰতিষ্ঠানৰ পৰা বৰ্খাস্ত : ছিংগাপুৰস্থিত ষ্টাৰ্টআপৰ সহপ্ৰতিষ্ঠাপকক ধৰ্ষণৰ ভাবুকি!
২. নখত হোৱা ভেঁকুৰৰ সংক্ৰমণঃ এইবিধো আন এবিধ ভৰিৰ নখত হোৱা সমস্যা বা ৰোগ। এই সমস্যাত ৰোগাক্ৰান্ত ব্যক্তিৰ ভৰিৰ আঙুলিৰ নখবোৰ ক্ৰমাৎ হালধীয়া ৰঙৰ হ’বলৈ ধৰে আৰু নখবোৰ ডাঠ হৈ ক্ষণভংগুৰ (সহজেই ভঙা)হৈ পৰে।
৩. জ’ক ইচ্ছ বা খজুৱতিঃ সাধাৰণতে কটিবন্ধ (কঁকাল-পেট আৰু উৰুৰ সংযুক্ত অংশ)ত হোৱা দেখা যায়। এইবিধ চৰ্মৰোগত ছাল ৰঙচুৱা পৰি চকলা-চকল ধৰণৰ হ’বলৈ ধৰে। এইবিধ চৰ্মৰোগে সাধাৰণতে নাৰীৰ তুলনাত পুৰুষক অধিক আক্ৰান্ত কৰা দেখা যায়।
৪. মূৰৰ তালুত হোৱা খৰঃ এইবিধ আঙুঠিৰ আকৃতিৰ খৰ সাধাৰণতে শিশুৰ ক্ষেত্ৰত হোৱা দেখা যায়। খজুৱতি আৰু খৰৰ দুঃপ্ৰভাৱত মূৰৰ চুলি সৰি যায়। পিছে উপযুক্ত চিকিৎসাৰ জৰিয়তে সেই চুলি ঘূৰাই অনা সম্ভৱ।
৫. খৰঃ কম-বেছি পৰিমাণে প্ৰায়বোৰ লোকেই জীৱনকালত এই ৰোগৰ সন্মুখীন হোৱা দেখা যায়। এইবিধ এবিধ অতি সুলভ বা সহজেই হোৱা চৰ্মৰোগ, যি বিয়পেও সহজে। আঙুঠিৰ দৰে আকাৰৰে হোৱা এইবিধ খৰে তীব্ৰ খজুৱতি আৰু জ্বলা-পুৰাৰ সৃষ্টি কৰে। আৰু চিকিৎসা অবিহনে এই ৰোগ দীৰ্ঘস্থায়ী হোৱাৰ সম্ভাৱনা থাকে।
৬. খমিৰ(ইষ্ট)ৰ ফলত হোৱা সংক্ৰমণঃ এবিধ খমিৰ বা ভেঁকুৰৰ ফলত এইবিধ সংক্ৰমণ হয়। যেতিয়া এই খমিৰবিধ অত্যধিক মাত্ৰাত বৃদ্ধি পাবলৈ ধৰে, তেতিয়াই এই ৰোগে গা কৰি উঠে। এইবিধ সংক্ৰমণ সাধাৰণতে মানৱদেহৰ উষ্ণ, তেলেতীয়া অংশ আদিত সহজে হোৱা দেখা যায়। এই ৰোগে ব্যক্তি এজনৰ কাষলতি, কটিবন্ধ, নখ, মুখগহ্বৰ আৰু নাৰীৰ ক্ষেত্ৰত যৌনাঙ্গ পৰ্যন্ত সংক্ৰমিত হ’ব পাৰে।
লগতে পঢ়ক মুখ্যমন্ত্ৰী মানৰ পুনৰ চমক! ৪২৪ ভিআইপিৰ নিৰাপত্তাৰক্ষী তাৎক্ষণিকভাৱে কৰ্তন
দেহৰ অন্যান্য ৰোগে যিদৰে আমুৰি দিয়ে ঠিক একেদৰেই চৰ্মৰোগত আক্ৰান্ত ব্যক্তি এজনে অনুভৱ কৰিব পাৰে যে ইয়াৰ দ্বাৰা আক্ৰান্ত হোৱাৰ যন্ত্ৰণা কিমান! পৰ্যাপ্ত পৰিমাণে চাফ-চিকুণতা বজাই চলিও বহু সময়ত এজন ব্যক্তি এনেদৰে ভেঁকুৰৰ ফলত হোৱা চৰ্মৰোগৰ পৰা হাত সাৰিব নোৱাৰে। এনে ৰোগত ভূগিলে ৰোগৰ প্ৰাদুৰ্ভাৱ বৃদ্ধি পোৱাৰ আগেয়েই অৰ্থাৎ ৰোগে অসহনীয় ৰূপ লোৱাৰ পূৰ্বেই চৰ্মৰোগৰ চিকিৎসকৰ সহায় লওক আৰু উপযুক্ত চিকিৎসাৰ দ্বাৰা চৰ্মৰোগৰ জটিলতাৰ পৰা মুক্তি লভক। এইক্ষেত্ৰত প্ৰথমেই কৰণীয় হৈছে যে যিমান সোনকালে পাৰে, কোনো চৰ্মৰোগ বিশেষজ্ঞৰ কাষ চাপক আৰু চিকিৎসকৰ পৰামৰ্শ অনুসৰি প্ৰয়োজনীয় সময়ৰ বাবে চিকিৎসা অব্যাহত ৰাখক। ছালত ইতিমধ্যে হোৱা ৰোগক আৰু বেছিকৈ প্ৰসাৰিত হ’বলৈ নিদিবৰ বাবে নিজে ল’ব পৰা কেইটিমান উপায় তলত দিয়া হৈছে—
ক) ৰোগগ্ৰস্ত ছালৰ অংশখিনি যিমান পাৰে শুকানে ৰাখক।
খ) দিনে দুবাৰকৈ অন্তৰ্বাস সলনি কৰক।
গ) সঘনাই মোজা সলনি কৰক।
ঘ) অন্তৰ্বাসবোৰ ধুই ৰ’দত ওলটাই শুকুৱাওক।
ঙ) ঘৰৰ কোনো সদস্যলৈ যদি ৰোগৰ সংক্ৰমণ ঘটিছে, তেন্তে তেওঁৰো ততালিকে চিকিৎসা কৰাওক।
লেখক- এম ডি, ডাৰ্মাট’লজী আৰু যৌনৰোগ বিশেষজ্ঞ, মেডিচিটি গুৱাহাটী। ফোন-৯১৯৭০৭০৪৮৬১৬
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
