বৰ্তমান সময়ত গাড়ী এখন চখ নহয় প্ৰয়োজনত পৰিণত হৈছে৷ বহু লোকে এখন নতুন গাড়ী কিনিবলৈ কোনো উৎসৱ পাৰ্বণলৈ অপেক্ষা কৰে৷ কাৰণ উৎসৱ পাৰ্বনত গাড়ী কোম্পানীসমূহে প্ৰায়েই ভাল অফাৰ দিয়ে৷ নতুন বছৰ আহিব, এই নতুন বছৰতো বহুতেই বাহন কিনিবলৈ ইতিমধ্যেই সাজু হৈছে৷ কিন্তু বৰ্তমান সকলোৰে ধাৰণা থাকে যে এখন দামী গাড়ী কিনাটোৱেই উত্তম কথা৷ অৱশ্যে কিমান দামী বাহন আপোনাৰ বাবে উপযুক্ত হ’ব সেয়া কেনেকৈ নিৰ্ধাৰণ কৰা হয় জানেনে?
এখন বাহন ক্ৰয় কৰাৰ পূৰ্বে আপুনি ঘৰতেই ঠিক কৰি পেলাই যে আপুনি কোনখন বাহন ক্ৰয় কৰিব, বাজেট কিমান হ’ব৷ কিমান ঋণ ৰাখিব? বিশাল EMI দিয়াত আপোনাৰ অসুবিধা নহয়তো? এই সকলো বিষয় চালিজাৰি চাইহে এখন বাহন ক্ৰয় কৰিব লাগে৷ কোনোৱে যদি নতুন বাহন এখন ঘৰলৈ আনিব খোজে তেন্তে পোনতেই এটা কথাত মন দিয়ক যে আপোনাৰ বছৰি ইনকাম কিমান? আপোনাৰ হাতলৈ মাহিলী কিমান ধন আহে?
এক সূত্ৰৰ সহায়ত আপুনি এই হিঁচাপ কৰিব পাৰে৷ কোনোৱে যদি বেংক লোন লৈ বাহন কিনাৰ পৰিকল্পনা কৰিছে তেন্তে তেওঁ প্ৰথমেই বিভিন্ন বেংকলৈ গৈ কাৰলোন সম্পৰ্কে সবিশেষ জানি ল’ব লাগে৷ ইয়াৰোপৰি ৫০/২০/৪/১০ ফৰ্মূলাৰো প্ৰয়োগ কৰিব পাৰে৷ এই ফৰ্মূলা প্ৰয়োগ কৰি বাহন কিনিলে আপুনি কেতিয়াও ধনৰ অভাৱত নপৰে৷
বাৰ্ষিক আয়ৰ অৰ্ধেক দামত এখন বাহন ক্ৰয় কৰা উচিত
ফৰ্মূলা ৫০/২০/৪/১০ইয়াৰ ৫০ মানে কাৰোবাৰ বাৰ্ষিক আয়ৰ ৫০শতাংশ৷ যেতিয়া এখন বাহন কিনে তেতিয়াই সিদ্ধান্ত লৈ লওক যাতে আপোনাৰ বাহনৰ দাম বাৰ্ষিক আয়ৰ আধা হয়৷ ধৰা হ’ল কাৰোবাৰ বাৰ্ষিক দৰমহাৰ পেকেজ ১২ লাখ টকা তেতিয়া তেওঁ ৬লাখ টকাৰহে বাহন ক্ৰয় কৰা উচিত৷ অযথা দামী গাড়ী কিনিলে বাজেটত অসুবিধা আহিব৷ সেই ফৰ্মূলাৰেই ২০/৪/১০ৰ অৰ্থ হৈছে ২০ মানে ২০শতাংশ ডাউন পেমেণ্ট৷ ইয়াৰ অৰ্থ কোনোৱে যদি ৬লাখ টকাৰ এখন বাহন কিনে তেতিয়া তেওঁ ১,২০,০০০ টকা ডাউন পেমেণ্ট দিয়াটো জৰুৰী৷ ইয়াতকৈ বেছি দিব পাৰিলে ভাল কিন্তু কম দিয়া উচিত নহয়৷ ইয়াত ৪মানে লোনৰ ম্যাদ অৰ্থাৎ সেই বাহনৰ লোনৰ ম্যাদ ৪বছৰৰ বেছি হোৱা উচিত নহয়৷ এতিয়া ১০ মানে EMIৰ পৰিমাণ বাৰ্ষিক দৰমহাৰ ১০শতাংশতকৈ বেছি হোৱা উচিত নহয়৷
৪,৮০,০০০ টকাত কিমান EMI আহিব?
ধৰা হ’ল কোনোৱে যদি ৬লাখ টকাৰ বাহন কিনিছে যাৰ মাজত তেওঁ ২০শতাংশ হাৰত ১,২০,০০০ টকা ডাউন পেমেণ্ট দিছে তেতিয়া তেওঁৰ লোন হ’ব ৪,৮০০০০ টকা৷ ধৰা হ’ল SBIৰ পৰা এই কাৰ লোন লৈছে তেতিয়া হ’লে ৯.২% সুদৰ হাৰত এই লোনটো পোৱা গৈছে আৰু এই লোনৰ ম্যাদ ৪ বছৰ৷ এই ক্ষেত্ৰত প্ৰতি মাহে EMI হিচাপে ১১,৯৯০ টাকা দিব লাগিব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
