বৰ্তমান অধিক লাভৰ লোভত বহু অসাধু ব্যৱসায়ীয়ে আটাত ষ্টোন পাউডাৰ মিহলাই বিক্ৰী কৰা ঘটনাই জনসাধাৰণৰ মাজত গভীৰ উদ্বেগৰ সৃষ্টি কৰিছে। এই পাউডাৰ ঘেঁহুতকৈ বহুত সস্তা হোৱাৰ বাবে ইয়াক মিহলাই আটাৰ ওজন আৰু পৰিমাণ বৃদ্ধি কৰি অধিক লাভ উপাৰ্জন কৰে অসাধু চক্ৰই। কিন্তু এই সাধাৰণ লাভৰ বাবেই অসাধু চক্ৰই মানুহৰ স্বাস্থ্যৰ প্ৰতি এক ভয়ংকৰ ভাবুকি কঢ়িয়াই আনিছে।
আটাত যি ষ্টোন পাউডাৰ মিহলোৱা হয়, তাক চেলখড়ী বা Soapstone বুলি কোৱা হয়। ই সাধাৰণতে ৰাজস্থানৰ খনিসমূহৰ পৰা সংগ্ৰহ কৰা হয় আৰু কছমেটিকছ, প্লাষ্টিক, পেইণ্ট, কাগজ আৰু মূৰ্তি নিৰ্মাণৰ দৰে শিল্পত ব্যৱহাৰ কৰা হয়। এই পদাৰ্থ খাদ্যৰ বাবে উপযোগী নহয়। ইয়াৰ গুড়ি অতি সূক্ষ্ম হোৱাৰ বাবে আটাত মিহলোৱাৰ পিছতো মুখত বিশেষ খচখচনি অনুভৱ নহয় আৰু ৰুটিৰ ৰং, সোৱাদ বা গঠনত সহজে কোনো পাৰ্থক্য ধৰা নপৰে।
ষ্টোন পাউডাৰৰ উপৰিও আটাত খড়িয়া মাটি, সস্তীয়া ষ্টাৰ্চ, অত্যাধিক চোকৰ, ময়দা, চাউল বা মাকৈৰ গুড়ি, আনকি পচা বা ভেঁকুৰ লগা গঁহুৰে প্ৰস্তুত কৰা আটা মিহলাই ভেজাল কৰাৰ ঘটনাও সময়ে সময়ে পোহৰলৈ আহে। এনে ভেজালযুক্ত আটা নিয়মীয়াকৈ খালে পাচনতন্ত্ৰৰ ওপৰত বেয়া প্ৰভাৱ পৰে। দীঘলীয়া সময়লৈ এনে খাদ্য গ্ৰহণ কৰিলে বৃক্ক আৰু যকৃতৰ ওপৰত অতিৰিক্ত চাপ সৃষ্টি হয়, যাৰ ফলত এই অংগসমূহ ক্ষতিগ্ৰস্ত হোৱাৰ আশংকা বৃদ্ধি পায়। সেয়েহে ইয়াক এক প্ৰকাৰৰ ‘Slow Poison’ বুলিও কোৱা হয়।
কেৱল খালী চকুৰে এনে ভেজাল আটা সহজে ধৰা নপৰে। ষ্টোন পাউডাৰ অতি সূক্ষ্ম আৰু বগা হোৱাৰ বাবে আটাৰ ৰং, গঠন বা ৰুটিৰ সোৱাদত বিশেষ পাৰ্থক্য নাথাকে। অৱশ্যে ভেজাল আটা চিনাক্তকৰণৰ ক্ষেত্ৰত কিছুমান ঘৰুৱা পৰীক্ষাৰ সহায় ল’ব পাৰি যদিও নিশ্চিত ফলাফলৰ বাবে অনুমোদিত খাদ্য পৰীক্ষাগাৰত নমুনা পৰীক্ষা কৰোৱাটোৱেই উত্তম।
পেকেটিং আটা কিনোঁতে কেৱল ব্ৰেণ্ডৰ ওপৰত নিৰ্ভৰ নকৰি পেকেটৰ FSSAI লাইচেঞ্চ নম্বৰ, উৎপাদনৰ তাৰিখ, ম্যাদ, পেকেজিঙৰ মানদণ্ড আৰু অন্যান্য তথ্য ভালদৰে পৰীক্ষা কৰা উচিত। আনহাতে খোলা আটা কিনোঁতে কেৱল কম দামলৈ লক্ষ্য নকৰি দোকানখনৰ পৰিষ্কাৰ-পৰিচ্ছন্নতা, আটাৰ গুণগত মান আৰু বিক্ৰেতাৰ বিশ্বাসযোগ্যতাকো সমান গুৰুত্ব দিব লাগে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
