দুয়ো নাৰীয়েই স্বামীক লৈ অতিষ্ঠ! সমলিংগৰ প্ৰতি আকৰ্ষিত নহ’লেও দুই মহিলাই কৰিলে আচৰিত কাম

দুই মহিলা ইনষ্টাগ্ৰামৰ মাধ্যমেৰে এগৰাকীয়ে আনগৰাকীৰ সৈতে পৰিচিত হৈছিল৷ তাৰপিছতেই বন্ধুত্ব৷ কথাবতৰাৰ মাজত দুয়োৱে জানিব পাৰে দুয়োৰে জীৱনযন্ত্ৰণাৰ কথা৷ তাৰপিছতেই দুয়োগৰাকীয়ে মিলি ল’লে আচৰিত সিদ্ধান্ত৷

স্বামীয়ে মদ্যপান কৰি অত্যাচাৰ কৰে৷ গাত হাত তোলে৷ অকথ্য গালিগালাজ৷ দিনৰ পাছত দিন ধৰি সকলো সহ্য কৰি কৰি অসহ্য হৈ পৰিছিল দুয়োগৰাকী মহিলাই৷ কথা প্ৰসংগত দুজনৰেই দাম্পত্যৰ কৰুণ অৱস্থা মিলি যায়৷ আলাপৰ পাছত ৬ বছৰ ধৰি দুয়োৰে মাজত কথা বতৰা হোৱাৰ পাছত দুই নাৰী মিলি লয় এক হোৱাৰ সিদ্ধান্ত৷

উত্তৰপ্ৰদেশৰ গোৰখপুৰৰ দুই মহিলাই নিজৰ মদাপী স্বামীৰ অত্যাচাৰৰ কাৰণেই নিজৰ ঘৰ এৰি এগৰাকীয়ে আনগৰাকীক বিয়া কৰাইছে৷ এগৰাকী কবিতা আৰু আনগৰাকী গুঞ্জা নামৰ দুই নাৰীয়ে গোৰখপুৰৰ এটা শিৱ মন্দিৰত গৈ বিবাহৰ বিধি সম্পূৰ্ণ কৰিছে৷

বিবাহৰ সময়ত গুঞ্জাই স্বামী হিচাপে ভূমিকা গ্ৰহণ কৰি কবিতাৰ শিৰত আঁকি দিয়ে সেন্দুৰ৷ তাৰপাছতেই মালা সাল সলনি কৰি দুয়োৱে বিবাহ সম্পূৰ্ণ কৰে৷

গুঞ্জাই সংবাদ সংস্থা PTIক জনাই যে, আমি আমাৰ স্বামীৰ মদ্যপান আৰু অত্যাচাৰত অতিষ্ঠ হৈ পৰিছিলো৷ সেয়ে আমি আমাৰ শান্তি আৰু ভালপোৱাৰ জীৱন বাচি ল’বলৈ বাধ্য হৈছো৷ আমি গোৰখপুৰতে একেলগে থকাৰো সিদ্ধান্ত লৈছো৷ দুয়ো দুয়োৰে সৈতে একেলগে থকাৰ বাবে দৃঢ় প্ৰতিজ্ঞ বুলিও জনাইছে৷ বৰ্তমান দুয়োৰে স্থায়ী বাসস্তানৰ ব্যৱস্থা নাই সেয়ে এটা ঘৰ ভাড়া কৰাৰ পৰিকল্পনা কৰিছে দুয়োৱে৷