অসম লাইভ ২৪ঃ ৰাজ্যৰ বাবে আন এক ভয়াৱহ খবৰ৷ অৰুণাচলত পুনৰ ১০২টা জলবিদ্যুৎ প্ৰকল্প স্থাপনৰ পূৰ্ব প্ৰস্তুতি সম্পূৰ্ণ৷ ইতিমধ্যে ৰঙানদী প্ৰকল্পৰ কুফল ভুগি আছে লখিমপুৰৰ ৰাইজে৷ বাৰিষা কালৰূপ প্ৰকল্পৰ পানী এৰি দিয়াৰ পৰিণতিত লখিমপুৰৰ বিস্তৃত অঞ্চল প্ৰতি বছেৰ প্লাৱিত হয়৷ বিধ্বস্ত হয় খেতিপথাৰ৷ হাহাকাৰ অৱস্থাৰ সৃষ্টি হয় জিলাখনৰ ৰঙানদী আৰু ডিক্ৰংপৰীয়া ৰাইজৰ মাজত৷ আৰু খৰালি এখন মৃত নদীত পৰিণত হয় ৰঙানদী৷ ৰঙানদী প্ৰকল্পই ৰঙানদী আৰু ডিক্ৰং নদীৰ পাৰিপাৰ্শ্বিকতা ধ্বংস কৰিছে৷ ৰঙানদী আৰু নামনি সোৱণশিৰি প্ৰকল্পৰ বিৰুদ্ধে দীৰ্ঘদিন ধৰি বিভিন্ন দল-সংগঠনে আন্দোলন কৰি আহিছে যদিও চৰকাৰ অথবা নিৰ্মাণকাৰী প্ৰতিষ্ঠানৰ কোনো পক্ষৰে গুৰুত্ব নাই৷ ৰাইজৰ জীৱন-সম্পত্তিৰ নিৰাপত্তাক গৌণ কৰি প্ৰকল্প নিৰ্মাণত উঠিপৰি লাগিছে নিৰ্মাণকাৰী সংস্থা৷ এনে প্ৰেক্ষাপটত পুনৰ অৰুণাচলত ১০২টা জলবিদ্যুৎ প্ৰকল্প স্থাপনৰ বাবে কেন্দ্ৰই পূৰ্ব প্ৰস্তুতি প্ৰায় সম্পূৰ্ণ কৰি তুলিছে৷ দিবাং, কামেং, লোহিত আদি নৈত এই প্ৰকল্পসমূহ স্থাপনৰ প্ৰস্তুতি চলাইছে৷ এই প্ৰকল্পসমূহৰ অনুমোদন পূৰ্বেই হৈছিল, যদিও সম্প্ৰতি ইয়াৰ পূৰ্ব প্ৰস্তুতি সম্পূৰ্ণ হোৱাৰ খবৰ বিয়পি পৰাৰ লগে লগে আতংকিত হৈ পৰিছে লখিমপুৰীয়া ৰাইজ৷
এই প্ৰকল্পসমূহৰ কেইবাটাও এছিয়াৰ ভিতৰতে বৃহৎ বুলি জানিব পৰা গৈছে৷ ৪০৫ মেগাৱাটৰ ৰঙানদী প্ৰকল্প আৰু নিৰ্মাণ সম্পূৰ্ণ নোহোৱা নামনি সোৱণশিৰি প্ৰকল্পই ইতিমধ্যে লখিমপুৰক বিধ্বস্ত কৰি ৰখাৰ সময়তে পুনৰ অৰুণাচলত ১০২টা জলবিদ্যুৎ প্ৰকল্প স্থাপনৰ খবৰে অসমৰ বাবেই নহয়, উত্তৰ-পূবৰ প্ৰতিয়েই অশনি সংকেত কঢ়িয়াই আনিছে৷
লখিমপুৰৰ পৰা জীৱন গোস্বামী, অসম লাইভ ২৪
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
