চৰকাৰৰ সিদ্ধান্ত আৰু প্ৰশাসনৰ গুৰুদায়িত্ব। ক্ৰমাগতভাৱে অব্যাহত আছে চৰকাৰী ভূমি অবৈধ দখলমুক্ত কৰাৰ অভিযান

অসম লাইভ ২৪ঃ চৰকাৰৰ সিদ্ধান্ত আৰু প্ৰশাসনৰ গুৰুদায়িত্বৰে ক্ৰমাগতভাৱে অব্যাহত আছে চৰকাৰী ভূমি অবৈধ দখলমুক্ত কৰাৰ অভিযান। লামদিং বনাঞ্চল, গৰুখুঁটি, কাজিৰঙাৰ এনিমেল ক’ৰিডৰত বুলড’জাৰ চলাৰ পাছত চৰ খালী কৰাৰ জাননী ধিং আৰু ঢেকীয়াজুলিৰ কেইবাটাও চৰৰ ৰাইজলৈ। এইবাৰ ঢেকীয়াজুলিৰ মুছলেম চাপৰিবাসীয়ে লাভ কৰিছে চাপৰি খালী কৰাৰ জাননী। হাহাকাৰ লাগিছে চাপৰিবাসীৰ মাজত। মুছলেম চাপৰিত প্ৰায় এক লাখ লোকৰ বসতি। এইসকল সংখ্যালঘু লোকৰ হাতে হাতে আছে ভাৰতীয় নগৰিকৰ নথিপত্ৰ।  ইয়াৰে বহু ভোটাৰ বৰছলা, তেজপুৰ সমষ্টিৰ। কিন্তু এওঁলোক এতিয়া শংকিত। এই মানুহবোৰ চৰলৈ আহিছিল ধিং, লাহৰিঘাট, ৰূপহীহাট আদিৰ পৰা। খহনীয়াত সৰ্বস্বান্ত লোক এইসকল। কংগ্ৰেছৰ শাসনকালত মুছলেম চৰবাসীয়ে লাভ কৰিছিল স্বাস্থ্য, শিক্ষা আদিৰ সা-সুবিধা। কিন্তু শাসক সলনি হ’ল। সলনি হ’ল নীতি। এইবাৰ এওঁলোক পৰিণত হ’ল অবৈধ দখলকাৰীৰূপে। ঢেকীয়াজুলিৰ চৰ অঞ্চলত শীঘ্ৰেই প্ৰশাসনৰ উচ্ছেদ অভিযান চলিব। শোণিতপুৰৰ অভিভাৱক মন্ত্ৰী পিযুষ হাজৰিকা, মন্ত্ৰী অশোক সিংহল, বিধায়ক গণেশ লিম্বুৱে কিছুদিন পূর্বে ঢেকিয়াজুলি পৰিদৰ্শন বাংলাত শোণিতপুৰ প্ৰশাসনৰ সৈতে এক বৈঠকত মিলিত হৈ বেদখলকাৰীৰ উচ্ছেদৰ বিষয়ে আলোচনা কৰে। এই বৈঠকৰ পাছতে আৰু অধিক স্পষ্ট হৈ পৰিল উচ্ছেদৰ বিষয়টো। ইতিমধ্যে বেদখলকাৰীলৈ জাননীও প্ৰেৰণ কৰিছে। কিন্তু এতিয়া বিবুদ্ধিত পৰিছে চৰবাসী। সংস্থাপনৰ দাবীত সাব্যস্ত কৰিছে প্ৰতিবাদ। কি হ’ব এওঁলোকৰ ভৱিষ্যৎ? ক’লৈ যাব, কি কৰিব মানুহবোৰে? গুৰুত্ব পাবনে এওঁলোকৰ প্ৰতিবাদে।

ঢেকীয়াজুলিৰ পৰা জেহেৰুল ইছলাম, অসম লাইভ 24

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ