আৰ বি আইয়ে চলিত বছৰত মুঠ ১.২৫ শতাংশ ৰেপো ৰেট কমাইছে৷ সদ্য ০.২৫ শতাংশ কমোৱা হৈছে ৰেপো ৰেট৷ এই সংশোধনে ফিক্সড ডিপোজিট ৰেটক প্ৰভাৱিত কৰিছে আৰু দেশৰ বৃহত্তম ৰাষ্ট্ৰায়ত্ত বেংক ষ্টেট বেংক অফ ইণ্ডিয়াই নিৰ্দিষ্ট কিছু এফ ডি স্কিমৰ সুদৰ হাৰ সংশোধন কৰিছে৷ বিনিয়োগকাৰীসকলৰ বাবে সুখবৰ হৈছে এছ বি আইৰ নিৰ্দিষ্ট ম্যাদৰ স্কিমে এতিয়াও ভাল ৰিটাৰ্ণ দিছে৷ আপুনি যদি এক নিৰাপদ বিনিয়োগৰ মাধ্যমেৰে ৮৩, ৬৫২ টকা পৰ্যন্ত নিশ্চিত লাভ কৰিব খোজে তেন্তে এই প্ৰতিবেদন আপোনাৰ বাবে অত্যন্ত গুৰুত্বপূৰ্ণ৷
৭দিনৰ পৰা ১০ বছৰ পৰ্যন্ত বিনিয়োগৰ সুবিধা
ষ্টেট বেংক অফ ইণ্ডিয়াই তেওঁলোকৰ গ্ৰাহকক ৭দিনৰ পৰা ১০ বছৰ পৰ্যন্ত দীৰ্ঘ সময়ৰ বাবে বিনিয়োগৰ সুবিধা দিয়ে৷ বৰ্তমান এছ বি আইয়ে ৩.০৫ শতাংশৰ পৰা ৭.০৫ শতাংশ পৰ্যন্ত আকৰ্ষণীয় সুদৰ হাৰ অফাৰ কৰিছে৷ বেংকৰ সকলোতকৈ জনপ্ৰিয় স্কিম হৈছে ৪৪৪ দিনৰ অমৃত বৃষ্টি৷ এই প্ৰকল্পত সাধাৰণতে নাগৰিকসকলৰ বাবে ৬.৪৫ শতাংশ আৰু প্ৰবীণ নাগৰিকসকলৰ বাবে ৬.৯৫ শতাংশ ৰিটাৰ্ণ দিয়ে৷ ইয়াৰোপৰি ১ৰ পৰা ২ বছৰৰ ম্যাদৰ আমানতৰ ওপৰত সাধাৰণ গ্ৰাহকসকলৰ বাবে ৬.১০ শতাংশ আৰু প্ৰবীণ নাগৰিকসকলৰ বাবে ৬.৬০শতাংশ সুদ দিয়া হয়৷
২লাখৰ বিনিয়োগত ৮৩, ৬৫২ টকা কেনেকৈ আয় হ’ব?
যিসকলে দীৰ্ঘ সময়ৰ বাবে তেওঁলোকৰ ধন নিৰাপদে ৰাখি এক নিশ্চিত আয় কৰিব খোজে তেওঁলোকৰ বাবে এছ বি আইৰ ৫ বছৰৰ এফ ডি স্কিম আদৰ্শ৷ আপোনাৰ বয়স যদি ৬০ বছৰতকৈ কম হয় আৰু আপুনি সাধাৰণ বিভাগৰ অন্তৰ্ভুত হয় তেতিয়া আপুনি ৫ বছৰৰ এফ ডিত বাৰ্ষিক ৬.০৫ শতাংশ সুদ পাব৷ এই পৰিস্থিতিত ৫ বছৰৰ পাছত আপুনি ২,০০,০০০ টকাৰ মুঠ বিনিয়োগৰ ওপৰত ৭০, ০৩৫ টকা নিৰ্দিষ্ট সুদ পাব৷ যিয়ে আপোনাৰ ম্যাদপূৰ্তিৰ পৰিমাণক ২,৭০,০৩৫ টকালৈ লৈ যাব৷
অন্যহাতে এছ বি আই সকলো সময়তে প্ৰবীণ নাগৰিকৰ প্ৰতি বেছি উদাৰ৷ ৬০ বছৰ বা তাতকৈ বেছি বয়সীয়া প্ৰবীণ নাগৰিকসকলে ৫ বছৰৰ ম্যাদত ফিক্সড ডিপোজিট কৰিলে ৭.০৫ শতাংশ হাৰত এক স্থিতিশীল ৰিটাৰ্ণ পায়৷ যদি এজন প্ৰবীণ নাগৰিকে ৫ বছৰৰ বাবে ২০০,০০০ টকা জমা কৰে তেন্তে ম্যাদপূৰ্তিত তেওঁ মুঠ ২,৮৩,৬৫২ টকা পাব৷ ইয়াৰ মাজত সুদৰ পৰিমাণ হব ৮৩, ৬৫০টকা৷ যি আজিৰ পতনশীল বজাৰৰ এটা খুবেই ভাল আৰু নিৰাপদ ৰিটাৰ্ণ হিচাপে বিবেচিত হয়৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
