অসম লাইভ২৪ঃ H3N2 ভাইৰাছৰ সংক্ৰমণ ভয়ংকৰ হৈ উঠিছে৷ বৰ্তমানলৈ এই ভাইৰাছত আক্ৰান্ত হৈ মৃত্যু হৈছে দেশৰ দুগৰাকী লোকৰ৷ মৃত দুগৰাকীৰ এজন হাৰিয়ানাৰ আৰু আনজন কৰ্ণাটকৰ বাসিন্দা৷ মৃত্যুৰ সংখ্যা আৰু বৃদ্ধি পোৱাৰো সম্ভাৱনা আছে৷ চিকিৎসকে প্ৰকাশ কৰাৰ মতে এই ভাইৰাছে আৰু কঠিন ৰূপ লোৱাৰো সম্ভাৱনা আছে৷ ভাইৰাছৰ সংক্ৰমণৰ পৰা ৰক্ষা পাবৰ বাবে লবলগীয়া সাৱধানতাৰ কথাও উল্লেখ কৰিছে চিকিৎসকে৷
H3N2 ভাইৰাছে বিগত ছমাহৰ ভিতৰতেই সংক্ৰামক ৰূপ ধাৰণ কৰিছে বুলি উল্লেখ কৰিছে চিকিৎসকে৷ এই ভাইৰাছৰ নাম দিয়া হৈছে হংকং ফ্লু৷ ইনফ্লুয়েঞ্জা ভাইৰাছৰ তুলনাত এই ভাইৰাছ অধিক সংক্ৰামক৷ এই ভাইৰাছে শ্বাসনলীৰ লগতে হাওঁফাওঁতো বিশেষভাৱে প্ৰভাৱ পেলাই৷ শিশুসকলকো বাহিৰলৈ উলিয়াই নিওতে বিশেষভাৱে সাৱধানতা অৱলম্বন কৰাটো অতি জৰুৰী৷
স্বাস্থ্য মন্ত্ৰালয়ে প্ৰকাশ কৰা ৰিপোৰ্ট অনুযায়ী কৰ্ণাটকত H3N2ত আক্ৰান্ত হৈ মৃত্যু হোৱা ব্যক্তিগৰাকীৰ বয়স প্ৰায় ৮২ বছৰ৷ মৃত ব্যক্তিগৰাকী ডায়াবেটিছ আৰু উচ্চ ৰক্তচাপ জনিত ৰোগতো আক্ৰান্ত আছিল৷ চিকিৎসকে এই ৰোগক লৈ দিয়া প্ৰতিবেদনত উল্লেখ কৰামতে বয়স্ক লোকসকলে বিশেষ সতৰ্কতা অৱলম্বন কৰাটো অতি জৰুৰী৷ বিশেষকৈ যিসকল লোকৰ শ্বাস-প্ৰশ্বাসজনিত সমস্যা আছে, হাৰ্টৰ সমস্যা আছে তেওঁলোকে ঘৰৰ বাহিৰলৈ যাওঁতে সতৰ্ক হোৱাটো অতি জৰুৰী৷
শিশুসকলো এই ভাইৰাছত সহজেই আক্ৰান্ত হ’ব পাৰে৷ সেয়ে শিশু একোটাক পৰাপক্ষত জনসমাগমৰ পৰা আঁতৰাই ৰাখিব লাগে৷ বতৰৰ পৰিবৰ্তনৰ সৈতেও এই ভাইৰাছ অধিক সংক্ৰামক হৈ পৰিছে৷ কভিডৰ প্ৰকোপ কিছু ক্ষাম কটাৰ লগে লগেই আমি মাস্ক পৰিধান কৰিবলৈকো পাহৰি পেলাইছো৷ H3N2 সংক্ৰমণৰ পৰা ৰক্ষা পাবৰ বাবে মাস্ক পিন্ধাটোও অতি জৰুৰী৷ সঘনাই হাত ধোৱাটোও অতি জৰুৰী৷ সকলো সময়তে পানী লগত নাথাকিবও পাৰে সেয়ে ছেনিটাইজাৰেৰে হাত পৰিস্কাৰ কৰাটো প্ৰয়োজন৷ লেতেৰা হাতেৰে মুখ, চকু, নাক স্পৰ্শ কৰিব নালাগে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
