আজিৰ খেলখনত ভাৰত জয় হোৱাটো কিমান প্ৰয়োজনীয়, ছুপাৰ ৮ৰ সমীকৰণ কি…
টি ২০ বিশ্বকাপৰ ছুপাৰ ৮ৰ আজিৰ খেল ভাৰতীয় দলৰ বাবে অতি গুৰুত্বপূৰ্ণ বুলি বিবেচিত হৈছে। আফগানিস্তান দলক পৰাস্ত কৰি ভাৰতে ছুপাৰ ৮ৰ আৰম্ভণি কৰিছিল, এতিয়া ছেমি ফাইনেলৰ টিকট নিশ্চিত কৰাৰ উদ্দেশ্য খেলপথাৰত নামিব।
আজিৰ খেলখন অতি গুৰুত্বপূৰ্ণ কাৰণ আজিৰ খেলখনৰ পাছত ভাৰতে ছেমি ফাইনেলত প্ৰৱেশৰ ওচৰ চাপিব। কিন্তু মেচখনত বৰষুণে বিধি-পথালি দিয়াৰ সম্ভাৱনা, যদিহে বৰষুণ হয়, তেন্তে ভাৰত-বাংলাদেশৰ মেচখনৰ লগত জড়িত সকলো সমীকৰণ সলনি হৈ পৰিব।
যদি বৰষুণৰ বাবে ভাৰত আৰু বাংলাদেশৰ খেল অনুষ্ঠিত হব নোৱাৰে তেন্তে দুয়োটা দলৰ মাজত ১-১ পইণ্ট বিতৰণ কৰা হ’ব। ইয়াৰ দ্বাৰা ভাৰতীয় দলটোৰ বাবে বিশেষ লাভ নহলেও লোকচান নহয়। কিন্তু বাংলাদেশৰ শেষৰখন খেল হ’ব ডু অৰ ডাই। আনহাতে ভাৰতে যদি আজিৰ মেচত জয়লাভ কৰে তেন্তে মুঠ ৪ পইণ্টেৰে ছেমি ফাইনেলৰ টিকট নিশ্চিত হ’ব। মেচ বাতিল হ’লে, পইণ্ট ভাগ হৈ ভাৰতৰ মুঠ ৩ পইণ্ট হোৱাৰ বিপৰীতে বাংলাদেশৰ ১ পইণ্ট হব।
সেয়ে যদিহে আজিৰ খেল বাতিল হয়, তেন্তে ভাৰতে শেষৰখন লীগ মেচত জয়ী হৈ ছেমি ফাইনেলত প্ৰৱেশ কৰাৰ সুযোগ পাব। অষ্ট্ৰেলিয়াৰ সৈতে অন্তিমখন খেল খেলিব লাগিব ভাৰতে। এই পৰ্যন্ত ভাৰত আৰু অষ্ট্ৰেলিয়াই এখন এখন খেলত জয়লাভ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
