অসম লাইভ ২৪ ডিজিটেল ডেস্কঃ ইছলামাবাদস্থিত ভাৰতীয় উচ্চায়ুক্তৰ কার্যালয়ৰ দুই বিষয়া পুৱা ৮ বজাৰে পৰা সন্ধানহীন হৈ থকাৰ তথ্য পোহৰলৈ আহিছে৷ ইতিমধ্যে বিষয়টো নতুন দিল্লীয়ে পাকিস্তান চৰকাৰক অৱগত কৰিছে৷ দিনচেৰেক পূর্বে নতুন দিল্লীস্থিত পাক উচ্চায়ুক্তৰ কার্যালয়ৰ দুই বিষয়াৰ বিৰুদ্ধে চোৰাংচোৱাৰ অভিযোগ উত্থাপিত হৈছিল৷ অভিযুক্ত দুয়োগৰাকী বিষয়াই দিল্লীৰ ‘ভিছা ছেকচন’ত কর্মৰত৷ আনহাতে বিগত কিছু দিনত পাকিস্তানত ভাৰতীয় কূটনীতিক হাৰাশাস্তিৰ সন্মুখীন হৈ অহাৰ অভিযোগ উত্থাপিত হৈছে৷ ভাৰতে এই ঘটনাৰ প্ৰতিবাদো জনাইছে৷ পাক চোৰাংচোৱা সংস্থা আইএছআইৰ সদস্যই গৌৰৱ আহলুৱালিয়া নামৰ ভাৰতীয় কূটনীতিকগৰাকীৰ গতিবিধি অনুসৰণ কৰি ফুৰিছে৷ পাকিস্তানস্থিত ভাৰতীয় উচ্চায়ুক্তৰ কার্যালয়ৰ বিষয়া তথা কর্মচাৰীসকল হাৰাশাস্তিৰ সন্মুখীন হোৱাৰ অভিযোগ তুলি ইছলামাবাদৰ পাক বৈদেশিক পৰিক্ৰমা মন্ত্ৰালয়লৈ এক প্ৰতিবাদী পত্ৰ প্ৰেৰণ কৰিছে কার্যালয়টোৰ কর্তৃপক্ষই৷ বিগত মার্চ মাহতে হাৰাশাস্তিৰ ১৩টা ঘটনাৰ প্ৰসংগ উল্লেখ কৰা হৈছে পত্ৰখনত৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
