জীৱনৰ প্ৰতিটো খোজতেই ঠেকা খালেও ক্ৰিকেটৰ ২২ গজত তেওঁ অপৰাজিত সৈনিক, নিৰাশাৰ জুই জ্বলি থকা চকুত কেৱল বিশ্বকাপ জয়ৰ সপোন

অসম লাইভ২৪ঃ ৱাছিম আক্ৰামে কৈছে, ‘মই ইমান ভালধৰণে কাকোৱেই বলিং কৰা দেখা নাই। মহম্মদ ছামিক টোপনিৰ পৰা উঠাই বল কৰিবলৈ দিলেও বোধহয় এই পৰাক্ৰমেৰেই বল কৰিব। এয়া তেওঁৰ কৰ্মৰ ওপৰত থকা আমাৰ দৃঢ়বিশ্বাস।’ মহম্মদ ছামী, বহুতেই ছামীক ছুইঙৰ চুলতান বুলিও কয়। জীৱনত প্ৰতিখন মেচত তেওঁ প্ৰত্যাহ্বানৰ মুখামুখি হ’লেও ক্ৰিকেট মেচক তাৰ প্রভাৱ কাহানিও পৰিবলৈ দিয়া নাই ছামীয়ে। বহু অধ্যবসায়, পৰিশ্ৰম, জেদৰ ফচল ফুলিছে ইডেনৰ পৰা ৱানখেড়ে ষ্টেডিয়ামত।

ছেমিফাইনেলত নিউজিলেণ্ডৰ ডাবল মিচেল আৰু কেন উইলিয়ামছনে যেতিয়া ৪টাকৈ ছক্কা কোৱাইছিল তেতিয়া তেতিয়াই ছামীৰ হাতত বল তুলি দিয়ে ৰোহিত শৰ্মাই। নতুন দুই বলাৰ যশপ্ৰীত বুমৰাহ, মহম্মদ ছিৰাজ থাকিলেও সকলোৰে ভৰসা ছামীৰ ওপৰতেই আছিল। প্ৰথমে আউট কৰিছে উইলিয়ামছনক, তাৰপিছতেই সেই অভাৰতেই টম লাথামকো আউট কৰায় ছামীয়ে। তাৰপিছতেই আৰু তিনিটা উইকেল লৈ ছেমিফাইনেলত ছামীৰ প্ৰথম চাৰি উইকেটেই ভাৰতক ফাইনেলত তুলিছে। ভাৰতে প্ৰথম বেট ধৰি ৩৯৭ ৰান কৰিলেও ছামী নাথাকিলে এই মেচ ৰোহিতবাহিনীয়ে জিকাটো সম্ভৱ নাছিল। ছামীয়ে লোৱা ৭উইকেটেই জয়ৰ দিশে আগুৱাই নিছিল ভাৰতীয় দলটোক।

যিগৰাকী মহম্মদ ছামীৰ সকলোৱে নাম লৈছে তেওঁৰ যাত্ৰা কিন্তু ইমান সহজো নাছিল। উত্তৰপ্ৰদেশৰ সাহসপুৰ নামৰ এখন গাওঁৰ পৰা এজন সাধাৰণ যুৱকে সপোন দেখিছিল ভাৰতীয় দলৰ হৈ ক্ৰিকেট খেলাৰ। খেল আৰম্ভ কৰিলেও কিন্তু উত্তৰপ্ৰদেশৰ দলৰ হৈ খেলাৰো সুযোগ পোৱা নাছিল ছামীয়ে। তাৰপিছতেই তেওঁ কলকাতালৈ আহে। কলকাতা নাইট ৰাইডাৰ্ছৰ হৈ খেলাৰ সুযোগো ইমান সহজে লাভ কৰা নাছিল ছামীয়ে। ছামীৰ বাবে আশীৰ্বাদ হৈ আহিছিল ২০০৮ চন। আইপিএলত কলকাতা নাইট ৰাইডাৰ্ছৰ হৈ খেলাৰ সুযোগ লাভ কৰে ছামীয়ে। আইপিএলত কলকাতা নাইট ৰাইডাৰ্ছৰ হৈ দুবছৰ খেলিছিল মহম্মদ ছামীয়ে। কলকাতাই ক্ৰয় কৰিলেও কিন্তু ছামীয়ে এবাৰো খেলাৰ সুযোগ লাভ নকৰিলে। কেৱল নেটত বলিং কৰিয়েই সময় পাৰ কৰিব লগা হ’ল।

সেই দুবছৰতেই ছামী হৈ উঠিল অপ্ৰতিৰোধ্য। কেকেআৰৰ বলিং কোচৰ পৰা একলব্যৰ দৰেই শিক্ষা গ্ৰহণ কৰিছিল ছামীয়ে। নিজকে প্ৰতিদিনেই তৈয়াৰ কৰিছিল ছামীয়ে। অপেক্ষা কৰিছিল সুযোগলৈ। ২০১৩ চনত পাকিস্তানৰ বিৰুদ্ধে দিল্লীৰ অৰুণ জেটলী ষ্টেডিয়ামত যেতিয়া তেওঁৰ অভিষেক ঘটে তেতিয়াই ছামীক যথেষ্ট আত্মবিশ্বাসীৰূপতেই দেখা গৈছিল। ছামীৰ পাৰফৰমেন্স দেখি মহেন্দ্ৰ সিং ধোনীৰ ওঁঠতো হাঁহি এটাই খেলি গৈছিল। সেই বছৰতেই ক্ৰিকেটৰ সকলো ফৰমেটত ভাৰতীয় দলত অভিষেক হয় মহম্মদ ছামীৰ।

ভাৰতীয় দলত অভিষেক ঘটাৰ পাছতেই এটাৰ পাছত আনটো সাফল্য আহিছে মহম্মদৰ হাতলৈ। খেলৰ সময়ত ওঁঠত হাঁহি বিৰিঙি থকা ছামীৰ ব্যক্তিগত জীৱন কিন্তু ইমান সুখৰ নহয়। পত্নী হাছিন জাহানৰ সৈতে সম্পৰ্কও যথেষ্ট বেয়া। কন্যাক লগত লৈ পত্নী হাছিন পৃথকে থাকে। মহম্মদ ছামীৰ ওপৰত পত্নীয়েই তৰিছে নিৰ্যাতনৰ গোচৰ। বিবাহবিচ্ছেদ বিচাৰি পত্নীয়ে কৰিছে বিশেষ আৱেদন। পাৰিবাৰিক জীৱনৰ ওপৰিও ছামীৰ বিৰুদ্ধে একাংশই ক্ৰয় বিক্ৰয় হোৱাৰো অভিযোগ আনিছিল। সকলোবোৰ নিৰৱেই সহিছে ছামীয়ে। বিষয়সমূহক লৈ প্ৰকাশ্যে কোনোধৰণৰ মন্তব্য কৰা নাই ছামীয়ে। পত্নীক লৈয়ো কাহানিও কোনো কথা কোৱা নাই ছামীয়ে।

ছামীয়ে কেৱল নিজৰ খেলতহে সদায়ে মনোনিৱেশ কৰি আহিছে। ব্যক্তিগত জীৱনৰ প্ৰভাৱ তেওঁ কেতিয়াও খেলত পৰিবলৈ দিয়া নাই। এইবাৰৰ বিশ্বকাপত ছামীয়ে স্থান লাভ কৰিলেও মূল একাদশত স্থান লাভ কৰা নাছিল। কিন্তু একাংশ লোকে তেওঁ বিশ্বকাপ খেলাৰ বাবে সুযোগ পোৱাটোকো সহ্য কৰিব পৰা নাছিল। বহুতেই প্ৰশ্ন কৰিছিল, প্ৰায় এবছৰ ক্ৰিকেট নেখেলা ছামীক কেনেকৈ অজিত আগৰকৰৰ নেতৃত্বাধীন নিৰ্বাচক কমিটিয়ে বাছনি কৰিছে? এই সিদ্ধান্তই দলক ডুবাই দিব। দলত সুযোগ পোৱাৰ পিছতো ছামীয়ে কিন্তু খেলাৰ সুযোগ পোৱা নাছিল।

প্রথম চাৰিখন মেচ বেঞ্চত বহি বহিয়েই কটালে ছামীয়ে। বুমৰাহ আৰু ছিৰাজৰ ওপৰতহে অধিনায়ক ৰোহিতৰ সৰ্বাধিক ভৰষা। লগত আছিল দুই পেচাৰ অলৰাউণ্ডাৰ হাৰ্দিক পাণ্ডিয়া আৰু শাৰ্দূল ঠাকুৰ। ছামীয়ে তেতিয়াও কোনোধৰণৰ প্ৰতিবাদ কৰা নাছিল। সতীৰ্থৰ খেলত হাতচাপৰি বজাই বহি বহিয়েই সময় পাৰ কৰিছিল। এই সময় বিৰক্তিকৰ হ’লেও অপেক্ষাই মনক বুজনি দিছিল। সময় সকলোৰে আহে, ছামীৰো সেই সময় আহিল। হাৰ্দিকে আঘাত পোৱাত সলনি হৈ গ’ল সকলো ছবি। দলৰ ভাৰসাম্য ঠিকে ৰাখিবলৈকে পঞ্চম মেচত লোৱা হ’ল ছামীক। নিউজিলেণ্ডৰ বিৰুদ্ধে সেই মেচতেই ছামীয়ে চমক দেখুবালে। প্ৰথমেই ছামীয়ে লয় ৫উইকেট। তাৰপিছৰ মেচত ৪ আৰু তাৰপিছত আকৌ ৫। মুখেৰে উত্তৰ নিদিয়া ছামীয়ে বলেৰেই যেন প্ৰত্তুত্ত্যৰ দিলে প্ৰতিগৰাকী সমালোচকক।

মেচত একপ্ৰকাৰ জুই লগাই দিলে ছামীয়ে। এজনৰ পাছত আনজন বেটাৰ কঁপি উঠিল। বিশ্বকাপৰ ইতিহাসত ভাৰতৰ একমাত্ৰ বলাৰ হিচাপে ৫০ উইকেট ল’লে ছামীয়ে। চলিত বিশ্বকাপত মাত্ৰ ৬খন মেচত সৰ্বাধিক ২৩ উইকেট ল’বলৈ সক্ষম হয় ছামীয়ে। এই ৰেকৰ্ড গঢ়াৰ পাছত স্বামীয়ে মুখ খুলিছে। ৰেকৰ্ড গঢ়াৰ পাছত ছামীয়ে কয়, ‘সুযোগৰ অপেক্ষা কৰিছিলো। খুব বেছি খেলাৰ সুযোগ নাই পোৱা। কিন্তু সুযোগ হাতলৈ আহোতে কেনেকৈ এৰি দিও? লীগ খেলত নিউজিলেণ্ডৰ বিৰুদ্ধেই প্রথম সুযোগ পাইছিলো। বহুতেই বলিঙত বৈচিত্ৰতাৰ কথা কয়। কিন্তু মোৰ লক্ষ্য সদায়ে স্থিৰ। মই কেৱল সঠিক ঠাইত বল পেলোৱাকহে টাৰ্গেট হিচাপে লও। মই এটা কথাতেই বিশ্বাস কৰো যে, সঠিক ঠাইত বল পেলালে নিশ্চয় উইকেট ল’ব পাৰিমেই।’

ছামীয়ে বৰ বেছি কথা নকয়। কিন্তু ছামীৰ কামেই সকলো কথাৰ উত্তৰ দিয়ে। বাৰে বাৰে একাংশ লোকে কৰা অৱজ্ঞাৰ উত্তৰো তেওঁ কামেৰেই দিছে। নিজৰ স্থানৰ পৰা তেওঁ কেতিয়াও বিচলিত হোৱা নাই। ব্যক্তিগত জীৱনত হাজাৰ সংঘাতকো নেওচি ছামীৰ এটা এটা বলত নাচি উঠিছে ১৪০ কোটি ভাৰতীয়। এইবাৰ বিশ্বকাপ ভাৰতে হয়তো জয় কৰি পেলাবও পাৰে। হয়তো অধিনায়ক হিচাপে ৰোহিত শৰ্মাই ইতিহাসত নিজৰ নাম সন্নিবিষ্ট কৰিবও পাৰে। হয়তো ক্ৰিকেটাৰ হিচাপে নোৱাৰিলেও কোচ হিচাপেই বিশ্বকাপ হাতত তুলি ল’ব পাৰে ৰাহুল দ্ৰাবিড়েও। কিন্তু তেওঁলোকৰ সমান্তৰালকৈ আসন নাথাকিলেও ইতিহাসৰ পৃষ্ঠাত জয়ৰ পূৰ্বেই নাম লিখি পেলালে মহম্মদ ছামীয়ে। এতিয়া কেৱল বিশ্বজয়ৰ সপোন আছে ছামীৰো দুচকুত। বিৰাট, ৰোহিতৰ ওপৰিও এতিয়া এই যুঁজত বহুতেই নিৰ্ভৰ কৰিছে ছামীকো। সকলোৱে এইবাৰ ছামীক পৰবৰ্তী মেচত বিচাৰিলেও ছামীয়ে এই সন্দৰ্ভত পূৰ্বৰ দৰেই নিৰৱ ভুমিকাই গ্ৰহণ কৰি আছে।

অপেক্ষা এতিয়া দেওবাৰৰ দিনটোলৈ। সেই দিনাই বিশ্বৰ সকলোতকৈ ডাঙৰ মেচত হাঁহিমুখে নিজৰ ক্ৰিকেট জীৱনৰ সপোনৰ খেলখন খেলিব ছামীয়ে। ছামীৰ প্ৰতিটো উইকেটতেই সমগ্ৰ দেশবাসীৰ সপোনক ঢাপে ঢাপে বাস্তৱৰ দিশলৈ আগুৱাই নিব। এতিয়া প্ৰত্যাহ্বানৰ জুই বৰষা চকুত আছে কেৱল বিশ্বকাপ জয়ৰ সপোন।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ