ৰাছিয়াৰ ইউক্ৰেইন আক্ৰমণ প্ৰায় নিশ্চিত বুলি ধাৰণা কৰিছে ভাৰতৰ লগতে বিশ্ব সম্প্ৰদায়ে৷ ইতিমধ্যে এই আশংকাৰে আমেৰিকাৰ বাইডেন প্ৰকাশনে ইউক্ৰেইনত থকা মাৰ্কিন নাগৰিকসকলক নিজ দেশলৈ ওভতি যাবলৈ নিৰ্দেশ জাৰি কৰিছিল৷
এই তালিকাত এইবাৰ ভাৰতৰ নামো সন্নিৱিষ্ট হৈছে৷ আসন্ন যুদ্ধৰ আশংকা কৰি ভাৰতেও ইউক্ৰেইনত থকা ভাৰতীয় নাগৰিকসকলক দেশলৈ ওভতি আহিবলৈ নিৰ্দেশ জাৰি কৰিছে৷
ইতিমধ্যে ইউক্ৰেইনৰ ভাৰতীয় দুতাবাসে এই সন্দৰ্ভত এক জাননী জাৰি কৰিছে৷ জাননীখনত ইউক্ৰেইনত বিভিন্ন উপলক্ষ্যত থকা ভাৰতীয়সকলক ইউক্ৰেইন ত্যাগ কৰি ভাৰতলৈ ওভতি যাবলৈ কোৱা হৈছে৷ আনকি ইউক্ৰেইনত বাস কৰা ভাৰতীয়সকলকো সতৰ্ক হৈ থাকিবলৈ জাননীতখনত কোৱা হৈছে৷
ইফালে ইউক্ৰেইনৰ ৰাজধানী কিয়েভস্থতি মাৰ্কিন দুতাবাস ইতিমধ্যে লিভিভলৈ স্থানান্তৰ কৰা হৈছে৷ সোমবাৰে মাৰ্কিন প্ৰশাসনে এক বিবৃতিৰ যোগে দাবী কৰিছে যে ৰাছিয়াই ইউক্ৰেইনৰ সীমান্তত সৈন্য মোতায়েন বৃদ্ধি কৰিছে৷
মাৰ্কিন প্ৰশাসনে দাবী কৰিছে যে যিকোনো সময়তে ইউক্ৰেইনৰ ৰাজধানীসহ দেশৰ বিভিন্ন স্থানত ৰাছিয়াই আক্ৰমণ কৰিব পাৰে৷
ইফালে ইয়াৰ পিছতো ৰাছিয়াই এতিয়াও ইউক্ৰেইন আক্ৰমণৰ কৰাৰ সম্ভাৱনা নাই বুলি দাবী কৰিছে৷ ৰাছিয়াৰ এই দাবীৰ পিছতো ইউক্ৰেইন সীমান্ত ৰাছিয়াই সৈন্যৰ সংখ্যা বৃদ্ধি কৰাৰ উপগ্ৰহীয় চিত্ৰও সংবাদ মাধ্যমত প্ৰচাৰ হৈছে৷
আনহাতে, ৰাছিয়াই ইউক্ৰেইনৰ দক্ষিণ, পূৱ আৰু পশ্চিম সীমান্তৰ পৰা প্ৰায় ১.৩ লাখ ৰাছিয়ান সৈন্য সেনা ছাউণীলৈ ওভতাই নিয়া বুলি দাবী কৰিছে৷
সংবাদ সংস্থা ৰয়টাৰ-এ ক্ৰেমলিনৰ উদ্ধৃতিৰে প্ৰকাশ কৰিছে যে ব্ৰিটেইন আৰু আমেৰিকাৰ সকীয়নিৰ পিছতে মস্কোৱে ইউক্ৰেইনৰ সীমান্তৰ পৰা সেনা ওভতাই নিবলৈ আৰম্ভ কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
