অসম লাইভ২৪ঃ এদিন প্ৰেমৰ বাবেই দেশ এৰিছিল ছানিয়া মিৰ্জাই৷ ছোৱেইব মালিকৰ হাতত ধৰি পাৰ হৈছিল ভাৰতৰ পৰিসীমা৷ ভাৰতীয় টেনিছ তাৰকা ছানিয়া মিৰ্জা হৈছিল পাকিস্তানৰ বোৱাৰী৷ ২০১০ চনত ক্ৰিকেটাৰ ছোৱেইব মালিকৰ সৈতে বিবাহ পাশত আবদ্ধ হৈছিল ছানিয়া মিৰ্জা৷ ২০১৮ চনত দুয়োৰে মাজলৈ আহিছিল এটি লৰা সন্তান৷ কিন্তু শেহতীয়াভাৱে প্ৰকাশিত হোৱা খবৰে হতাশ কৰিছে ছানিয়াৰ অনুৰাগীমহলক৷ পাকিস্তানী ক্ৰিকেটাৰগৰাকীয়ে ছানিয়াৰ বিপৰীতে আকৃষ্ঠ হৈছে অন্য নাৰীৰ প্ৰতি৷ যাৰবাবে দুয়োৰে সংসাৰত ফাঁট মেলিবলৈ আৰম্ভ হৈছে৷
এই দুই ছেলিব্ৰিটি যুঁটিৰ মাজৰ অন্তদ্বন্দই দুই দেশতেই লাভ কৰিছে চৰ্চা৷ পাক সংবাদমাধ্যমতো শীৰ্ষ শিৰোনাম হৈছে এতিয়া ছানিয়া-ছোৱেইব৷ একাংশই দাবী কৰা অনুযায়ী ইতিমধ্যে দুয়োৱে পৃথকে থাকিবলৈকো আৰম্ভ কৰিছে৷ পাকিস্তানৰ সংবাদ মাধ্যমত প্ৰকাশিত খবৰ অনুসৰি অচিৰেই দুয়োৰে মাজত বিচ্ছেদ হ’ব৷ কেৱল সন্তানৰ বাবেহে দুয়ো কিছু চিন্তিত৷ সন্তানৰ বাবেই দুয়োৱে এতিয়া যোগাযোগ ৰাখিছে৷ সন্তান ইজান মিৰ্জা মালিক ছানিয়াৰ সৈতে থাকিবনে সেই বিষয়ে দুয়োৱে বৰ্তমানো কোনো কথা প্ৰকাশ কৰা নাই৷
কিয় বিচ্ছেদৰ দিশে আগবাঢ়িছে ছানিয়া-ছোৱেইব? একাধিক পাক সংবাদমাধ্যমে দাবী কৰা অনুযায়ী ছানিয়াক প্ৰতাৰণা কৰিছে ছোৱেইবে৷ ছানিয়াৰ উপস্থিতিটো ছোৱেইবে সম্পৰ্ক ৰাখিছে অন্য নাৰীৰে৷ শেহতীয়াভাৱে ছানিয়াই সামাজিক মাধ্যমত শ্বেয়াৰ কৰা বিভিন্ন ফটোত ছোৱেইবক দেখা নোপোৱাৰ কাৰণ এয়াই বুলি একাংশ নেটিজেনেও সন্দেহ কৰিছে৷ ইপিনে বিগত কিছুদিন ধৰি ছানিয়াই দুখলগা কিছু পষ্ট শ্বেয়াৰ কৰিছে৷ শুকুৰবাৰে সন্তান ইজান মিৰ্জা মালিকৰ সৈতে এখন ফটো শ্বেয়াৰ কৰিছে ছানিয়াই৷ ফটোখন শ্বেয়াৰ কৰোতে ছানিয়াই কেপছনত লিখিছে, ‘কঠিন সময়ৰ মাজতো কিছুক্ষণ আমাৰ বাবে স্পেছিয়েল৷’
কেৱল ছানিয়াই তেনে পষ্ট শ্বেয়াৰ কৰিছে এনে নহয়৷ ক্ৰিকেটাৰ ছোৱেইবেও ফেচবুকত কৰা এটা পষ্টে দৃষ্টি কাঢ়িছে বহুতৰে৷ পষ্টত ছোৱেইবে সন্তানৰ উদ্দেশ্যি লিখিছে, ‘যেতিয়া তুমি ওপজিছিলা, তেতিয়া আমাৰ জীৱনে নতুন গতি পাইছিল৷ মোৰ জীৱনটো বিশেষ হৈ উঠিছিল৷ আমি যদিও একেলগে নাথাকো, তথাপিও এটা কথা মনত ৰাখিবা তোমাৰ আব্বাই সকলো সময়তে তোমাক বুকুত কঢ়িয়াই ফুৰে৷ সকলো সময়তে তোমাৰ হাঁহিভৰা মুখ এখন দেখিবলৈকে তোমাৰ আব্বাই সকলো কৰিব৷ আল্লাহে তোমাক সকলো দিয়ক ইজান মিৰ্জা মালিক৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
