অসম লাইভ২৪ঃ এই বিজয় সহজ নহয়, ধ্বংসস্তুপৰ মাজৰ পৰা ফিনিক্স পক্ষী হৈ উৰিছে ৰোছিবিনা দেবী। বিগত কেইবামাহ ধৰি মণিপুৰত হিংসাৰ দাৱানল। আজিও অচল হৈ আছে মণিপুৰৰ জনজীৱন। নাই, ইণ্টাৰনেট, বন্ধ বিদ্যালয়, অন্যান্য কাম কাজ বাদেই জীৱনটো জীয়াই থকাই মণিপুৰবাসীৰ বাবে এক বৃহৎ প্ৰত্যাহ্বান। গৃহহীন হাজাৰ হাজাৰ লোক। অস্থায়ী কেম্পত আৰু কিমানদিন থাকিব লাগিব তাৰো কোনো নিশ্চয়তা নাই। চকুৰ সন্মুখত হেৰাই গৈছে আত্মীয় স্বজন, অথচ হাতত একো উপায়ো নাই। নিজৰ জীৱনটো কাৰনো প্ৰিয় নহয়। জাতি বুলিলেই মানুহ উত্তেজিত হোৱাটো হয়তো যুগে যুগে জীনত কঢ়িয়াই অনা চৰিত্ৰ আমাৰ। সেয়ে মণিপুৰক শান্ত কৰোৱাৰ উপায় এতিয়া কাৰো হাততেই নাই। বুজিব লাগিব সেই প্ৰদেশৰ জনতাই আৰু তেওঁলোকক বুজোৱাৰ দায়িত্ব এতিয়া মণিপুৰত শাসনৰ গাদীত বহি থকাসকলৰ। এই অশান্তজৰ্জৰ মণিপুৰৰ পৰাই ওলাই আহিছে ৰোছিবিনা। মেৰিকম, মীৰাবাঈ চানুৰ দৰেই বুকুত সপোন বান্ধি ওলাই আহিছে ৰোছিবিনাও। ধ্বংসস্তুপৰ মাজত দৃঢ়তাৰে দেখা সপোন জানো ভঙাৰ ক্ষমতা কাৰোবাৰ থাকিব পাৰে! ৰোছিবিনাই এছিয়ান গেমছত বৃহস্পতিবাৰে ভাৰতলৈ কঢ়িয়াই আনিলে ৰূপৰ পদক।
মণিপুৰৰ জীয়াৰী ৰোছিবিনা দেবী। মহিলাৰ ৬০ কিঃগ্ৰাঃ শাখাত ৰূপৰ পদক আঁজুৰি আনিবলৈ সক্ষম হৈছে ৰোছিবিনাই। চীনৰ প্ৰতিদ্বন্দী ও ছিয়াওৰ হাতত পৰাস্ত হৈ দ্বিতীয় স্থানত থাকে ৰোছিবীনা। ৰূপৰ পদক জিকি কান্দোনত ভাঙি পৰিছে ৰোছিবিনা। চীনৰ প্ৰতিদ্বন্দীক হৰুওৱা সহজ নাছিল ৰোছিবিনাৰ বাবে। তথাপিও আৰম্ভণিৰে পৰাই এই যুঁজ আছিল শ্বাসৰুদ্ধকৰ। সোন জিকাৰ হেঁপাহ বুকুত বান্ধি যুদ্ধত নমা ৰোছিবিনাই দ্বিতীয় ৰাউণ্টও ছিয়াওক হৰোৱাব নোৱাৰাৰ বাবেই এই যুঁজ ইয়াতেই অন্ত পৰি ৰূপৰ পদকতেই সন্তুষ্ট থাকিব লগা হয় ৰোছিবিনা। দেশলৈ ৰূপৰ পদক কঢ়িয়াই আনি কান্দোনত ভাঙি পৰে ৰোছিবিনা। মণিপুৰৰ ক্ৰীড়াবিদগৰাকীৰ মতে সোন জিকাটো তেওঁৰ বাবে জৰুৰী আছিল। তেওঁৰ ৰাজ্যৰ পৰিস্থিতি খুবেই বেয়া তাৰপৰা বৰ কষ্টেৰে এইখিনি দূৰত্ব অতিক্ৰম কৰিছো ৰোছিবিনাই। মণিপুৰৰ হিংসাজৰ্জৰ পৰিস্থিতিৰ বাবে মে মাহৰ পৰাই ঘৰৰ সৈতে সংযোগ বিচ্ছিন্ন হৈ আছে ৰোছিবিনাৰ। আনকি অনুশীলনত প্রভাৱ পৰিব বুলি ঘৰৰ মানুহৰ সৈতে কথা পতাও নিষেধ আছিল ৰোছিবিনাৰ। পদক জিকি অৱশেষত পৰিয়ালৰ সৈতে ফোনযোগে বাৰ্তালাপত মিলিত হৈছে ৰোছিবিনা। ঘৰলৈ ফোন কৰিয়েই কান্দোনত ভাঙি পৰিছে ৰোছি। ৰোছিৰ লক্ষ্য আছিল সোন। ইমান দিনৰ কঠোৰ পৰিশ্ৰম ত্যাগৰ বিনিময়ত এটা সোনৰ পদক জৰুৰী আছিল ৰোছিৰ বাবে। ৰূপৰ পদক লাভ কৰি ৰোছিয়ে কান্দোনৰ মাজতেই ক’লে, ‘সোন জিকিব নোৱাৰি মোৰ দুখ লাগিছে। আৰু পৰিশ্ৰম কৰিব। মোৰ দেশৰ বাবে মোৰ ৰাজ্যৰ বাবে মই সোণ আনিমেই। আগন্তুক সময়ৰ বাবে এয়াই মই নিজক দিয়া প্ৰতিশ্ৰুতি।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
