অসম লাইভ ২৪ঃ ৰাজ্যত শুকুৰবাৰৰ পৰা বন্ধ হ’ব আন্তঃজিলা যাতায়াত। কোভিড সংক্ৰমণ ৰোধৰ উদ্দেশ্যে ৰাজ্য চৰকাৰে গ্ৰহণ কৰিছে এই সিদ্ধান্ত। ২১ মে’ৰ পুৱা ৫ বজাৰ পৰা ৪ জুন পৰ্যন্ত ৰাজ্যত আন্তঃজিলা পৰিবহণ আৰু যাতায়াতত নিষেধাজ্ঞা আৰোপ কৰিছে প্ৰশাসনে। অৱশ্যে নিষেধাজ্ঞাৰ পৰা ৰেহাই প্ৰদান কৰা হৈছে কোভিড ১৯ ৰ সৈতে জড়িত ফ্ৰণ্টলাইন কৰ্মী আৰু সামগ্ৰী সৰবৰাহকাৰীসকলক। সেইদৰে বিমানবন্দৰ, ৰে’ল ষ্টেচন আৰু ISBT লৈ টিকট থকা লোকক অহাৰ অনুমতি প্ৰদান কৰিছে। লগতে বৈদ্যুতিন-ছপা মাধ্যম, ন্যায়িক বিষয়া-কৰ্মচাৰী, গৰ্ভৱতী মহিলা আৰু চিকিৎসালয়লৈ যোৱা ৰোগীক সেই নিষেধাজ্ঞাৰ পৰা ৰেহাই দিয়া হৈছে। নিত্য ব্যৱহাৰ্য সামগ্ৰীকে ধৰি অন্যান্য সামগ্ৰী সৰবৰাহ কৰা যান-বাহন আৰু অনান্য জৰুৰী সেৱাৰ সৈতে জড়িত লোকৰ ক্ষেত্ৰত এই নিষেধাজ্ঞা প্ৰযোজ্য নহয়। ৰাজ্যত শেহতীয়া কোভিড পৰিস্থিতিৰ প্ৰতি লক্ষ্য ৰাখি গুৱাহাটী মহানগৰীকে ধৰি ৰাজ্যৰ চহৰাঞ্চলত দিনৰ ১২ বজাৰ পৰা পুৱা ৫ বজালৈ সান্ধ্য আইন জাৰি কৰিছে। গ্ৰামাঞ্চলৰ লগতে কোভিডৰ সংক্ৰমণ নোহোৱা অঞ্চলসমূহ নিৰাপদে ৰখাৰ উদ্দেশ্যে ৰাজ্য চৰকাৰে নিষেধাজ্ঞা জাৰি কৰাৰ কথা সদৰী কৰে মুখ্যমন্ত্ৰী ড০ হিমন্ত বিশ্ব শৰ্মাই। লগতে অসমত লকডাউন ঘোষণাৰ সম্ভাৱনীয়তা নথকাৰ ইংগিত দিয়ে মুখ্যমন্ত্ৰীগৰাকীয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
