অসম লাইভ২৪ঃ ভাৰতত যেনেকৈ জাতিভেদ আছে তেনেকৈ তাত ৰঙৰ ভেদাভেদ আছিল। হয়তো আজিও আছে। দেশৰ জাতিভেদক লৈ যেনেকৈ মহাত্মা গান্ধীয়ে মাত মাতিছিল তেনেকৈ দক্ষিণ আফ্ৰিকাত ৰঙৰ ভেদাভেদ আঁতৰাবলৈ আমৃত্যু কাম কৰিছিল এজন ব্যক্তিয়েই। তেৱেই নেলছন মেণ্ডেলা। মেণ্ডেলাৰ এটা এটা শব্দতেই যেন যাদু আছিল। তেওঁৰ শব্দৰ আপুনি নিৰৱ শ্ৰোতা ক’ব নোৱাৰাকৈয়ে হৈ পৰাকৈ শক্তিশালী আছিল তেওঁৰ শব্দ।
ভাৰতৰ লোকেও কিয় ভালপায় নেলছন মেণ্ডেলাক? দক্ষিণৰ কোনোৱা প্ৰান্তীয় এলেকাৰ পৰা বিশ্বত নিজকে প্ৰতিষ্ঠা কৰা নেলছন মেণ্ডেলাৰ এই যাত্ৰা জানো মসৃণ আছিল। খোজে প্ৰতি প্রত্যাহ্বান। কেতিয়াবা যদি মেণ্ডেলাৰ ঠিকনা আছিল কাৰাগাৰ কেতিয়াবা তেওঁ হৈছিল দক্ষিণ আফ্ৰিকাৰ প্ৰতিজন নিপীড়িতৰ হৃদকম্পন। সেই নেলছন মেণ্ডেলাৰ চৰ্চা ভাৰতত হোৱাৰ কাৰণো এটাই। নেলছন মেণ্ডেলাৰ যুদ্ধখনত ভাৰতীয় লোক একাত্ম হৈ উঠিব পাৰে। নেলছনে কোৱা কথাবোৰে ভাৰতৰ প্ৰতিজন নিপীড়তৰো প্ৰতিবাদৰ ভাষা হৈ ধৰা দিয়ে।
নেলছন মেণ্ডেলা সন্দৰ্ভত ভাৰতীয় চুপাৰষ্টাৰ বিগবী অমিতাভ বচ্চনে তেওঁৰ টুইটাৰ একাউণ্টত লিখিছিল এটা বিশেষ লেখা। অমিতাভ বচ্চনে নেলছন মেণ্ডেলা সন্দৰ্ভত কৈছিল, ‘নেলছন মেণ্ডেলা আধুনিক সময়ত পৃথিৱীলৈ অহা সকলোতকৈ মহান লোকসকলৰ মাজৰে এজন। তেওঁৰ কথা আৰু কামত মিল আছিল। যি কয় সেয়া শিলৰ ৰেখা আছিল তেঁওৰ বাবে। আত্মবিশ্বাসেৰেই তেওঁ যুঁজ দিছিল। ভাৰতৰ পৰা তেওঁক দিয়া সৰ্বোচ্চ সন্মান তেওঁৰ প্ৰাপ্যই।’
দক্ষিণ আফ্ৰিকাৰ ৰাষ্ট্ৰপতিৰ আসনত বহা মেণ্ডেলা ২৭বছৰ কাৰাগাৰতো আছিল। কাৰাগাৰলৈ যোৱাৰ কাৰণ এটাই। তেওঁ দক্ষিণ আফ্ৰিকাৰ ৰঙভেদ প্ৰথাৰ বিৰুদ্ধে মাত মতা। কঠোৰ শাস্তিৰ সন্মুখীন হৈয়ো তেওঁ হাৰ মনা নাছিল। জে’লৰ পৰা ওলাই দিয়া এটা মন্তব্যত নেলছন মেণ্ডেলাই কৈছিল, ‘মই ২৭বছৰীয়া ছুটিত গৈছিলো।’
নেলছন মেণ্ডেলাৰ জন্ম ১৯১৮ চনৰ ১৮ জুলাইত হৈছিল। নেলছনৰ নামৰ সৈতে লাগি থকা উপাধিক লৈয়ো বহুতেই প্ৰশ্ন কৰে। দক্ষিণ আফ্ৰিকাত চৰ্দাৰৰ পুতেকক মেণ্ডেলা বুলি কোৱা হয়। সৰুৰে পৰাই মেণ্ডেলাই প্ৰতিষ্ঠানিক বৰ্ণবিভাজন আৰু বৈষম্য ব্যৱস্থাৰ বিৰুদ্ধে যুঁজি আহিছিল। বৰ্ণবাদী অন্যায়ৰ সন্মুখীন হৈ অহা মেণ্ডেলা আইনৰ ছাত্ৰও আছিল। এইসমূহ অভিজ্ঞতাই তেওঁক যুঁজিবলৈ শিকাইছিল। ১৯৪৪ চনত মেণ্ডেলাই বৰ্ণ বৈষম্যক প্ৰত্যাহ্বান জনোৱা আৰু কৃষ্ণাংগৰ অধিকাৰৰ পোষকতা কৰা ৰাজনৈতিক দল আফ্ৰিকান নেচনেল কংগ্ৰেছ(এএনচি)ত যোগদান কৰে।
বৰ্ণবাদী সমাজ ব্যৱস্থাক ওফৰাই পেলাবলৈ মেণ্ডেলাই শান্তিপূৰ্ণ প্ৰতিবাদ, ধৰ্মঘট, বৰ্জনৰ লগতে ভালেমান জংগী কাৰ্যসূচীৰো নেতৃত্ব দিছিল। বৰ্ণবৈষম্যৰ বিৰুদ্ধে যুঁজ দিয়াৰ বাবে তেওঁ গুৰুত্বপূৰ্ণ ভূমিকা পালন কৰিছিল। যাৰ ফলত ১৯৬২ চনত তেওঁক গ্ৰেপ্তাৰ কৰা হৈছিল আৰু পৰৱৰ্তী সময়ত কাৰাগাৰলৈ নিক্ষেপ কৰা হৈছিল। কাৰাগাৰত বন্দী হৈ থকাৰ পিছতো তেওঁ নিপীড়িতসকলৰ বাবে আশাৰ প্ৰতীক হৈয়েই থাকিল।
২৭ বছৰ ৭ মাহ কাৰাবাস খটাৰ পিছত ১৯৯০ চনৰ ১১ ফেব্ৰুৱাৰীত কাৰাগাৰৰ পৰা মুক্তি পোৱা মেণ্ডেলাই সম্প্ৰীতি আৰু জাতি-নিৰ্মাণৰ পথত নামি পৰে। তেওঁ কাৰাগাৰৰ পৰা ওলাই শ্বেতাংগ শাসকৰ লগত শান্তিপূৰ্ণ আলোচনাৰ পোষকতা কৰে। অহিংসা আৰু সৰ্বাংগীনতাৰ প্ৰতি মেণ্ডেলাই প্ৰদৰ্শন কৰা দায়বদ্ধতাই গণতান্ত্ৰিক দক্ষিণ আফ্ৰিকাৰ পথ প্ৰশস্ত কৰিলে। মেণ্ডেলাই এই দীঘলীয়া সংগ্ৰামৰ ফলতে ১৯৯৪ চনত দেশৰ প্ৰথমটো সৰ্বজাতিক আৰু গণতান্ত্ৰিক নিৰ্বাচন অনুষ্ঠিত হয়। ১৯৯৪ চনৰ পৰা ১৯৯৯ চনলৈ নেলছন মেণ্ডেলাৰ ৰাষ্ট্ৰপতিত্বৰ সময়ছোৱা দক্ষিণ আফ্ৰিকাৰ বাবে আছিল এক নতুন যুগ। প্ৰথমজন কৃষ্ণাংগ ৰাষ্ট্ৰপতি হিচাপে তেওঁ দায়িত্বভাৰ গ্ৰহণ কৰিছিল।
ৰাষ্ট্ৰপতিৰ বাহিৰেও মেণ্ডেলাই বিশ্বব্যাপী শান্তি, সমতা আৰু মানৱ অধিকাৰৰ প্ৰসাৰৰ বাবে নিজৰ প্ৰচেষ্টা অব্যাহত ৰাখিছিল। তেওঁ এইচ আই ভি/এইডছ সজাগতা আৰু শিক্ষাৰ এক প্ৰভাৱশালী সমৰ্থক হৈ পৰিছিল। নেলছন মেণ্ডেলা ফাউণ্ডেশ্যন আৰু নেলছন মেণ্ডেলা শিশু পুঁজি স্থাপনৰ জৰিয়তে তেওঁ পিছপৰা লোকসকলক আগুৱাই লৈ যোৱাৰ চেষ্টা কৰিছিল। ২০১৩ চনৰ ৫ ডিচেম্বৰৰ দিনা বাৰ্ধক্যজনিত কাৰণত ৯৫ বছৰ বয়সত শেষ নিশ্বাস ত্যাগ কৰে নেলছন মেণ্ডেলাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
