IPL ৰ জনপ্ৰিয় দল ৰাজস্থান ৰয়েলছৰ মালিকানা সলনি৷ এক নতুন অধ্যায়ৰ আৰম্ভণি হৈছে ৰাজস্থান ৰয়েলছৰ ইতিহাসত৷ লক্ষ্মী নিবাস মিত্তল আৰু আদিত্য মিত্তলে হাত মিলাইছে অদাৰ পুনাৱালাৰ সৈতে৷ আৰু সেই জোঁটেই অধিগ্ৰহণ কৰিছে এই ফ্ৰেঞ্চাইজি৷ এই চুক্তিৰ মূল্য প্ৰায় ১.৬৫ বিলিয়ন মাৰ্কিন ডলাৰ৷ যি ভাৰতীয় মুদ্ৰাত প্ৰায় ১৫,৬০০ কোটি টকা৷ এই ১.৬৫ বিলিয়ন ডলাৰৰ মূল্য কেৱল ৰাজস্থান ৰয়েলছৰ পুৰুষ দলেই নহয় পাৰ্ল ৰয়েলছ আৰু বাৰ্বাডোছ ৰয়েলছৰ সামগ্ৰিক মূল্যকো ধৰা হৈছে৷
৩ মে’ত মিত্তল পৰিয়ালে আনুষ্ঠানিকভাৱে এই খবৰ জনায়৷ তেওঁলোকে জনাইছে যে মনোজ বদালে আৰু তেওঁৰ সংস্থাৰ সৈতে দীৰ্ঘ আলোচনাৰ পাছত অৱশেষত এই চুক্তি সম্পন্ন হৈছে৷ এই পৰিবৰ্তনৰ সৈতে কেৱল মালিকানাই সলনি নহয়, বৰং ৰাজস্থান ৰয়েলছৰ ভৱিষ্যতক লৈয়ো নতুন আশা আৰু উত্তেজনা তৈয়াৰ হৈছে৷
এক ৰিপৰ্ট অনুসৰি মিত্তল পৰিয়ালে পূৰ্বৰে পৰাই ৰাজস্থান ৰয়েলছৰ প্ৰতি আগ্ৰহ দেখুৱাইছিল৷ তেওঁলোকৰ লক্ষ্য আছিল নিজৰ ক্ৰীড়া বিনিয়োগ আৰু শক্তিশালী কৰা৷ এইবাৰ সেই আগ্ৰহ বাস্তৱত পৰিণত হৈছে৷ এই চুক্তিৰ পাছত ৰাজস্থান ৰয়েলছত মিত্তল পৰিয়ালৰ ৭৫ শতাংশ অংশ থাকিব৷ অদাৰ পুনাৱালাৰ হাতত থাকিব ১৮ শতাংশ, বাকী ৭ শতাংশ থাকিব অন্য বিনিয়োগকাৰীসকলৰ হাতত৷ যাৰ মাজত মনোজ বদালেও আছে৷
কি কৈছে মিত্তল পৰিয়ালে?
লক্ষ্মী নিবাস মিত্তল, আদিত্য মিত্তল, বনিশা মিত্তল ভাটিয়া, অদাৰ পুনাৱালা, মনোজ বদালে ৰাজস্থান ৰয়েলছ বৰ্ডত থাকিব৷ ৰাজস্থানৰ সৈতে মিত্তল পৰিয়ালৰ গভীৰ সম্পৰ্কও আছে৷ লক্ষ্মী নিবাস মিত্তলৰ জন্ম আৰু শিক্ষাদীক্ষা ৰাজস্থানৰ চাদুলপুৰত৷ তেওঁ কয়, ‘ক্ৰিকেটৰ প্ৰতি ভালপোৱা বহু পুৰণি৷ পৰিয়াল ৰাজস্থানৰ হোৱাৰ বাবে ৰাজস্থান ৰয়েলছৰ দৰে দলৰ সৈতে যুক্ত হোৱাৰ সুযোগ আমাৰ বাবে ভাল সুযোগ৷ এই দলৰ অংশ হ’বলৈ পাই আমি খুবেই সুখী৷’
নতুন মালিকক স্বাগত
মনোজ বদালে নতুন মালিকক স্বাগত জনাই কয়, ‘মিত্তল পৰিয়াল আৰু অদাৰ পুনাৱালাক পাই খুবেই আনন্দিত৷ ক্ৰিকেটৰ প্ৰতি তেওঁলোকৰ ভালপোৱা, ৰাজস্থান আৰু ভাৰতৰ সৈতে তেওঁলোকৰ সংযোগ আৰু এই দলৰ বাবে দীৰ্ঘম্যাদি পৰিকল্পনা সকলো মিলি তেওঁলোক এই দলৰ বাবে উপযুক্ত নেতৃত্ব৷ সূত্ৰৰ খবৰ যে ইয়াৰ পূৰ্বে কাইলৈ সোমানিৰ নেতৃত্বক এটা সংস্থাই এই ফ্ৰেঞ্চাইজি কিনিবলৈ আগুৱাই আহিছিল৷ কিন্তু শেষলৈ তেওঁলোকৰ সৈতে চুক্তি সম্পন্ন নহ’ল৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
