দৈনন্দিন পৰিষ্কাৰ-পৰিচ্ছন্নতাৰ বাবে গা ধোৱাটো অতি গুৰুত্বপূৰ্ণ। গা ধোৱাৰ ফলত শৰীৰৰ ঘাম, ধূলি-মলি আঁতৰ হয় আৰু শৰীৰে সতেজ অনুভৱ কৰে। বিশেষকৈ গৰম আৰু আৰ্দ্ৰ বতৰত বা বেছি শাৰীৰিক পৰিশ্ৰম কৰিলে শৰীৰত অধিক ঘাম ওলায়। এনে সময়ত নিয়মিত গা ধোৱাটো অধিক প্ৰয়োজনীয়। কিন্তু প্ৰতিদিনে সকলোৱে গা ধোৱাটো বাধ্যতামূলক নহয়। কিমান সঘনাই গা ধুব লাগে, সেয়া ব্যক্তিজনৰ দৈনন্দিন কাম-কাজ, বতৰ, ঘামৰ পৰিমাণ আৰু ছালৰ প্ৰকাৰৰ ওপৰত নিৰ্ভৰ কৰে।
প্ৰতিদিনে গা ধোৱাটো প্ৰয়োজনীয় নেকি?
ক্লিভলেণ্ড ক্লিনিকৰ মতে, প্ৰতিদিনে গা ধোৱাটো ভুল নহয়, কিন্তু সকলোৰে বাবে প্ৰতিদিনে গা ধোৱাটো প্ৰয়োজনীয়ও নহয়। যিসকলে নিয়মিত ব্যায়াম কৰে, কঠিন শাৰীৰিক পৰিশ্ৰম কৰে বা বেছি ঘাম ওলায়, তেওঁলোকৰ বাবে প্ৰতিদিনে গা ধোৱাটো উপকাৰী হ’ব পাৰে। গৰম আৰু আৰ্দ্ৰ বতৰত থাকিলেও অধিক সঘনাই গা ধোৱাৰ প্ৰয়োজন হ’ব পাৰে। আনহাতে, যিসকলৰ কম ঘাম ওলায় বা ঠাণ্ডা বতৰত থাকে, তেওঁলোকৰ বাবে প্ৰতিদিনে দীঘলীয়া সময় গা ধোৱাৰ প্ৰয়োজন নাথাকিব পাৰে। বিশেষকৈ ছাল শুকান বা সংবেদনশীল হ’লে বাৰে বাৰে গা ধোৱাৰ ফলত ছাল অধিক শুকান হৈ যাব পাৰে। সেয়েহে সকলোৰে বাবে একেটা গা ধোৱাৰ নিয়ম প্ৰযোজ্য নহয়। নিজৰ ছালৰ অৱস্থা আৰু দৈনন্দিন কাম-কাজৰ ওপৰত ভিত্তি কৰি গা ধোৱাৰ অভ্যাস ঠিক কৰাটো ভাল।
গা ধোৱাৰ সঠিক পদ্ধতি কি?
গা ধোৱাৰ সময়ত তলত দিয়া কথাকেইটা মনত ৰখা উচিত।
অতি গৰম পানী ব্যৱহাৰ নকৰিব: বেছি গৰম পানীয়ে ছালৰ স্বাভাৱিক আৰ্দ্ৰতা কমাই ছাল শুকান কৰি তুলিব পাৰে। সেয়ে কুহুমীয়া পানীৰে গা ধোৱাটো ভাল।
বেছি সময় শ্বাৱাৰত নাথাকিব: দীঘলীয়া সময় গা ধোৱাৰ পৰিৱৰ্তে প্ৰায় ৫ৰ পৰা ৭ মিনিটৰ ভিতৰত গা ধোৱা শেষ কৰাৰ চেষ্টা কৰক।
মৃদু চাবোন ব্যৱহাৰ কৰক: ছাল শুকান বা সংবেদনশীল হ’লে তীব্ৰ সুগন্ধি থকা বা কঠোৰ চাবোনৰ সলনি মৃদু চাবোন ব্যৱহাৰ কৰাটো ভাল।
ছাল জোৰেৰে নঘঁহিব: গা ধোৱাৰ পিছত টাৱেলেৰে ছালখন জোৰেৰে ঘঁহি শুকুৱাব নালাগে।
মইশ্ব’ৰাইজাৰ ব্যৱহাৰ কৰক: গা ধোৱাৰ পিছত মইশ্ব’ৰাইজাৰ লগালে ছালৰ আৰ্দ্ৰতা ধৰি ৰখাত সহায় কৰিব পাৰে। বিশেষকৈ শুকান ছালৰ ক্ষেত্ৰত ই উপকাৰী।
গা ধোৱাটো শৰীৰৰ পৰিষ্কাৰ-পৰিচ্ছন্নতাৰ এক গুৰুত্বপূৰ্ণ অংশ। কিন্তু প্ৰতিদিনে গা ধোৱাটো সকলোৰে বাবে একে ধৰণে প্ৰয়োজনীয় নহয়। বতৰ, ঘাম, দৈনন্দিন কাম-কাজ আৰু ছালৰ প্ৰকাৰৰ ওপৰত ভিত্তি কৰি গা ধোৱাৰ অভ্যাস ঠিক কৰাটোৱেই ভাল। লগতে অতি গৰম পানী, দীঘলীয়া শ্বাৱাৰ আৰু কঠোৰ চাবোন এৰাই চলিলে ছাল সুস্থ আৰু কোমল কৰি ৰখাত সহায় কৰিব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
