অসম লাইভ২৪ঃ গাজাৰ পৰা দখল হেৰুৱাইছে পেলেষ্টাইনৰ সসস্ত্ৰ গোষ্ঠী হামাছে। এই দাবী আমি কৰা নাই। এই দাবী কৰিছে ইজৰাইলে। ইজৰাইলৰ প্ৰতিৰক্ষামন্ত্ৰী যোয়াভ গেলেণ্টে জনোৱা অনুসৰি ১৬ বছৰ ধৰি হামাছে গাজা চহৰ দখল কৰি ৰাখিছিল। কিন্তু শেহতীয়াভাৱে ইজৰাইলে গাজাৰ পৰা হামাছক সম্পূৰ্ণৰূপে নিশেষ কৰাত সফল হৈছে। ইজৰাইলৰ প্ৰতিৰক্ষা মন্ত্ৰীয়ে জনোৱা অনুসৰি হামাছে গাজা এৰি দক্ষিণ দিশলৈ ইতিমধ্যেই পলাইছে। তেওঁৰলোকৰ ঘাটিসমূহ ইজৰাইলী সেনাৰ কব্জাত আছে। ১৬ বছৰ ধৰি গাজাক হামাছমুক্ত কৰাৰ সপোন দেখিও এইবাৰহে গাজাক সন্ত্ৰাসমুক্ত কৰিব পাৰিছো বুলি জনাইছে বেঞ্জামিন নেতানিয়াহু চৰকাৰে।
ইজৰাইলৰ প্ৰতিৰক্ষামন্ত্ৰীয়ে এই সন্দৰ্ভত কয়, ‘হামাছ মুক্ত গাজা। এটাও হামাছ সন্ত্ৰাসবাদী এতিয়া গাজাত নাই। দক্ষিণৰ ফালে হামাছ পলাইছে। সাধাৰণ মানুহে সেই ঘাটিসমূহত আছে।’ এই দাবী ইজৰাইলে কৰিলেও ইয়াৰ সপক্ষে প্ৰমাণ দাঙি ধৰিবলৈ ইজৰাইলৰ হাতত তেনে কোনো ভিডিঅ’ প্ৰমাণ নাই। হামাছক গাজাৰ পৰা খেদি পঠিয়াইছো বুলি দাবী কৰা ইজৰাইলে তেওঁলোকৰ পণবন্দী নাগৰিকসকলকো উলিয়াই অনাৰ চেষ্টা অব্যাহত ৰাখিছে। বৰ্তমান পণবন্দীক উলিয়াই অনা কামতেই তেওঁলোক ব্যস্ত থকা বুলি জনাইছে নেতানিয়াহু চৰকাৰে। কেনেকৈ পণবন্দীসকলক মুক্ত কৰিব পৰা যায় সেই বিষয়তহে মনোনিৱেশ কৰিছে চৰকাৰে। ইজৰাইল আৰু হামাছৰ মধ্যস্থতাকাৰী হিচাপে কাম কৰিছে কাটাৰে। কাটাৰৰ প্ৰতিনিধিৰ মাধ্যমেৰে এখন দেশৰ পৰা আন এখন দেশলৈ বাৰ্তাবাহকৰ কাম কৰিছে কাটাৰে।
প্ৰতিৰক্ষামন্ত্ৰী গেলেণ্টৰ বক্তব্যৰ পাছতেই হামাছৰ দাবী, ইজৰাইলে কাটাৰৰ বাৰ্তাক মন দিয়েই যুদ্ধ কমাইছে। হামাছৰ মুখপাত্ৰ আবু ওৱেদিয়াই এই সন্দৰ্ভত কয়, ‘মধ্যস্থতাকাৰীয়ে আমাক জনাইছে যে, পাঁচ দিনৰ যুদ্ধবিৰতি ঘোষণা কৰিলে কিছু পণবন্দীক আমি মুকলি কৰি দিম। সেই পাঁচ দিন আমি আহতসকলৰ চিকিৎসা কৰিম। কিন্তু শত্ৰুপক্ষই আমাৰ কথা মানিব নামানে সেয়া মধ্যস্থতাকাৰীৰ পৰাহে গম পাম।’
৫দিনৰ যুদ্ধবিৰতিৰ পৰিবৰ্তে ৭০ জন পণবন্দীক এৰিবলৈ সাজু হামাছ। ইজৰাইলে ১০০ জনক মুক্তিৰ দাবী জনাইছে। তাৰ পৰিপ্ৰেক্ষিতত হামাছৰ তৰফৰ পৰা লগতে জনাইছে যে, ১০০ জনক মুক্তি দিলে ইজৰাইলৰ জে’লত থকা ২০০ পেলেষ্টাইনী শিশু আৰু ৭৫ মহিলাক মুক্তি দিব লাগিব। বিগত ৭ অক্টোবৰত হামাছ বাহিনীয়ে ইজৰাইলৰ ভূখণ্ডত সোমাই আক্ৰমণ চলাই বহু নাগৰিকক পণবন্দী কৰিছিল। পণবন্দীৰ সংখ্যা ২০০তকৈয়ো অধিক। তাৰপিছতেই যুদ্ধ আৰম্ভ হৈছে পশ্চিম এছিয়াত। এমাহতকৈয়ো বেছি সময় ধৰি চলা সেই যুদ্ধত প্ৰতি দিনেই বহু মানুহৰ মৃত্যু হৈছে। কেৱল গাজাতেই মৃতকৰ সংখ্যা ১১ হাজাৰ পাৰ হৈছে। ইয়াৰে ৫হাজাৰতকৈয়ো অধিক শিশু বুলি জানিব পৰা গৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
