অসম লাইভ২৪ঃ ৰক্তক্ষয়ী যুদ্ধ অব্যাহত। অৱসানৰ কোনো নামগোন্ধই নাই। যুদ্ধ পৰিস্থিতি ক্ৰমাগতভাৱে ভয়াৱহ ৰূপহে লৈছে। শ শ মহিলা পুৰুষ, শিশুৰ মৃত্যুৱে বিধ্বস্ত কৰিছে গাজাক। ইয়াৰ মাজতে আৰু এক ভয়ংকৰ খবৰ ভাইৰেল হৈ পৰিছে। ইজৰাইলী সেনাই দিছে এই বিশেষ খবৰ। হামাছ নিধনৰ বাবে অমানবিয়তাৰ শেষ সীমা অতিক্ৰম কৰিছে ইজৰাইলে। পেলেষ্টাইনী জঙ্গি সংগঠনটোক শেষ কৰিবৰ বাবে সকলো প্ৰকাৰেই সাজু ইজৰাইল। ইজৰাইলী সেনাৰ তৰফৰ পৰা জনোৱা অনুসৰি ভয়ংকৰ বিস্ফোৰণত ঘটাই দ্বিখণ্ডিত কৰি দিয়া হৈছে গাজাক।
নিশাৰ অন্ধকাৰত উত্তৰ গাজাত শক্তিশালী বিস্ফোৰণ সংঘটিত কৰাইছে ইজৰাইলী সেনাই। বিগত ৭ অক্টোবৰৰ পৰা আৰম্ভ হোৱা যুদ্ধত বৰ্তমান পৰ্যন্ত নিহতৰ সংখ্যাই ১০ হাজাৰৰ পৰিসীমা অতিক্ৰম কৰিছে। বিগত ৭ অক্টোবৰত ইজৰাইলৰ সীমান্তত সোমাই আক্ৰমণ কৰিছিল হামাছৰ সন্ত্ৰাসবাদী গোটে। এই আক্ৰমণত কমপক্ষেও প্ৰাণ হেৰুৱাইছিল ১৪০০ ইজৰাইলী নাগৰিকে। ইয়াৰোপৰি ২৪০ জনক পণবন্দী কৰিছিল হামাছে। ইজৰাইলক কৰা এই আক্ৰমণৰেই প্ৰত্তুত্ত্যৰ দিছে ইজৰাইলে। ইজৰাইক মুকলিকৈ সমৰ্থন জনাইছে আমেৰিকাকে ধৰি পশ্চিমৰ কেইবাখনো দেশে।
২০০৭ চনৰ পৰা গাজা উপত্যকা নিয়ন্ত্ৰণ কৰিছে হামাছে। সন্ত্ৰাসবাদী সংগঠনক নিৰ্মূল কৰা আৰু পণবন্দীক মুক্ত কৰোৱাৰ লক্ষ্যৰেই ইজৰাইলে আক্ৰমণ অব্যাহত ৰাখিছে। ইজৰাইলী সেনাবাহিনীৰ এজন মুখপাত্ৰই জনোৱা অনুসৰি বিস্ফোৰণ ঘটাই দুই ভাগত ভাগ কৰি দিয়া হৈছে গাজাক। অখণ্ড গাজা আৰু নাই। উত্তৰ আৰু দক্ষিণ দুই ভাগত ভাগ হৈছে গাজা। গাজা দ্বিখণ্ডিত হোৱাৰ খবৰ প্ৰকাশ কৰিছে আল জাজিৰাই। ইজৰাইলী মিডিয়াৰ দাবী, সেনাই ৪৮ ঘণ্টাৰ ভিতৰত সমগ্ৰ গাজা চহৰ দখল কৰিব। আনহাতে ইজৰাইলী সামৰিক মুখপাত্ৰই CNN ক জনোৱা অনুসৰি সাধাৰণ নাগৰিকসকলে যাতে নিৰাপদে দক্ষিণৰ ফালে যাব পাৰে তাৰবাবে ছেফ কৰিডৰ তৈয়াৰ কৰি আছে সেনাই। যাৰবাবে বিগত দুদিন ধৰি গুলীবৰ্ষণ বন্ধ কৰা হৈছে।
আনহাতে পেলেষ্টাইলী শৰণাৰ্থী শিবিৰত আক্ৰমণ চলোৱাৰ অভিযোগ উঠিছে ইজৰাইলৰ বিৰুদ্ধে। শনিবাৰে নিশা গাজাৰ মাঘাজি শৰণাৰ্থী শিবিৰত ইজৰাইলী সেনাই বোমা বৰ্ষণ কৰাৰ অভিযোগ উত্থাপিত হৈছে। এই ঘটনাত মৃত্যুক সাবটি লৈছে ৫৩ জন লোকে। মৃতদেহৰ মাজত অধিকাংশ মহিলা আৰু শিশু বুলিও জানিব পৰা গৈছে। শনিবাৰে নিশা গাজাত কেৱল বোমাবৰ্ষণেই হোৱা নাই হামাছৰ সৈতে মুখামুখি সংঘৰ্ষও হৈছে। ইজৰাইলে গাজাৰ বাসিন্দাসকলক সেই স্থানৰ পৰা আঁতৰি যাবলৈ বাৰে বাৰে আহ্বান জনাই আছে। গাজাৰ উত্তৰ আৰু দক্ষিণৰ বাসিন্দাসকলক সেই স্থান ত্যাগ কৰিবলৈ ৪ ঘণ্টাৰ সময়সীমা বান্ধি দিছে। পুৱা ১০বজাৰ পৰা দুপৰীয়া ২ বজা পৰ্যন্ত গাজাৰ বাসিন্দাসকলক সময় দিয়া হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
